တၢ်ဘၣ်ယသးမုာ်ဒိၣ်မးလၢ နွံကတၢၢ်အနံၤသဘျ့ ဖဲဝ့ၢ် နယူအီၣ်လ့ (New Orleans) န့ၣ်လီၤ. ဘၣ်ဖဲ ပှၤရဲၣ်လီၤဟးလၢကျဲလိၤ, ဃုာ်ဒီးတၢ်အူပံအူကွဲၤ, ဒီးတၢ်ကယၢကယဲဃာ် သိလ့ၣ်တဖၣ်, ဒီးယလဲၤဟးကွၢ်ကီ ထံကီၢ်အဟီၣ်ခိၣ်ဒီဘ့ၣ် တၢ်ဒုးခံဘျီတဘျီ အတၢ်ဒုးနဲၣ်ဒၢး, ဒီးအီၣ်ကွၢ် တကံၣ်ကုအကၣ်န့ၣ်လီၤ. ဘၣ်ဆၣ် ဖဲယမံလီၤလၢ ယတံၤသကိးအဒၢးအိၣ်ကလီအပူၤန့ၣ်ဒီး, ယသးသယုၢ်ဘၣ် ယမါဒီးယဖိတဖၣ်န့ၣ်လီၤ. ခွဲးယာ်လၢယဘၣ်လဲၤစံၣ်တဲၤတဲလီၤတၢ်လၢ ဝ့ၢ်ဖးဒိၣ်အဂၤတဖၣ်န့ၣ် ယသးခုဘၣ်ဆၣ်, တၢ်လၢယမုာ်လၤသးခုဝဲအဒိၣ်ကတၢၢ်န့ၣ် မ့ၢ်ဒၣ်တၢ်အိၣ်ဆိးလၢ ယဟံၣ်ယဃီဒၣ်ယဲန့ၣ်လီၤ.

ကစၢ်ယ့ၣ်ရှူးအတၢ်အိၣ်မူအပူၤ, တၢ်လၢပတပာ်သူၣ်ပာ်သးဘၣ်ဝဲ တလီၢ်လီၢ်န့ၣ် မ့ၢ်ဒၣ် ကစၢ်ယ့ၣ်ရှူးအတၢ်အိၣ်အသး, မၤအသးလၢ အကါဒိၣ်ကတၢၢ်တဖၣ်လၢတၢ်လဲၤတၢ်က့ၤအကျဲခိၣ်န့ၣ်လီၤ. ယွၤအဖိခွါဟဲလီၤဆူ ဟီၣ်ခိၣ်ချၢ ဖဲဝ့ၢ်ဘ့ၤသလ့ဃ့ၣ်, ဝ့ၢ်တဖျၢၣ်လၢ အအိၣ်ယံၤဒီးအဟံၣ်လၢမူခိၣ်, လၢတၢ်ထိၣ်ဒွးအယံၤတန့ၢ်, အိၣ်ယံၤဃုာ်ဒီး အဒူၣ်ဖိထၢဖိအဝ့ၢ်, ဝ့ၢ်နစၤရ့းန့ၣ်လီၤ. မ့ၢ်လၢတၢ်ဃုသ့ၣ်ညါ ထံဖိကီၢ်ဖိအနီၣ်ဂံၢ်အကတီၢ်, ဒီးဝ့ၢ်ဘ့ၤသလ့ဃ့ၣ်န့ၣ် အိၣ်ပှဲၤလုၢ်ကွံာ်ဝဲဒီး ဟံၣ်ဖိဃီဖိဒူၣ်ဖိထၢဖိ လီၢ်ယံၤလီၢ်ဘူးတဖၣ်န့ၣ်လီၤ. လၢတၢ်န့ၣ်အဃိ, ဖဲ လူၤ ၂:၇ အပူၤန့ၣ် စီၤလူၤကၣ် စံးဝဲဒၣ်လၢ “ဒၢးလၢတၢ်ပာ်အီၤကလီ” (Katalyma) မ့တမ့ၢ် “သမှံၤအဒၢး” ဒၣ်လဲာ်တအိၣ်လီၤဟိလၢၤဘၣ်န့ၣ်လီၤ.

ဖဲကစၢ်ယ့ၣ်ရှူး အိၣ်ဖျဲၣ်ထီၣ်အကတီၢ်, တၢ်တအိၣ်ဝဲတမံၤန့ၣ် အိၣ်ထီၣ်ဝဲ ဖဲအကသံအကတီၢ်န့ၣ်လီၤ. လူၤ ၂၂:၁၀-၁၂ စံးဘၣ်ပှၤ, ဖဲကစၢ်ယ့ၣ်ရှူးဒီးအပျဲၢ်အဘီၣ် တဖၣ်လဲၤဆူ ဝ့ၢ်ယရူၤရှလ့ၣ်အဆၢကတီၢ်န့ၣ်, မၢဝဲဒၣ် စီၤပ့းတရူးဒီးစီၤယိၤဟၣ်လၢကလဲၤကတဲာ်ကတီၤဘူၣ်လဲၤကပာ်ဟါတၢ်အီၣ်အဂီၢ်န့ၣ်လီၤ. အဝဲသ့ၣ် ကဘၣ်လဲၤပိာ် ပှၤစိာ်သပၢၤထံတဂၤအခံ ဆူအဟံၣ်, ဒီးဃ့န့ၢ်ဟံၣ်ကစၢ်လၢ သမှံၤအဒၢး, ဖဲကစၢ်ယ့ၣ်ရှူးခရံာ်ဒီးအပျဲၢ်အဘီၣ်တဖၣ် ကအီၣ်ဝဲ “ဟါတၢ်အီၣ်လၢခံကတၢၢ်” အဂီၢ်န့ၣ်လီၤ. အဆၢဖိ ၁၇-၂၀ ပာ်ဖျါဝဲ ဖဲတၢ်လီၢ်ဒၢးဖိအံၤ, လၢအဘၣ်တၢ်ဃ့လိၢ်ပာ်ဝဲအလီၢ်န့ၣ်, ကစၢ်ယ့ၣ်ရှူး ဒုးအိၣ်ထီၣ် တၢ်လၢပှၤကိး “တၢ်ဟံးန့ၢ်အီၣ်ဘူၣ်သ့ၣ်နီၣ်စီဆှံ,” လၢခ့ခါအကတီၢ်, မ့ၢ်တၢ်ပနီၣ်ပာ်ဖျါဆိ ကစၢ်ယ့ၣ်ရှူး ကဘၣ်တၢ်ပျၤထီမၤသံအီၤ, လၢသ့ၣ်ဖျၢၣ်ထူၣ်စုညါအလိၤန့ၣ်လီၤ.

ပအဲၣ် ပဟံၣ်ပဃီဘၣ်ဆၣ်, ပမ့ၢ်လဲၤတၢ်လၢကစၢ်ယ့ၣ်ရှူးအသးစီဆှံန့ၣ်, သမှံၤအဒၢးဒၣ်လဲာ် ကဲထီၣ် တၢ်ရ့လိာ်သးဒီးအီၤအလီၢ် သ့ဝဲဒၣ်န့ၣ်လီၤ.