ဘ့(လ) မ့ၢ်ကီၢ်ဒိၣ်ခွါလၢ အိၣ်ဘှံးက့ၤလၢ အတၢ်ဖံးတၢ်မၤ, ဒီးတယံာ်ဒံးဘၣ်န့ၣ် ညိကွံာ်ဝဲ တၢ်နီၣ်သိလ့ၣ်အတၢ်မၤ, ဒီးအိၣ်ဆိးဝဲဒၣ်တဂၤဧိၤန့ၣ်လီၤ. လၢတၢ်လဲၤဟံးန့ၢ် တၢ်အီၣ်တၢ်အီတဖၣ်လၢ ပှၤဆါတၢ်ပှ့ၤတၢ်အလီၢ်, ကဘၣ်လဲၤထုးထီၣ် ကသံၣ်ကသီ တဖၣ်, ဒီးလၢအိၣ်ဘှံးနံၤ, တၢ်လဲၤဆှၢအီၤဆူ တၢ်ဘါသရိာ်အဂီၢ်, အဝဲလိၣ်တၢ်မၤစၢၤ န့ၣ်လီၤ. ဘၣ်ဆၣ် ဘ့(လ) စံးဝဲဒၣ်လၢ, “တနံၤဘၣ်တနံၤန့ၣ် ယအဲၣ်ဒိးအိၣ်ဆိးလၢ ဟံၣ်ဃီန့ၣ်လီၤ. တၢ်ဘူၣ်ထီၣ်ဘါထီၣ်ယွၤ လၢကွဲၤထံၣ်ဟူအပူၤ, ခီဖျိတၢ်သးဝံၣ် စံးထီၣ်ပတြၢၤယွၤ လၢပတဟ့ၣ်ဘၣ်အပှ့ၤကလံၤ, ဒီးတၢ်မၤလိ လံာ်စီဆှံ ဒီတနံၤကျၢၤ န့ၣ် မ့ၢ်နသ့ၣ်ညါဧါ” န့ၣ်လီၤ. ဘ့(လ) မၤလၢာ်ဝဲဒၣ် အမုၢ်နံၤတဖၣ်န့ၣ် ပှဲၤလုာ်ဘၢကွံာ်ဒီး ယွၤကလုၢ်ကထါ, တၢ်ထုကဖၣ်, ဒီးသးဝံၣ်စံးထီၣ်ပတြၢၤယွၤတဖၣ်န့ၣ်လီၤ.
ဖဲပသူၣ်ပသးတဖၣ်သူၣ်လီၤအသးအလီၢ်န့ၣ် လုၢ်လၢ်လၢ ပဟံးဃာ်တဖၣ်န့ၣ် ဒိၣ်စိလုၢ်ဘၢဝဲန့ၣ်လီၤ. ထါစံးထီၣ်ပတြၢၤနီၢ်ဂံၢ် ၁:၁-၂ ပာ်ဖျါထီၣ် ပှၤတဂၤအလုၢ်အလၢ်လၢ အဒိးန့ၢ် တၢ်ဘၣ်ကစၢ်ယွၤအသး- မုၢ်လၤသးခုဝဲလၢ ကစၢ်ယွၤအတၢ်မ့ၢ်တၢ်တီ, ဆိကမိၣ်ဝဲလၢ မုၢ်ဆါဆဲးလၢမုၢ်နၤ, ဒီးတလူၤပိာ်ထွဲ ဟီၣ်ခိၣ်အတၢ်ထီဒုၣ်ထီဒါအလုၢ်အလၢ်တဖၣ်န့ၣ်ဘၣ်လီၤ. တၢ်ကီတၢ်ခဲကဟဲလီၤဘၣ် ပှၤကိးဂၤဒဲး ဘၣ်ဆၣ်, တၢ်အိၣ်မူအိၣ်သူၣ်လီၤအသးလၢ ယွၤအကျဲဧိၤကပူၤဧိၤတဖၣ်န့ၣ်, အဆၢဖိ ၃ စံးဘၣ်ပှၤ, “ကမၤသးဒ်သ့ၣ်သူၣ်လီၤအသးလၢ ထံဖိကျိအနံၤ… အလၣ်တလီၤညွံးဘၣ်အသိး” န့ၣ်လီၤ. ခီဖျိလၢပတၢ်အိၣ်မူ တၢ်အိၣ်အသးတဖၣ်အဃိ, လၢမုၢ်တနံၤအတီၢ်ပူၤ, ပစူးကါတၢ်ဆၢကတီၢ်အါနၣ်ရံၣ် လၢတၢ်မၤလိလံာ်စီဆှံအဂီၢ် တမ့ၢ်ကန့ၢ်လၢၤဘၣ်န့ၣ်လီၤ. ဘၣ်ဆၣ်, ယိၤ ၇:၃၇-၃၉ န့ၣ်, ကစၢ်ယ့ၣ်ရှူး စံးဝဲလၢ, “ပှၤမ့ၢ်သူအသးလၢထံတဂၤဂၤန့ၣ်, မ်အဟဲဆူယအိၣ်ဒီးအီတၢ်တက့ၢ်, သးစီဆှံကမၤပှဲၤ ပှၤလၢအစူၢ်က့ၤနာ်က့ၤယၤအံၤ, ထံကျိမူတဖၣ်ကယွၤလီၤလၢအဟၢဖၢပူၤ” န့ၣ်လီၤ. ပဘျုးလီၤပသူၣ်ပသးလၢ ထံမူကျိအပူၤ, ခီဖျိလၢတၢ်စံးထီၣ်ပတြၢၤယွၤ, ဒီးဖးယွၤအကလုၢ်ကထါ, ဒီးခီဖျိစ့ၢ်ကီးလၢ တၢ်အဲၣ်ကဟုကယာ်ပှၤဂၤတဖၣ်, ဒီးဖဲပဖံးတၢ်မၤတၢ်အကတီၢ်န့ၣ် စံးကတိၤတၢ်ဒီးကစၢ်ယွၤ, ဒီးဖဲပမၤဘၣ်တၢ်ဒဲးဘးန့ၣ် ပကဃ့ပျၢ်ပတၢ်ကမၣ်သ့ဝဲဒၣ်န့ၣ်လီၤ.
တၢ်လူၤပိာ်ထွဲ ကစၢ်ယွၤ အတၢ်ကူၣ်သ့အကျိၤအကျဲန့ၣ် မ့ၢ်တၢ်သူၣ်လီၤပသးလၢ ဟီၣ်ခိၣ်ညၣ်ထ့ၣ်အဂ့ၤန့ၣ်လီၤ. စံး ၁:၆ ပာ်ဖျါဝဲ တၢ်အိၣ်မူဒ်သိးအံၤန့ၣ် ဘၣ်တၢ်ကိးလၢ တၢ်အိၣ်မူအတီအလိၤ, ဒီးယွၤကွၢ်ထွဲအီၤန့ၣ်လီၤ.
