နထွံၣ်မီၤတၢ်န့ၣ် နမ့ၢ်နၢ်ပၢၢ်ဝဲန့ၣ်ဒီး, တၢ်ကမၤအသးဒ်လဲၣ်. ဒ်သိးကကဲထီၣ် တၢ်မၤစၢၤလၢ တၢ်ဃုသ့ၣ်ညါ ထွံၣ်တဖၣ်မီၤတၢ်အကတီၢ် အဝဲသ့ၣ်အသးပူၤကလၢၢ်ဘၣ်တၢ်မနုၤလဲၣ်အဂီၢ်န့ၣ်, “စဲအ့ၣ်” အတၢ်သ့တၢ်ဘၣ်အသီ စူးကါဝဲ တၢ်ပာ်ပနီၣ် “ထွံၣ်မီၤတၢ်” န့ၣ်လီၤ. ထွံၣ်အကိာ်ကွီၤ (collars) လၢအအိၣ်ဒီးတၢ်သ့တၢ်ဘၣ် အပတီၢ်ထီတဖၣ်န့ၣ် ကျိာ်ထံဝဲဒၣ် ထွံၣ်မီၤတၢ်အကလုၢ် အါန့ၢ်အဘျီတကထိ ဒ်သိးကနီၤဖးဃုသ့ၣ်ညါ ထွံၣ်အသးဟူးဂဲၤလၢ အပာ်ဖျါထီၣ်ဝဲန့ၣ်လီၤ. ထွံၣ်အကိာ်ကွီၤ လၢအအိၣ်ဒီးတၢ်သ့တၢ်ဘၣ်အပတီၢ်ထီတဖၣ်အံၤန့ၣ်, ကျိာ်ထံပာ်ဖျါထီၣ် တၢ်ကတိၤအဖျၢၣ် တန့ၢ်ဝဲဘၣ်ဆၣ်, မၤစၢၤအါထီၣ် တၢ်နၢ်ပၢၢ်လိာ်သးကဒဲကဒဲလၢ ထွံၣ်ဒီးပှၤလၢအဘုၣ်ထွံၣ်ဖိ အဘၢၣ်စၢၤန့ၣ်လီၤ.
ဒ်သိး စီၤဘံးလၣ် ကပလီၢ်ပဒီအသးအဂီၢ်, ကစၢ်ယွၤ စူးကါဆၣ်ဖိကီၢ်ဖိစ့ၢ်ကီး န့ၣ်လီၤ. စီၤဘံးလၣ် ဂီၤကၢ် (ဒိးထီၣ်) အကသ့ၣ်ယီၤ, ဒီးလဲၤဝဲဆူ ကီၢ် “မိအး” လၢ တၢ်စံးဆၢ ကစၢ်ယွၤ အတၢ်မၢလီၤအီၤအဂ့ၢ်န့ၣ်, ဖျါဖဲ ၄ မိၤ ၂၂:၂၀ အပူၤ, “ဂဲၤဆၢထၢၣ်ဒီးလဲၤဒီးအီၤတက့ၢ်, ဘၣ်ဆၣ်ဒီးတၢ်ကတိၤလၢ ယကကတိၤတၢ်ဒီးနၤန့ၣ်, နဘၣ်မၤ” န့ၣ်လီၤ. အဆၢဖိ ၂၃ ပာ်ဖျါဝဲ ဖဲကသ့ၣ်ယီၤထံၣ်ဝဲဒၣ် ယွၤအကလူးတဂၤ “ဆၢထၢၣ်ဒီးအနးဘီၣ်ထီၣ်အသးလၢအစုပူၤန့ၣ်ဒီး, တလဲၤတၢ်ဆူညါလၢၤဘၣ်. မ့မ့ၢ် စီၤဘံးလၣ်န့ၣ် တထံၣ်ဝဲကလူးန့ၣ်ဘၣ်. ဒ်သိးကသ့ၣ်ယီၤ ကလဲၤဝဲဆူညါအဂီၢ်, စီၤဘံးလၣ် တီၢ်ကသ့ၣ်ယီၤ, ဒီးကစၢ်ယွၤ အဲးထီၣ် ကသ့ၣ်ယီၤအထးခိၣ်, ဒ်သိးကစံးကတိၤထီၣ်တၢ်အဂီၢ်န့ၣ်လီၤ. အဆၢဖိ ၃၁ စံးဘၣ်ပှၤ, “ဒီးယွၤအိးထီၣ် စီၤဘံးလၣ် အမဲာ်,” ဒီးထံၣ်ဝဲဒၣ် တၢ်လၢအလီၤပျံၤလီၤဖုး, “ဒီးဆုးလီၤအခိၣ်, ဒီးထိၣ်လီၤပှီၤအသး” န့ၣ်လီၤ. ဒီးစီၤဘံးလၣ် အၢၣ်လီၤဝဲဒၣ် အတၢ်ပညိၣ်လၢ အထီဒါကစၢ်ယွၤ အတၢ်ကတိၤ, လၢကဟံးန့ၢ်ခိၣ်ဖး (မ့တမ့ၢ်) ကဆိၣ်အၢ ယွၤအပှၤဂီၢ်မုၢ်အဂ့ၢ်န့ၣ်, ဖျါဖဲ အဆၢဖိ ၁၅-၁၈, ဒီး ၃၇-၃၈ အပူၤန့ၣ်လီၤ. အဆၢဖိ ၃၄ န့ၣ် စီၤဘံးလၣ် စံးဝဲဒၣ်, “ယမၤလံတၢ်ဒဲးဘးလံ, အဂ့ၢ်ဒ်အံၤ,ယတသ့ၣ်ညါဘၣ်လၢ နဆၢထၢၣ်ထီဒါယၤလၢကျဲပူၤဘၣ်” န့ၣ်လီၤ.
ယွၤအတၢ်သိၣ်လိနဲၣ်လီၤပှၤလၢ လံာ်စီဆှံအပူၤတဖၣ်, ခီဖျိလၢသးစီဆှံ အတၢ်နဲၣ်ကျဲ, ဒီးပှၤဂုၤပှၤဂၤ အတၢ်ဟ့ၣ်ကူၣ်တဖၣ်န့ၣ်, မ်ပကဒိကနၣ်ကိးထံၣ်အဂီၢ် တမ့ၢ်အဖျါထဲလၢ နီၢ်ခိဧိၤဘၣ်, မ့မ့ၢ်လၢ ပနီၢ်သးအပူၤစ့ၢ်ကီးန့ၣ်တက့ၢ်.
