လီမ့ၣ်အူလၢ တၢ်လဲၤတၢ်က့ၤအကျဲတဖၣ် လီၤပံာ်ကွံာ်ဝဲ ဖဲဝ့ၢ် Highland Park, ကီၢ်စဲၣ် Michigan န့ၣ်ဒီး, တၢ်ဆၢဒိးန့ၢ် တၢ်ကပီၤအဂံၢ်ထံးအဂၤတမံၤ လၢအမ့ၢ် မုၢ်စးထီၣ်ဝဲဒၣ် အကတီၢ်ဖဲန့ၣ်လီၤ. ဝ့ၢ်လၢအဖှီၣ်ယာ်ဒိၣ်မးအံၤ ကဟ့ၣ်ခီပနံၣ်မၤတၢ် လၢကမျၢၢ်အဂီၢ်, အစ့ပာ်ကတီၤ (Fund) တအိၣ်ဘၣ်အဃိ, လီသဟီၣ်ခီပနံၣ်အံၤ, မၤလီၤပံာ်ကွံာ် ကျဲအမ့ၣ်အူတဖၣ်, ဒီးဟံးက့ၤဝဲလီမ့ၣ်အူသၣ်တဖၣ် လၢလီမ့ၣ်အူအထူၣ် ၁၄၀၀ အလိၤန့ၣ်လီၤ. လၢတၢ်န့ၣ်အဃိ, ပှၤအိၣ်ဆိးဖဲန့ၣ်တဖၣ် ဘၣ်အိၣ်ဆိးဝဲလၢတၢ်ခံးကျါ, ဒီးတၢ်ဘံၣ်တၢ်ဘၢတအိၣ်လၢၤဘၣ်န့ၣ်လီၤ. ပှၤအိၣ်ဆိးဖဲန့ၣ်တဂၤ စံးဘၣ်တဲဘၣ်ပှၤဃုသ့ၣ်ညါတၢ်ကစီၣ်တဖၣ်လၢ, “ခဲကနံၣ်အံၤ, ဖိသၣ်တနီၤဘၣ်လဲၤထီၣ်ဝဲဒၣ်ကၠိန့ၣ်လီၤ. အိၣ်ဒၣ်အဝဲသ့ၣ်ကဘၣ်ကွၢ်လဲၤဝဲဒၣ် ကျဲခိၣ်လိၤလၢ မ့ၣ်အူသၣ်တအိၣ်နီတဖျၢၣ်ဘၣ်န့ၣ်လီၤ.”

တၢ်အိၣ်အသးတမံၤအံၤန့ၣ် ဆီတလဲအသး, ဖဲပှၤဒုးအိၣ်ထီၣ် တၢ်ကရၢကရိလၢ အတဃုန့ၢ်အဘျုးအဖှိၣ်တဖု, ထီထီၣ်မ့ၣ်အူသၣ်တဖၣ် လၢဝ့ၢ်ပူၤအကျဲ ဒီးဒိးန့ၢ်ဝဲ လီအဂံၢ်လၢမုၢ်န့ၣ်လီၤ. လၢတၢ်မၤသကိးတၢ်တပူၤဃီအပူၤန့ၣ်, တၢ်ကရၢကရိလၢအမၤစၢၤမၤဂ့ၤထီၣ် ပှၤကညီအတၢ်အိၣ်မူအိၣ်ဂဲၤအတီၤအံၤ ပာ်ကတီၤဝဲ ဝ့ၢ်အကျိၣ်စ့လၢကဘၣ်ဟ့ၣ် ဂံၢ်သဟီၣ်အပှ့ၤတဖၣ်, ဒီးတကပၤန့ၣ် မၤလၢထီၣ်ပှဲၤထီၣ်ဝဲ တၢ်ကပီၤအဂံၢ်ထံး လၢပှၤဝ့ၢ်ဖိတဖၣ် လိၣ်ဘၣ်ဝဲန့ၣ်လီၤ.

ပတၢ်အိၣ်မူလၢကစၢ်ခရံာ်အပူၤ, တၢ်ကပီၤအဂံၢ်ထံးလၢပနာ်ဒီးသန့ၤလီၤသးန့ၢ်ဝဲ မ့ၢ်ယွၤအဖိခွါ, ကစၢ်ယ့ၣ်ရှူးအနီၢ်ကစၢ်ဒၣ်ဝဲန့ၣ်လီၤ. ၁ ယိၤ ၁:၅ အပူၤန့ၣ် ဒ်တၢ်မၢဖိစီၤယိၤဟၣ် ကွဲးပာ်ဖျါဝဲအသိး, “ယွၤမ့ၢ်တၢ်ကပီၤ, ဒီးတၢ်ခံးတအိၣ်ဘၣ်လၢအပူၤနီတမံၤဘၣ်” န့ၣ်လီၤ. ဖဲအဆၢဖိ ၇ န့ၣ်, ကွဲးနီၣ်ဝဲလၢ, “ပမ့ၢ်လဲၤတၢ်လၢ တၢ်ကပီၤအပူၤ, ဒ်အဝဲဒၣ်အိၣ်လၢ တၢ်ကပီၤအပူၤအသိးန့ၣ်ဒီး, ပရ့လိာ်ပသးသကိးသကိး,ဒီးအဖိခွါယ့ၣ်ရှူးခရံာ်အသွံၣ်န့ၣ်, သ့စီကွံာ်ပှၤလၢ ပတၢ်ဒဲးဘးခဲလၢာ်” န့ၣ်လီၤ.

ယိၤ ၈:၁၂ အပူၤန့ၣ် ကစၢ်ယ့ၣ်ရှူး ဘိးဘၣ်သ့ၣ်ညါလီၤအသးလၢ “ယဲဒၣ်အံၤ, ယမ့ၢ်ဟီၣ်ခိၣ် အကပီၤ” န့ၣ်လီၤ. ခီဖျိလၢကစၢ်ယွၤအသးမုၢ်စီဆှံ, အတၢ်နဲၣ်ဆှၢပခီၣ်ကါ ကိးကါဒဲးအဃိ, ပတလဲၤဘၣ်တၢ်လၢ တၢ်ခံးကျါနီတဘျီဘၣ်. ကစၢ်ယွၤအတၢ်ကပီၤ ကပြုၢ်ကပြီၤထီဘိန့ၣ်လီၤ.