ဒ်သိးတၢ်ကထုးထီၣ် တၢ်ကလုၢ်လၢကတြီယွၤအဂီၢ် (restraining order), ပှၤတဂၤဆှၢနုာ်ဝဲလၢ ကွီၢ်ဘျီၣ်န့ၣ်လီၤ. အဝဲပာ်ဖျါဝဲဒၣ်လၢ ယွၤန့ၣ် “တအိၣ်ဒီးတၢ်သးကညီ လီၤဆီဒၣ်တၢ်” လၢအဖီခိၣ်ဘၣ်, ဒီးယွၤဒုးနဲၣ်ဖျါတ့ၢ် “တၢ်ပာ်သူၣ်ပာ်သးလၢ အအၢတကပၤ အါမး” န့ၣ်လီၤ. ပှၤစံၣ်ညီၣ်ကွီၢ်လၢ အပၢၤလီၢ်ဆ့ၣ်နီၤန့ၣ် လဲၤကပာ်အတၢ်ဆှၢနုာ်, ဒီးစံးဝဲလၢ ပှၤတဂၤအံၤ တလိၣ်ဝဲလၢ ကွီၢ်ဘျီၣ်အတၢ်မၤစၢၤဘၣ်. မ့မ့ၢ်လိၣ်ဝဲလၢ အနီၢ်သးအတၢ်အိၣ်ဆူၣ်အိၣ်ချ့အဂီၢ်န့ၣ်လီၤ. တၢ်ဂ့ၢ်အံၤ မ့ၢ်တၢ်မၤအသးနီၢ်နီၢ်, မ့ၢ်တၢ်လၢအလီၤနံၤဘၣ်ဆၣ်, မ့ၢ်စ့ၢ်ကီးတၢ်လၢအလီၤသးအုးန့ၣ်လီၤ.
ဘၣ်ဆၣ်ဒီး, ပဝဲစ့ၢ်ကီး ပတလီၤဆီကဲာ်ဆိးဘၣ်. ဘၣ်တဘျီဘျီ, ပအဲၣ်ဒိးစံးလၢ “ယွၤဧၢ, ယတူၢ်တန့ၢ်လၢၤဘၣ်. ဝံသးစူၤ, ဆိကတီၢ်ဘၣ်န့ၣ်တက့ၢ်. ” တမ့ၢ်ဘၣ်ဧါ. စီၤယိၤဘး စံးတ့ၢ်ဝဲဒၣ်န့ၣ်လီၤ. အဝဲသမံသမိးယွၤန့ၣ်လီၤ. တၢ်နးတၢ်ဖှီၣ်လၢ အနီၢ်ကစၢ် တူၢ်ဘၣ်ခီၣ်ဘၣ်ဝဲန့ၣ် အၢဒိၣ်မး, တၢ်ကပာ်ဖျါလၢထးခိၣ်တန့ၢ်ဘၣ်န့ၣ် ဝံၤအလီၢ်ခံ, ယိၤဘး ၁၃:၃ (ခ့ခါ) အပူၤန့ၣ်, စီၤယိၤဘး စံးဝဲဒၣ်လၢ “ယသးအိၣ်ကတိၤဂ့ၢ်လိာ်တၢ်ဒီးအီၤ ဘၣ်ဃး ယတၢ်ဂ့ၢ်တၢ်ကျိၤ,” ဒီး ယိၤဘး ၉:၃ ပာ်ဖျါဝဲလၢ “မ့ၢ်ဘၣ်အသးလၢအကလိာ်ကွီၢ်ဒီးအီၤ” န့ၣ်လီၤ. ယိၤဘး ၁၃:၂၁ န့ၣ် ထုထီၣ်ဝဲ တၢ်ကလုၢ်တြီတၢ်တထံၣ်, ဒီးစံးဝဲ, “ထုးက့ၤနစုလၢ ယလိၤတက့ၢ်. ဒီးမ်နတၢ်မၤပျံၤအလီၢ် အသုတမၤပျံၤယၤတဂ့ၤ” န့ၣ်လီၤ. တၢ်လၢ စီၤယိၤဘး လိာ်ကွီၢ် ဂ့ၢ်လိာ်တၢ်န့ၣ် တမ့ၢ်လၢအနီၢ်ကစၢ်ဒၣ်ဝဲတၢ်သရူးကမၣ်တအိၣ်အဃိဘၣ်. မ့မ့ၢ်ထံၣ်ဝဲယွၤ ဒ်အမၤတၢ်ဆူၣ်ကိၤ, တၢ်တအိၣ်ဒီးတၢ်အဂ့ၢ်အပီၢ်အဃိ- ဖဲ ယိၤဘး ၁၀:၃ န့ၣ် စံးဝဲလၢ “နမၤကိၢ်မၤဂီၤ, နမၤတရီတပါတၢ်, လၢနတ့တၢ်လၢနစု, … န့ၣ် မ့ၢ်အဂ့ၤဒီးနၤစ့ၢ်ကီးဧါ” န့ၣ်လီၤ.
ဘၣ်တဘျီဘျီ, ပသးကလၢၢ်ဘၣ်လၢ ယွၤ တတီတလိၤဘၣ်န့ၣ်လီၤ. တၢ်အမ့ၢ်အတီနီၢ်နီၢ်န့ၣ်, တၢ်ကနၢ်ပၢၢ် စီၤယိၤဘးအပူန့ၣ် တၢ်ဂ့ၢ်ကီအိၣ်ဝဲ, ဒီးတဟ့ၣ်တၢ်စံးဆၢအညီတဖၣ်န့ၣ်ဘၣ်. အကတၢၢ်န့ၣ်, ယွၤဟ့ၣ်က့ၤစီၤယိၤဘး နီၢ်ခိအတၢ်ဘူၣ်တၢ်တီၢ်တဖၣ်ဘၣ်ဆၣ်, တၢ်ဂ့ၢ်ဒ်သိးအံၤန့ၣ် တမ့ၢ်ယွၤအတၢ်ပညိၣ်လၢပဂီၢ်ထီဘိဘၣ်. အကတၢၢ်န့ၣ် ဒ် စီၤယိၤဘး အၢၣ်လီၤဝဲဖဲ ယိၤဘး ၄၂:၃ အပူၤ, ဒီးစံးဝဲ “မၤသးဒ်န့ၣ် ဒီးတၢ်လၢ ယတသ့ၣ်ညါဘၣ်န့ၣ် ယကတိၤတၢ်, တၢ်လီၤလး ကဲၣ်ဆိးလၢယဂီၢ်လၢ ယတသ့ၣ်ညါဘၣ်” အသိး, ပကထံၣ် တၢ်စံၣ်ညီၣ်တဲာ်တမံၤသ့ၣ်သ့ၣ်န့ၣ်လီၤ. တၢ်ဂ့ၢ်မိၣ်ပှၢ်န့ၣ်မ့ၢ်ဝဲ ယွၤအိၣ်ဒီးတၢ်ဂ့ၢ်တၢ်ကျိၤတဖၣ် လၢပတသ့ၣ်ညါတၢ်နီၤတမံၤ, ဒီးတၢ်လၢပတသ့ၣ်ညါတဖၣ်အံၤအပူၤန့ၣ် အိၣ်ဒီးတၢ်မုၢ်လၢ်လၢအလီၤလိၣ်လီၤလးန့ၣ်လီၤ.
