ဖဲ ကၠိနံၣ် (Joanie) ကတိၤတၢ်ဒီးအတံၤသကိးန့ၣ်ဒီး, “ဘၣ်တဘျီဘျီန့ၣ် ယသးကလၢၢ်ဘၣ်ဝဲဒ်တၢ်လဲၤကပာ်ကွၢ်ကပာ်ဘၣ်ယၤန့ၣ်လီၤ.” တၢ်ကတိၤအံၤ အိၣ်ဟဲဟးထီၣ်လၢအထးခိၣ်န့ၣ်လီၤ. လၢပိာ်မုၣ်အဂၤတဂၤအဃိ, အဝၤပာ်တ့ၢ် ကၠိနံၣ်ဒီးအဖိဆံးဖိတဖၣ်န့ၣ်လီၤ. အဝဲပာ်ဖျါထီၣ်လၢ “ယဟ့ၣ်တ့ၢ်အီၤ ယနံၣ်အဂ့ၤကတၢၢ်တဖၣ်န့ၣ်လီၤ. ဘၣ်ဆၣ်, ခဲကနံၣ်အံၤ, မ့ၢ်မတၤတဂၤ ကထံၣ်န့ၢ်ယၤ မ့တမ့ၢ် မ့ၢ်မတၤတဂၤ ကဟံးန့ၢ်တၢ်ဆၢကတီၢ်ဒီးဃုသ့ၣ်ညါယၤလဲၣ်န့ၣ် ယတသ့ၣ်ညါလၢၤဘၣ်န့ၣ်လီၤ.”
အတံၤသကိးစံးဆၢက့ၤအီၤလၢ “ယသးတမုာ်ဘၣ်” န့ၣ်လီၤ. “ဖဲယသးအိၣ် ၆ နံၣ်န့ၣ်, ယပၢ်ဟးထီၣ်လၢဟံၣ်, ဒီးကဲထီၣ်တၢ်ဂ့ၢ်ကီလၢပဂီၢ်, လီၤဆီဒၣ်တၢ် လၢယမိၢ်အဂီၢ်န့ၣ်လီၤ. ဘၣ်ဆၣ်, ဖဲယမိၢ်မၤမံယၤလၢ မုၢ်နၤအကတီၢ်န့ၣ်, အဝဲတဲဘၣ်ယၤ တၢ်ကတိၤဖိလၢ ယတသးပ့ၤနီၣ်ဝဲနီတဘျီ, လၢအမ့ၢ် “ကစၢ်ယွၤ တပာ်တဒၢအမဲာ်နီတဘျီဘၣ်” န့ၣ်လီၤ. ဖဲယဒိၣ်ထီၣ်န့ၣ်ဒီး, ယမိၢ်တဲနၢ်ပၢၢ်ယၤလၢ မ့ၢ်လၢအဝဲအဲၣ်ဒိးသိၣ်လိယၤ, ဖဲယမံၤအကတီၢ်ဒၣ်လဲၣ် ထီဘိန့ၣ် ကစၢ်ယွၤအဲၣ်ယၤ, ဒီးအံးထွဲကွၢ်ထွဲယၤအဂ့ၢ်န့ၣ်လီၤ.”
လံာ်စီဆှံ ပာ်ဖျါထီၣ် တၢ်ကတိၤလၢ ကစၢ်ယွၤ ဟ့ၣ်လီၤဝဲ စီၤမိၤရှ့, ဒ်သိးကဟ့ၣ်ခီလီၤဝဲ အပှၤဂီၢ်မုၢ်တဖၣ်, ဖဲအဟးဝ့ၢ်ဝီၤလၢ ကစၢၢ်စံာ်နၤ အပှၢ်မုၢ်ကနၢ တၢ်ကီတၢ်ခဲအကတီၢ်န့ၣ်လီၤ. ၄ မိၤ ၆:၂၄-၂၆ စံးဘၣ်ပှၤ, “မ်ယွၤဆိၣ်ဂ့ၤနၤ, ဒီးကွၢ်က့ၤနၤတက့ၢ်. မ်ယွၤဒုးကပီၤထီၣ်နၤလၢ အမဲာ်, ဒီးဒုးဘၣ်နၤလၢ အဘျုးအဖှိၣ်တက့ၢ်. မ်ယွၤပာ်ထီၣ်အမဲာ်လၢနလိၤ, ဒီးဟ့ၣ်လီၤနၤလၢ တၢ်ဃူတၢ်ဖိးတက့ၢ်” န့ၣ်လီၤ. ပှၤလုၢ်တၢ်အဒိၣ်တဖၣ် ကဘၣ်စံးကတိၤလီၤ တၢ်ဆိၣ်ဂ့ၤအံၤဆူ ယွၤအပှၤဂီၢ်မုၢ်တဖၣ်အအိၣ်န့ၣ်လီၤ.
လၢပတၢ်အိၣ်မူ အပှၢ်မုၢ်ကနၢတဖၣ်အပူၤ- တၢ်လီၢ်တၢ်ကျဲတဖၣ်လၢ ပဘၣ်လဲၤခီဖျိဝဲတဖၣ်န့ၣ် ပအဲၣ်ဒိးသ့ၣ်ညါဝဲလၢ မ့ၢ်ပှၤတဂၤဂၤ ကထံၣ်န့ၢ်ပှၤ, မ့တမ့ၢ် ပကသ့ၣ်ညါနၢ်ပၢၢ်ဝဲ ကစၢ်ယွၤအတၢ်တီတၢ်လိၤ နီၢ်နီၢ်ဧၣ်န့ၣ်လီၤ. ခီဖျိလၢပတူၢ်ဘၣ်ခီၣ်ဘၣ် တၢ်နးတၢ်ဖှီၣ်တဖၣ်အဃိ, ပသးတကလၢၢ်ဘၣ်ဝဲယွၤဒၣ်လဲာ်, ကစၢ်ယွၤအတၢ်ကွၢ်မဲာ်ပှၤ- အမဲာ်လၢအကပီၤဝဲဒီး အတၢ်အဲၣ်, လၢအအိၣ်စံာ်အိၣ်ကျၢၤအံၤ ကလီၤဘၣ်ဝဲဆူ ပှၤလၢအအဲၣ်အီၤတဖၣ်အလိၤ ထီဘိန့ၣ်လီၤ. ကစၢ်ယွၤ တလဲၤကပာ်, ကွၢ်ကပာ်ပှၤ နီတဂၤဘၣ်န့ၣ်လီၤ.
