ဖဲမုၢ်ဃ့ၢ်လီၤအကတီၢ်န့ၣ် ဖဲးထံၣ် (Patty) မၤလၢာ် အတၢ်ဆၢကတီၢ်လၢ တၢ်လဲၤတခွဲညၣ် ဖဲလီၢ်ကဝီၤ ထံကျိကၢၢ်နံၤန့ၣ်လီၤ. အတခွဲဘိ တခွဲအကနၢ်လိၤန့ၣ် ဘျးထီၣ်ဝဲညၣ်အဆၣ်ဒီးတ့ၢ်လီၤဝဲလၢထံကျါန့ၣ်လီၤ. အဝဲသုးလီၢ်သုးကျဲဆူ လီၢ်ကဝီၤအံၤန့ၣ် တယံာ်ဒံးဘၣ်အဃိ, တၢ်လၢကဒိးန့ၢ်ဝဲ ညၣ်အလီၢ်န့ၣ်, ဆၢမုၢ်လၢ်ဝဲလၢ ကဒိးန့ၢ် တံၤသကိးအသီတဖၣ်န့ၣ်လီၤ. အတခွဲအဆၣ်န့ၣ် တမ့ၢ်ဝဲ ထိးကလဲာ်, မ့တမ့ၢ် ညၣ်အဆၣ်အဂုၤအဂၤတဖၣ် န့ၣ်ဘၣ်. အဝဲစူးကါ အတခွဲဘိဖးဒိၣ်လၢ တၢ်ဟ့ၣ်ခီဟ့ၣ်နီၤ ကိၣ်ခိးကံၤ (Cookies)အထၢၣ်ဖိတဖၣ်ဆူ ပှၤတဖၣ်လၢ အလဲၤဟးဒိးထိလၢ ထံကျိပူၤ, ဖဲမုၢ်ဆါတၢ်ကိၢ်အကတီၢ်န့ၣ်လီၤ. လၢတၢ်ရ့တံၤရ့သကိးဒီးပှၤအိၣ်ဆိးလၢ အဟံၣ်ခိၣ်ဟံၣ်ဃၢၤတဖၣ်အဂီၢ်န့ၣ်, အဝဲစူးကါဝဲဒၣ် ကျိၤကျဲလီၤဆီဒ်သိးအံၤဆူ ပှၤလၢအသးခုဟံးန့ၢ် ကိၣ်ဆၢဖိတဖၣ်အံၤ န့ၣ်လီၤ.

ဖဲးထံၣ် (Patty) “လဲၤတခွဲန့ၢ် တံၤသကိးတဖၣ်” အံၤ ဖျါဝဲလိၤဒိၣ်န့ၢ်ဒံး ကစၢ်ယ့ၣ်ရှူး ကိးဝဲဒၣ် စီၤပ့းတရူးဒီးစီၤအၣ်ဒရ့း ဒ်သိးအကပိာ်ကစၢ်အခံ သးသမူဒီစိၤအဂီၢ်န့ၣ်လီၤ. ပှၤဒီပုၢ်ဝဲၢ်ခွါခံဂၤအံၤ မ့ၢ်ပှၤဖီၣ်ညၣ်တဖၣ်လၢစၤ, လၢပီၣ်လဲၣ်ကၤလံၤလါ, မ့ၢ်ပှၤလၢအကျဲးစၢးမၤတၢ်ဆူၣ်ဆူၣ်န့ၣ်လီၤ. ဖဲအဝဲသ့ၣ်တ့ၢ်လီၤစၤအကတီၢ်န့ၣ်, ကစၢ်ယ့ၣ်ရှူး နုာ်လီၤမၤတံာ်တာ် အတၢ်ဖံးတၢ်မၤ, ခီဖျိလၢကိးန့ၢ် အဝဲသ့ၣ် ဒ်သိးကပိာ်အခံ, ဒီး မး ၄:၁၉ အပူၤန့ၣ် စံးဝဲဒၣ်, လၢတၢ်ဖီၣ်ညၣ်အလီၢ်န့ၣ် “ယကပာ်သုလၢပှၤမၤညၣ်ပှၤကညီလီၤ” န့ၣ်လီၤ. ဒ်န့ၣ်အသိး, ကစၢ်ယ့ၣ်ရှူးကွဲမုာ်ဝဲဒၣ် ပှၤဒီပုၢ်ဝဲၢ်ခွါခံဂၤ, လၢအမ့ၢ် စီၤယၤကိာ်ဒီးစီၤယိၤဟၣ်န့ၣ်လီၤ. အဝဲသ့ၣ်တဖၣ်န့ၣ် ပာ်လီၤတဲာ်တ့ၢ်အစၤတဖၣ်, ဒီးလူၤပိာ် ကစၢ်ယ့ၣ်ရှူးအခံကိးဂၤဒဲးန့ၣ်လီၤ.

ဒ်ပှၤမၤညၣ်တဖၣ်လၢ အကဲထီၣ် ကစၢ်ယ့ၣ်ရှူး အပျဲၢ်အဘီၣ် အဆိကတၢၢ်တဖၣ် အသိးန့ၣ်, ဒ်သိးပကပိာ်အခံ, ဒီးပညိၣ်ကွၢ်စူၢ်တၢ်တပယူၢ်ဃီဆူ တၢ်မူအထူအယိာ်အဂီၢ်, ကစၢ်ခရံာ် ကွဲမုာ်ဝဲဒၣ်ပှၤန့ၣ်လီၤ. ကိးသကိး ပှၤဂုၤပှၤဂၤလၢ အဘၣ်သဃိၣ်ဒီးပှၤ ဒ်သိးကမုာ်လၤလၢ တၢ်လီၤထူလီၤယိာ်တဖၣ်န့ၣ်တက့ၢ်. တၢ်လၢအလီၤသးမံၤနီၢ်နီၢ်-ဒ် ယိၤ ၄:၁၃-၁၄ ပာ်ဖျါဝဲ အသိး, တၢ်အိၣ်မူအိၣ်ဂဲၤလၢကစၢ်ယ့ၣ်ရှူးပူၤန့ၣ် မ့ၢ်တၢ်မုၢ်လၢ်အဂၢၢ်အကျၢၤလီၤန့ၣ်, ပဟ့ၣ်ခီဟ့ၣ်နီၤလီၤဆူ ပှၤအိၣ်ဆိးလၢ ပခိၣ်ပဃၢၤတဖၣ်အအိၣ်သ့ဝဲဒၣ်န့ၣ်လီၤ.