တၢ်အိၣ်ဖှိၣ်သရၣ် တံၤမသ့း ဖဲအလဲၤတၢ်က့ၤတၢ်အကတီၢ်န့ၣ် သိးဃာ်ဝဲ ပှၤစံၣ်တဲၤတဲလီၤတၢ်အဆ့ကၤကိာ်လာ် (preacher collar), ဒီးအါစုအါဘျီ ပှၤစီစၣ်တဖၣ်န့ၣ် မၢအဝဲဃ့ထုကဖၣ်တၢ်လၢ အဝဲသ့ၣ်အဂီၢ်န့ၣ်လီၤ. ဖဲပှၤလဲၤတၢ်လၢကဘီယူၤပျီတဖၣ် ထံၣ်ဝဲ တၢ်အပျ့ဖိလၢအဆ့ကၤသူအလိၤ လၢအပာ်ဖျါထီၣ် အဝဲမ့ၢ် တၢ်ဘူၣ်တၢ်ဘါ ခိၣ်နၢ်တဂၤန့ၣ်ဒီး, စံးဘၣ်အီၤလၢ “ ဝံသးစူၤ ဃ့ဘါထုကဖၣ်န့ၢ်တၢ်လၢယဂီၢ်တက့ၢ်” န့ၣ်လီၤ. တယံာ်ဒံးဘၣ်န့ၣ်, ဖဲအလဲၤတၢ်ဒီးကဘီယူၤအကတီၢ်, ပိာ်မုၣ်တဂၤ, ပာ်သူၣ်ပာ်သးအီၤ, ဒီးတီၤလီၤဝဲလၢအလီၢ်ဆ့ၣ်နီၤအကပၤ, ဒီးဃ့ကညးအီၤ “နမ့ၢ်တၢ်အိၣ်ဖှိၣ် သရၣ်တဂၤဧါ. ဝံသးစူၤ ဃ့ဘါထုကဖၣ်န့ၢ်တၢ်လၢယဂီၢ်တက့ၢ်” န့ၣ်လီၤ. ဒီးသရၣ် တံၤမသ့း ဃ့ထုကဖၣ်န့ၢ်တၢ်လၢအဂီၢ်န့ၣ်လီၤ.
လၢလံာ်ဝံယံးရမံယၤအပူၤန့ၣ်, လံာ်စီဆှံ တဆၢ ဒုးသ့ၣ်ညါပှၤလၢ ဘၣ်မနုၤအဃိ ပသ့ၣ်ညါ ကစၢ်ယွၤဒိကနၣ်, ဒီးစံးဆၢတၢ်ထုကဖၣ်လဲၣ်န့ၣ်လီၤ. မ့ၢ်လၢယွၤ အသူၣ်အိၣ်သးအိၣ်တၢ်အဃိန့ၣ်လီၤ. ယံး ၂၉:၁၁ အပူၤန့ၣ် ကစၢ်ယွၤမၤဂၢၢ်မၤကျၢၤ အပှၤဂီၢ်မုၢ်တဖၣ် လၢအမၤတၢ်ဒဲးဘး, ဒီးအဘၣ်တၢ်စိာ်မၢကဲကုၢ်တဖၣ်လၢ, “အဂ့ၢ်ဒ်အံၤ, ယသ့ၣ်ညါ တၢ်ကူၣ်လၢ ယကူၣ်ထီၣ်လၢသုဂီၢ်, ယွၤစံးဝဲဒၣ်, တၢ်ကူၣ်ဘၣ်ဃးဒီး တၢ်ဃူတၢ်ဖိး, ဘၣ်ဃးဒီး တၢ်အၢတမ့ၢ်ဘၣ်” န့ၣ်လီၤ. ကစၢ်ယွၤ အိၣ်ခိးကွၢ်လၢ် တၢ်အကတီၢ်လၢ အပှၤဂီၢ်မုၢ်တဖၣ် ကဟဲက့ၤဆူအအိၣ်န့ၣ်လီၤ. ဖဲအဆၢဖိ ၁၂-၁၃ အပူၤန့ၣ်, ယွၤစံးဝဲဒၣ်လၢ “သုကကိးထီၣ်ယၤ, ဒီးသုကလဲၤဘါထုကဖၣ်တၢ်လၢယၤ ဒီးယကကနၣ်သုကလုၢ်လီၤ. ဒီးသုကဃုယၤ, ဒီးတုၤသုဃုယၤလၢသုသးဒီဖျၢၣ်ညါဒီး, သုထံၣ်န့ၢ်ယၤလီၤ.”
ဝံယံးရမံယၤ မၤလိန့ၢ်ဝဲတၢ်ဂ့ၢ်အံၤ, ဒီးဖဲအဝဲဘၣ်တၢ်ဒုးဃာ်အီၤ လၢဃိာ်ပူၤအကတီၢ်, ဘၣ်ထွဲဒီးတၢ်ထုကဖၣ်အဂ့ၢ်န့ၣ် မၤလိန့ၢ်အါထီၣ်ဝဲဒၣ်န့ၣ်လီၤ. ယံး ၃၃:၃ န့ၣ် ကစၢ်ယွၤမၤဂၢၢ်မၤကျၢၤအီၤလၢ “ကိးထီၣ်ယၤတက့ၢ်, ဒီးယကစံးဆၢနၤ, ဒီးယကဒုးနဲၣ်နၤလၢတၢ်အဒိၣ်အထီ, ဒီးတၢ်လီၤလးတဖၣ်, လၢနတသ့ၣ်ညါဘၣ်လီၤ.”
ကစၢ်ယ့ၣ်ရှူးစ့ၢ်ကီး, ဖဲ မး ၆:၈ အပူၤန့ၣ်, ဟ့ၣ်သဆၣ်ပှၤလၢ ပကဃ့ထုကဖၣ်တၢ်အဂီၢ်, ဒီးစံးဝဲ, “တၢ်လၢသုန့ၢ်ဘၣ်အီၤအလီၢ်အိၣ်တဖၣ်န့ၣ် သုပၢ်သ့ၣ်ညါဝဲလီၤ” န့ၣ်လီၤ. လၢတၢ်န့ၣ်အဃိ, မး ၇:၇ ပာ်ဖျါဝဲ, လၢတၢ်ထုကဖၣ်အပူၤန့ၣ် “ဃ့တၢ်,” “ဃုတၢ်,” ဒီး“ဒိတကျိာ်တၢ်” တက့ၢ်န့ၣ်လီၤ. ပတၢ်ဃ့သကွံၢ်ကညးကိးထံၣ်ဒဲးန့ၣ် မၤဘူးထီၣ်ပှၤဆူ ပှၤလၢအကစံးဆၢတၢ်တဂၤအအိၣ်န့ၣ်လီၤ. လၢတၢ်ထုကဖၣ်အပူၤန့ၣ် ပတဘၣ်မ့ၢ်ပှၤလၢအစီစၣ်ဒီးကစၢ်ယွၤန့ၣ်ဘၣ်. ယွၤသ့ၣ်ညါပှၤ, ဒီးအသးအိၣ်ဒိကနၣ်ပှၤန့ၣ်လီၤ. ခဲကနံၣ်အံၤဒၣ်လဲာ် ပလဲၤစိာ် ပတၢ်ဂ့ၢ်တၢ်ကျိၤတဖၣ်ဆူ ယွၤအအိၣ်သ့ဝဲဒၣ်န့ၣ်လီၤ.
