ဒ်ဖိသၣ်တဂၤအသိး, ဖဲပှၤသံကွၢ် ဘဲ(န) (Ben) လၢ “နမ့ၢ်ဒိၣ်ထီၣ် နအဲၣ်ဒိးကဲထီၣ် တၢ်မနုၤလဲၣ်” န့ၣ်ဒီး. ကစံးဆၢဝဲ, “ယအဲၣ်ဒိးကဲထီၣ် ဒ် ဒ့း(ဘ) (Dave) အသိးန့ၣ်လီၤ.” အဝဲအဝဲၢ်ခွါမ့ၢ် ပှၤလိာ်ကွဲတၢ်ဖိတဂၤ, ရ့တံၤရ့သကိးသ့ဝဲ, ဒီးမ့ၢ်ကၠိဖိစဲၣ်နီၤတဂၤန့ၣ်လီၤ. တၢ်လၢအတဒ်သိးလိာ်သးဘၣ်န့ၣ် ဘဲ(န) စံးဝဲ, “တၢ်လိာ်ခိၣ်လိာ်ကွဲတကပၤန့ၣ် ပှၤစူးကါယၤတသ့, ယမဲာ်ဆှးသ့, ဒီးယတမ့ၢ်ပှၤစဲၣ်နီၤ လၢတၢ်မၤလိမၤဒိးအပူၤဘၣ်န့ၣ်လီၤ. ယအဲၣ်ဒိး ရ့လိာ်သးဒီးဒ့း(ဘ) ဘူးဘူးတံၢ်တံၢ်ဘၣ်ဆၣ်, အဝဲတကနၣ်ဃုာ်ယၤဘၣ်. အဝဲ ကိးယၤလၢ ‘ပှၤလီၤကၢၣ်’ တဂၤန့ၣ်လီၤ.”
လၢအတၢ်အိၣ်မူ တၢ်ဆၢကတီၢ်အါတက့ၢ်န့ၣ် ဂုာ်ကျဲးစၢးဃုထံၣ်န့ၢ် အဝဲၢ်ခွါ အတၢ်အဲၣ်ဘၣ်ဆၣ်, ကဲထီၣ်ဝဲဒၣ် တၢ်ကလီကလီန့ၣ်လီၤ. တုၤဒၣ်လဲာ် ဘဲ(န) ကဲထီၣ် ပှၤပိာ် ကစၢ်ယ့ၣ်ရှူးအခံ, ဒီးဃုထံၣ်န့ၢ် တၢ်အိၣ်ဘှံးအိၣ်ကဒုလၢ တၢ်အုၣ်က့ၤခီၣ်က့ၤ ကစၢ်အတၢ်အဲၣ်အပူၤန့ၣ်လီၤ.
၁ မိၤရှ့ ၂၉:၃၂-၃၅ န့ၣ် ပကထံၣ်ဘၣ် စီၤယၤကိာ် အမါအခီၣ်ထံး, လၢအမ့ၢ် နီၢ်လ့ၤအၤ တဂၤ, လၢအတၢ်အိၣ်မူ တၢ်ဆၢကတီၢ်အါတက့ၢ်န့ၣ် ဂုာ်ကျဲးစၢးဃုထံၣ်န့ၢ် အဝၤ အတၢ်အဲၣ်န့ၣ်လီၤ. ဘၣ်ဆၣ်, စီၤယၤကိာ် န့ၣ် အိၣ်စဲဘူးဝဲဒီးနီၢ်ရၤဃ့လးန့ၣ်လီၤ. မ့ၢ်လၢ ကစၢ်ယွၤ ထံၣ် နီၤလ့ၤအၤ အတၢ်ဂ့ၢ်ကီ, ဒီးကတဲာ်ကတီၤန့ၢ် တၢ်လၢအဂီၢ် မ့ၢ်လၢတၢ်တကနာ်ဃုာ်အီၤအဃိန့ၣ်လီၤ. အဆၢဖိ ၃၂ န့ၣ် ကစၢ်ယွၤဆိၣ်ဂ့ၤ နီၢ်လ့ၤအၤ ခီဖျိလၢ ဒုးကဲထီၣ်အီၤ မိၢ်, တၢ်လၤတၢ်ကပီၤဖးဒိၣ် လၢစိၤဆၢကတီၢ်ဖဲန့ၣ်လီၤ. အဆၢဖိ ၃၂-၃၃ ပာ်ဖျါဝဲလၢ နီၢ်လ့ၤအၤ, မါလၢ အဝၤတထံၣ်, ဒီးတနၢ်ဟူဘၣ်တဂၤန့ၣ် ကစၢ်ယွၤ ထံၣ်, ဒီးနၢ်ဟူအီၤ လၢတၢ်အဲၣ်တၢ်ကွံအပူၤန့ၣ်လီၤ. အဝဲဆံးစၢ်န့ၢ် ဖိမုၣ်တဂၤ, ဒီးဖိခွါ ဃုဂၤ, ဒီးလၢအကျါတဂၤန့ၣ် မ့ၢ်ဝဲ စီၤယူၤဒၤ, ကစၢ်ယ့ၣ်ရှူး အပၢ်ဖးဒိၣ်တဂၤန့ၣ်လီၤ. အဆၢဖိ ၃၅ စံးဘၣ်ပှၤ, ဖဲ နီၢ်လ့ၤအၤ အိၣ်ဖျဲၣ်ထီၣ် အဖိခွါန့ၣ် စံးဝဲဒၣ်, “ခဲကနံၣ်အံၤ ယကစံးထီၣ်ပတြၢၤယွၤ” န့ၣ်လီၤ. ၁မိၤ ၄၉:၂၉-၃၂ ပာ်ဖျါဝဲလၢ နီၢ်လ့ၤအၤ အိၣ်မူ အါနံၣ်အါလါ လၢကီၢ်ကနၤဧၣ်အပူၤ, ဒီးဘၣ်တၢ်ခူၣ်လီၤအီၤလၢ စီၤယၤကိာ်အဒူၣ်ဖိ ထၢဖိတဖၣ်အကျါ, လၢအပှဲၤဒီးတၢ်လၤတၢ်ကပီၤန့ၣ်လီၤ.
ဖဲပကွၢ်ဆၢၣ်မဲာ်ဒီးတၢ်တကနၣ်ဃုာ်ပှၤန့ၣ်ဒီး, မ်ပကဃုထံၣ်န့ၢ် တၢ်မၤမုာ်ထီၣ်က့ၤပှၤလၢ နီၢ်လ့ၤအၤ အတၢ်တဲပူအပူၤန့ၣ်တက့ၢ်. ပအိၣ်ဘှံးလၢ ယွၤအတၢ်အဲၣ်, ယွၤလၢ အကတဲာ်ကတီၤ မၤလၢပှဲၤန့ၢ်ဝဲ တၢ်လၢအတအိၣ်ဒီးပှၤတဖၣ်န့ၣ်လီၤ.
