ခၠါလံၣ် ဝါးဒ် (Charlie Ward) ထီၣ်ဝဲ ခီလ့ၣ်ကၠိ လၢကီၢ်စဲၢ်ဖလီၣ်ရံၣ်ဒၣ် ဖၠၣ်စိမိ (Florida State Universit) အကတီၢ်, အဝဲမ့ၢ် ကၠိဖိ လၢအလိာ်ကွဲပြၢ တၢ်လိာ်ကွဲခံကလုာ်န့ၣ်လီၤ. ဖဲ ၁၉၉၃ နံၣ်န့ၣ်, သးစၢ်ပှၤလိာ်ကွဲတၢ်ဖိအခိၣ် (quarterback)ဒ်ထံလီၢ်ကီၢ်ပူၤ ခီလ့ၣ်ကၠိအပတီၢ် ပှၤလိာ်ကွဲ အမဲရကၤဖျၢၣ်ထူ အဂ့ၤကတၢၢ်တဂၤအသိး, ဒိးန့ၢ်ဝဲ ဟၢးစမဲန် ခိၣ်ဖး, ဒီးမ့ၢ်ပှၤလိာ်ကွဲဖျၢၣ်သွ့အဂ့ၤကတၢၢ်တဂၤစ့ၢ်ကီး
န့ၣ်လီၤ.
တချုးလၢအဝဲသ့ၣ် ဘၣ်လိာ်ကွဲပြၢတၢ်မုၢ်တနံၤ, တၢ်စံးကတိၤသကိးတၢ်အကတီၢ်န့ၣ် ပှၤနဲၣ်လိဖျၢၣ်သွ့ စူးကါဝဲတၢ်ကတိၤအရၢၢ်အစၢၢ်တဖၣ်ဆူ ပှၤလိာ်ကွဲဖိတဖၣ်အအိၣ်န့ၣ်လီၤ. အဝဲထံၣ်ဝဲဒၣ်လၢ “ခၠါလံၣ် အသးဘၣ်တံာ်တာ်” အဃိ, သံကွၢ်ဝဲ “ခၠါလံၣ်ဧၢ, နအဲၣ်ဒိးစံးတၢ်မနုၤလဲၣ်”န့ၣ်လီၤ. ခၠါလံၣ် ဝါးဒ် စံးဆၢဝဲလၢ “ပှၤနဲၣ်လိတၢ်ဧၢ, ပှၤနဲၣ်လိဖျၢၣ်ထူ ဘိဒၢၣ် (Coach Bowden) တသူဝဲတၢ်ကတိၤ ဒ်သိးအံၤဘၣ်ဆၣ်, ဒ်သိးပကလိာ်ကွဲလၢာ်သူၣ်လၢာ်သးအဂီၢ်န့ၣ် အိၣ်ဒၣ်စံးကတိၤဟ့ၣ်သဆၣ်ထီၣ်ပှၤန့ၣ်လီၤ.”
ဘၣ်ထွဲဒီးတၢ်ဂ့ၢ်အံၤ, ဒ်သိး ခၠါလံၣ် ကစံးကတိၤတၢ် ကပုာ်လုးဖိဆူ ဖျၢၣ်သွ့အပှၤနဲၣ်တၢ်န့ၣ် မ့ၢ်ဒၣ်အတၢ်အိၣ်မူသကဲာ်ပဝး လၢအလီၤဂာ်ဒီးကစၢ်ခရံာ်န့ၣ်လီၤ. ပှၤနဲၣ်တၢ်အံၤ တဲဘၣ် ပှၤဟံးန့ၢ်တၢ်ကစီၣ်တဂၤလၢ ဖဲအဝဲစံးကတိၤတၢ်ဒီး ခၠါလံၣ် အကတီၢ်န့ၣ် “တၢ်မၤအသး ဒ်မူခိၣ်ကလူးတဂၤ အိၣ်ခိးကွၢ်ပှၤအသိး” န့ၣ်လီၤ.
တၢ်ဟံးဃာ်ပၢၤဃာ် တၢ်လၤကပီၤအဂ့ၤ, လၢပှၤတစူၢ်က့ၤနာ်က့ၤတၢ်တဖၣ်အကျါ, ဒီးတၢ်အုၣ်သးတီတီလိၤလိၤ လၢကစၢ်ခရံာ်အဂီၢ်န့ၣ် မ့ၢ်တၢ်မၤလၢအကီအခဲန့ၣ်လီၤ. ဘၣ်ဆၣ်, ဖဲကစၢ်ယ့ၣ်ရှူးမၤစၢၤ, ဒီးနဲၣ်ဆှၢပှၤ တကတီၢ်ဃီန့ၣ်, ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ် ကဒိၣ်ထီၣ် လီၤဂာ်အါထီၣ်ဒီးအီၤ, သ့ဝဲဒၣ်န့ၣ်လီၤ. လၢလံာ်တံတူး ၂ :၆ (ခ့ခါ ကညီစှီၤကျိာ်) အပူၤန့ၣ်, ပှၤပိာ်ခွါသးစၢ်တဖၣ်, ဒီးပှၤစူၢ်နာ်တၢ်ဖိခဲလၢာ်တဖၣ်, “အကပၢၤသူၣ်ပၢၤသး,” ဒီးအဆၢဖိ ၇-၈ န့ၣ် “အိၣ်ဒီးတၢ်သူၣ်တီသးလိၤ သူတၢ်ကတိၤ အမ့ၢ်အတီ လၢပှၤဃုတုာ်အတၢ်ကမၣ်တသ့ဘၣ်” အဂီၢ် ဘၣ်တၢ်ကိးအီၤန့ၣ်လီၤ.
လၢကစၢ်ခရံာ်အဂံၢ်အဘါအပူၤ, ပအိၣ်မူကျိၤကျဲဒ်သိးအံၤန့ၣ်, တမ့ၢ်ထဲဒၣ်လၢ ပကမၤလၤကပီၤယွၤဧိၤန့ၣ်ဘၣ်, မ့မ့ၢ် ပကဒုးအိၣ်ထီၣ် တၢ်လၤကပီၤအဂ့ၤစ့ၢ်ကီးန့ၣ်လီၤ. ဖဲန့ၣ် ယွၤကဟ့ၣ်ပှၤတၢ်ကူၣ်သ့လၢ ပလိၣ်ဘၣ်, ဒီးပှၤကညီတဖၣ်န့ၣ် ကအိၣ်ဒီးတၢ်ဂ့ၢ်တၢ်ခၢး, ဒ်သိးကနၢ်ဟူဝဲ တၢ်လၢပစံးဘၣ်တဲဘၣ်တဖၣ်န့ၣ်လီၤ.
