ဖဲယလံၤဖိတဖၣ် ကွၢ်ဝဲ ယတီၤထီကၠိ တနံၣ်တဘျီအလံာ်, ဒီးလၢတၢ်ကမၢကမၣ်အပူၤန့ၣ် ထံၣ်ဝဲဒၣ် တချုးလၢခ့ခါအစိၤ ပှၤအခိၣ်သူက့ၢ်ဂီၤ, အတၢ်ကူတၢ်သိး, ဒီး “စိၤလၢအပူၤကွံာ် သိလ့ၣ်တဖၣ်” န့ၣ်လီၤ. မ့မ့ၢ် ယထံၣ်ယဲတၢ်လၢအလီၤဆီတဖၣ်, အဆိကတၢၢ်န့ၣ်, ယထံၣ်ယတံၤသကိးတံၢ်နီၢ်လၢ ပသ့ၣ်ညါလိာ်ပသးအါနံၣ်အါလါတဖၣ် အတၢ်နံၤကမှံ, တနီၤန့ၣ် ပမ့ၢ်ဒံးဝဲဒၣ် တံၤသကိးအဖၢမုၢ်န့ၣ်လီၤ. ဘၣ်ဆၣ်, အါန့ၢ်အန့ၣ်, ယထံၣ်ဘၣ် ကစၢ်ယွၤအစိကမီၤလၢ အဟံးဃာ်ပၢၤဃာ်တၢ်န့ၣ်လီၤ. ဒ်သိးယကဘၣ်လိာ်ဘၣ်စးဒီးကၠိတဖျၢၣ်အံၤအဂီၢ်, ယဘၣ်ဂုာ်ဂဲၤလိာ်ဝဲအကတီၢ်, ယွၤအတၢ်အိၣ်ဒီးယၤအမုာ်အလၤန့ၣ် အိၣ်ဝးတရံးယၤ န့ၣ်လီၤ. ယွၤအတၢ်ဂ့ၤတၢ်ဝါလၢ အဟံးဃာ်ပၢၤဃာ်ဝဲန့ၣ် အံးထွဲကွၢ်ထွဲယၤ- ယွၤအတၢ်သူၣ်ကညီၤသးကညီၤန့ၣ် ဟ့ၣ်လီၤဝဲဆူ ကယဲၢ်ပှၤလၢအဃုထံၣ်အီၤခဲလၢာ်တဖၣ်န့ၣ်လီၤ.

စီၤဒၤနံးယ့လး သ့ၣ်ညါဝဲလၢ ယွၤအိၣ်ဒီးအီၤတဘိယူၢ်ဃီန့ၣ်လီၤ. ဖဲအဘၣ်အိၣ်မူအိၣ်ဂဲၤဝဲလၢ ဘၤဘူလိၣ် တၢ်စိာ်မၢကဲကုၢ်အကတီၢ်, ဒၤ ၆:၇-၉ န့ၣ်, စီၤပၤ ဟ့ၣ်လီၤအကလုၢ်တြီဃာ်တၢ်လၢ အတဘၣ်မၤတဂ့ၤန့ၣ်, အဆၢဖိ ၁၀ စံးဘၣ်ပှၤလၢ အဝဲ ဃ့ထုကဖၣ်တၢ်လၢ “အဒၢးထီၣ်ထီတတီၤ ဖျိထီၣ်ဝဲဆူ ယရူၤရှလ့ၣ်တခီ” န့ၣ်လီၤ. လၢအတၢ်ထုကဖၣ် အဒိၣ်အထီအပူၤန့ၣ်, စီၤဒၤနံးယ့လး သ့ၣ်နီၣ်ထီၣ်က့ၤဝဲလၢ ယွၤအတၢ်အိၣ်ဒီးအီၤထီဘိန့ၣ် ဟံးဃာ်ပၢၤဃာ်အီၤ, ယွၤဒိကနၣ်, ဒီးစံးဆၢအတၢ်ထုကဖၣ်တဖၣ်န့ၣ်လီၤ. လၢတၢ်န့ၣ်အဃိ, ကစၢ်ယွၤ ကဒိကနၣ်အီၤ, ကစံးဆၢအီၤ, ဒီးကဟံးဃာ်ပၢၤဃာ်ကဒီးအီၤန့ၣ်လီၤ.

တၢ်သိၣ်တၢ်သီအသီ မ့ၢ်အိၣ်ထီၣ်ဝဲဒီး ကယဲၢ်တၢ်ကမၤအသးဒီးအီၤတမံၤဂ့ၤတမံၤဂ့ၤ, စီၤဒၤနံးယ့လး ကဃုထံၣ်န့ၢ် ယွၤအတၢ်အိၣ်ဒီးအီၤန့ၣ်လီၤ. လၢတၢ်န့ၣ်အဃိ, ဒ် အဆၢဖိ ၁၀ ပာ်ဖျါဝဲ, ဒီးဒ်အမၤတ့ၢ်လံဝဲ အဘျီတဖၣ်အဘျီ လၢအပူၤကွံာ်အသိး, အဝဲဃ့ထုကဖၣ်တၢ်န့ၣ်လီၤ. အဆၢဖိ ၂၂ စံးဘၣ်ပှၤ, ဖဲအအိၣ်ဝဲလၢ ခ့ယုၢ်အပူၤအကတီၢ်, ယွၤအကလူးတဂၤန့ၣ်အိၣ်ခိးကွၢ်ထွဲအီၤ, ဒီးကစၢ်ယွၤ လၢအတီဝဲလိၤဝဲတဂၤန့ၣ် မၤပူၤမၤဖျဲးအီၤန့ၣ်လီၤ.

ဖဲတၢ်မၤကွၢ်တဖၣ်လၢ အလီၤဘၣ်ပှၤလၢ ခ့ခါအကတီၢ်န့ၣ်, ပမ့ၢ်ကွၢ်ကဒါက့ၤ မုၢ်နံၤလၢ အပူၤကွံာ်တဖၣ်န့ၣ်ဒီး, ကကဲထီၣ်တၢ်မၤစၢၤလၢ ပကသ့ၣ်နီၣ်ထီၣ်က့ၤ ကစၢ်ယွၤအတၢ်တီတၢ်လိၤအဂီၢ်န့ၣ်လီၤ. အဆၢဖိ ၂၇ န့ၣ်, စီၤပၤဒၤရယါဝ့ၣ် ဒၣ်လဲာ် ပာ်ဖျါထီၣ် ကစၢ်ယွၤလၢ, “အဝဲဒၣ်န့ၣ် အုၣ်က့ၤခီၣ်က့ၤတၢ်, ဒီးမၤပူၤမၤဖျဲးတၢ်, ဒီးမၤတၢ်ပနီၣ်လီၤလး, ဒီးတၢ်လီၤလိၢ်လီၤလးလၢမူခိၣ်, ဒီးလၢဟီၣ်ခိၣ်ချၢ…” န့ၣ်လီၤ. ခါလၢအပူၤကွံာ်န့ၣ် ကစၢ်ယွၤဂ့ၤတ့ၢ်ဝဲ, ဒီးခဲကနံၣ်အံၤစ့ၢ်ကီး ကစၢ်ယွၤဂ့ၤဝဲဒၣ်န့ၣ်လီၤ. ကစၢ်ယွၤ အတၢ်အိၣ်ဒီးနၤန့ၣ် ကဟံးဃာ်ပၢၤဃာ်နၤန့ၣ်လီၤ.