ဖဲ မဲရဒဲး(သ) (Meredith) အတၢ်ဖျီန့ၣ်, အမိၢ်ဖးန့ၢ်အီၤ လံာ်စီဆှံအဆၢ အဃံအလၤတယူၢ်, ဖျါဖဲ ၁ ကရံၣ်သူး အပူၤန့ၣ်လီၤ. လၢလံာ်စီဆှံအပူၤ, ၁ ကရံၣ်သူး ၁၃ အံၤ ဘၣ်တၢ်ကိးအီၤ “တၢ်အဲၣ်အဆၢဒိၣ်” တလီၢ်လီၢ်, ဒီးကြၢးဝဲဘၣ်ဝဲဒိၣ်မးလၢ တၢ်တ့တၢ်ဖျီအမူးအဂီၢ်န့ၣ်လီၤ. အဆၢဖိ ၄ ပာ်ဖျါဝဲ “တၢ်အဲၣ်တၢ်ကွံ ဝံသးစူၤတၢ်ဃဲးဃဲး, ဒီးမၤဂ့ၤတၢ်, တၢ်အဲၣ်တၢ်ကွံ တသးကါဘၣ်တၢ်ဘၣ်, တပာ်ဘၣ်အသး ကဖၢလၢဘၣ်, တပာ်ထီၣ်ထီဘၣ်အသးဘၣ်” န့ၣ်လီၤ. ယကနာ်, ဒီးယဆိကမိၣ်ထီၣ်ယဲလၢ ဒ်သိးတၢ်မၢဖိ စီၤပီလူး ကပာ်ဖျါထီၣ်ဝဲ တၢ်အဲၣ်အဂ့ၢ်အံၤအဂီၢ်, တၢ်လၢအထိၣ်ဟူးထိၣ်ဂဲၤထီၣ်အီၤန့ၣ် ကမ့ၢ်တၢ်မနုၤလဲၣ်န့ၣ် ခ့ခါအဆၢကတီၢ်, တလးမူးပိာ်မုၣ်ဒီးပိာ်ခွါတဖၣ် ဘၣ်ကသ့ၣ်ညါဝဲဒၣ်ဧၣ်န့ၣ်လီၤ. စီၤပီလူး တကွဲးဝဲဒၣ် တၢ်အဲၣ်အထါဘၣ်. တၢ်မၢဖိ ကွဲးဃ့ကညးဝဲ တၢ်အိၣ်ဖှိၣ်လၢအလီၤဖးတဖု ဒ်သိးကမၤဂ့ၤထီၣ်က့ၤ တၢ်လီၤမုၢ်လီၤဖးဒိၣ်ဒိၣ်မုၢ်မုၢ်အဂီၢ်န့ၣ်လီၤ.
ယွၤဂ့ၢ်ပီညါ အပှၤကူၣ်သ့ ဒီးကလး အ့ၣ် ခဲမ်ဘဲ (Douglas A. Compbell) စံးဝဲဒၣ် ကရံၣ်သူးအတၢ်အိၣ်ဖှိၣ်န့ၣ် မ့ၢ်ဒၣ် “တပှီၢ်, တၢ်ဘၣ်အၢဘၣ်သီ” အလီၢ်အကျဲ န့ၣ်လီၤ. တၢ်လီၤသးဒိၣ်ကဲၤထီၣ်အတၢ်မၤတဖၣ်, လၢအမ့ၢ်, တၢ်မၤကမၣ်မုၣ်ကမၣ်ခွါလၢ ဖံးဘူးညၣ်တံၢ်ကဒဲကဒဲ, တၢ်ဆါလီၤအီၣ်နီၢ်ခိတၢ်မၤ, တၢ်သးကါလိာ်သးကဒဲကဒဲ လၢခိၣ်နၢ်တဖၣ်အကျါန့ၣ်လီၤ. တၢ်လိာ်ဘၣ်လိာ်ကွီၢ်လၢ တၢ်အိၣ်ဖှိၣ်ဖိကဒဲကဒဲန့ၣ် မ့ၢ်တၢ်ညီနုာ်မၤအသးန့ၣ်လီၤ. လံာ် ၁ ကရံၣ် ၁၄ ပာ်ဖျါဝဲလၢ တၢ်ဘူၣ်တၢ်ဘါအကတီၢ်စ့ၢ်ကီး မ့ၢ်တၢ်သဘံၣ်ဘုၣ်, ပှၤပြၢလိာ်သးလၢ ကကတိၤဆိတၢ်ဒီးပျ့ၤအကျိာ်, တၢ်ကတိၤတၢ်လၢဝံအကျိာ် ဒ်သိးပှၤအဂုၤအဂၤတဖၣ် ကဆိကမိၣ်ဒိၣ်အဝဲသ့ၣ်အဂီၢ် န့ၣ်လီၤ.
ခဲမ်ဘဲ စံးဝဲဒၣ်လၢ တၢ်သဘံၣ်ဘုၣ်ဒ်သိးအံၤတဖၣ်န့ၣ် မ့ၢ်တၢ်လီၤတူာ်လီၤကာ် အဂံၢ်ခီၣ်ထံး ဘၣ်ထွဲဒီးပှၤတဂၤဘၣ်တဂၤ ကအဲၣ်လိာ်သးအဂီၢ်န့ၣ်လီၤ. ဒ်သိးကဒုးနဲၣ်ဝဲကျိၤကျဲအဂ့ၤကတၢၢ်အဂီၢ်, ၁ ကရံၣ် ၁၃:၈ အပူၤန့ၣ် စီၤပီလူးစံၣ်တဲၤတဲလီၤဝဲ တၢ်အဲၣ်တၢ်ကွံအဂ့ၢ်, ဒီးစံးဝဲဒၣ်, “တၢ်အဲၣ်တၢ်ကွံန့ၣ်, တလီၤတူာ်လီၤကာ်ဘၣ်. မ့မ့ၢ်တၢ်ကတိၤလၢဝံအကျိာ်ကပူၤကွံာ်, ပျ့ၤတဖၣ်ကဆိတ့ၢ်ဝဲ, ဒီးတၢ်သ့ၣ်ညါကပူၤကွံာ်” န့ၣ်လီၤ.
စီၤပီလူး အတၢ်မၤသ့ၣ်နီၣ်ထီၣ် တၢ်အဲၣ်တၢ်ကွံအဂ့ၢ်အံၤ ကကဲထီၣ် တၢ်န့ၢ်ဂံၢ်မ့ၢ်ဘါနီၢ်နီၢ်လၢ တၢ်တ့တၢ်ဖျီအမူးအဂီၢ်န့ၣ်လီၤ. ဒ်သိးပကအိၣ်မူပာ်ဖျါထီၣ် တၢ်အဲၣ်တၢ်ကွံ, ဒီးတၢ်သူၣ်ကညီၤသးကညီၤအဂီၢ်, စီၤပီလူး အတၢ်မၤသ့ၣ်နီၣ်ထီၣ် တၢ်အဲၣ်တၢ်ကွံအဂ့ၢ်တဖၣ်န့ၣ် မ်အကကဲထီၣ် တၢ်ဟ့ၣ်သဆၣ်ထီၣ်ပဝဲခဲလၢာ်န့ၣ်တက့ၢ်.
