ဖဲယတံၤသကိးမုၣ်ဒီးအဝၤသးဘိန့ၣ် ကဒိးန့ၢ်အဖိအဂီၢ် ကျဲးစၢးဂဲၤလိာ်ဝဲအကတီၢ်, ကသံၣ်သရၣ်တဖၣ် ဟ့ၣ်ကူၣ်ဝဲဒၣ် ဒ်သိးကမၤတၢ်ယါဘျါကျိၤကျဲတမံၤန့ၣ်လီၤ. ဘၣ်ဆၣ်, ယတံၤသကိးမုၣ်န့ၣ် မ့ၢ်လၢတၢ်တလီၤတံၢ်လၢအဂီၢ်န့ၣ်ဘၣ်. ဒီးစံးဝဲဒၣ်လၢ “တၢ်ဃ့ထုကဖၣ်တၢ်န့ၣ် ကြၢးလၢဝဲလီၢ်ဝဲလၢ ပတၢ်ဂ့ၢ်ကီတမံၤအံၤအဂီၢ်တမ့ၢ်ဘၣ်ဧါ. ယကဘၣ်မၤ တၢ်ယါဘျါအတၢ်ရဲၣ်တၢ်ကျဲၤန့ၣ် မ့ၢ်တၢ်လၢအလိၣ်နီၢ်နီၢ်ဧါ”န့ၣ်လီၤ. လၢယွၤအတၢ်မၤအပူၤန့ၣ် ပှၤကညီအတၢ်မၤ မ့ၢ်အိၣ်ဖဲတၢ်လီၢ်အသနၢၣ်မတၤလဲၣ်န့ၣ် ယတံၤသကိး ကျဲးစၢးဃုသ့ၣ်ညါဝဲဒၣ်န့ၣ်လီၤ.
ဖဲအံၤန့ၣ်, ကစၢ်ယ့ၣ်ရှူး လုၢ်အီၣ်လုၢ်အီ ပှၤဂီၢ်မုၢ်တဖၣ်အဂ့ၢ်, ဖျါဖဲ မၢ် ၆:၃၅-၄၄ အပူၤန့ၣ် မၤစၢၤပှၤသ့ဝဲဒၣ်န့ၣ်လီၤ. ပူတယုၢ်အံၤ ကတၢၢ်ဝဲဒ်လဲၣ်န့ၣ် ပကသ့ၣ်ညါ-အဆၢဖိ ၄၂ ပာ်ဖျါထီၣ်, လၢတၢ်လီၤလိၢ်လီၤလးအပူၤ, ပှၤဂီၢ်မုၢ်လၢ အကထိတဖၣ်န့ၣ် ဘၣ်တၢ်လုၢ်အီၣ်လုၢ်အီ, ခီဖျိထဲဒၣ်လၢ ကိၣ်တဆံးတက့ၢ်, ဒီးညၣ်တနီၤဧိၤန့ၣ်လီၤ. ဘၣ်ဆၣ် ပာ်သူၣ်ပာ်သး ပှၤလၢအလုၢ်အီၣ်လုၢ်အီ ပှၤဂီၢ်မုၢ်တဖၣ်, ပှၤလၢအကတဲာ်ကတီၤန့ၢ်တၢ်အီၣ်တၢ်အီတဖၣ်, ပှၤလၢအဟ့ၣ်နီၤလီၤတၢ်အီၣ်တၢ်အီ, ဒီးအကတၢၢ်န့ၣ် မၤကဆှဲကဆှီက့ၤတၢ်တဖၣ်န့ၣ် အဆၢဖိ ၃၇,၃၈, ၃၉-၄၃ ပာ်ဖျါဝဲလၢ မ့ၢ်ဒၣ်အပျဲၢ်အဘီၣ်တဖၣ်န့ၣ်လီၤ. ဖဲအဆၢဖိ ၃၇ န့ၣ်, ကစၢ်ယ့ၣ်ရှူးစံးဝဲဒၣ်လၢ, “သုဝဲသ့ၣ်အံၤ, ဟ့ၣ်အီၣ်အတၢ်တက့ၢ်” န့ၣ်လီၤ. ကစၢ်ယ့ၣ်ရှူး မၤတၢ်လီၤလး, ဘၣ်ဆၣ် တၢ်လီၤလးကမၤအသး ဖဲအပျဲၢ်အဘီၣ်တဖၣ် ဖံးထီၣ်ဖီၣ်ထီၣ်တၢ်မၤအကတီၢ်န့ၣ်လီၤ.
ထါစံးထီၣ်ပတြၢၤ ၆၅:၅-၁၀ ပာ်ဖျါဝဲလၢ ဘုဧိၤဟုဧိၤလၢအဂ့ၤန့ၣ် မ့ၢ်တၢ်ဟ့ၣ်ဟဲလၢယွၤဘၣ်ဆၣ်, ပှၤထူစံာ်ဖိတဂၤန့ၣ် ကဘၣ်ကတဲာ်ကတီၤဝဲဟီၣ်ခိၣ်ဒံးန့ၣ်လီၤ. လူၤ ၅:၄-၆ အပူၤန့ၣ် ကစၢ်ယ့ၣ်ရှူး အၢၣ်လီၤ စီၤပ့းတရူးလၢ က “ဖီၣ်န့ၢ်” ဝဲ ညၣ်
ဘၣ်ဆၣ်, ပှၤမၤညၣ်ဖိအံၤ ကဘၣ် ပျၢ်လီၤအစၤတဖၣ်န့ၣ်လီၤ. ပမ့ၢ်တပၣ်ဃုာ်မၤ သကိးတၢ်ဒီးကစၢ်ယွၤဒၣ်လဲာ်, ယွၤကွၢ်ထွဲမၤဂ့ၤဟီၣ်ခိၣ်, ဒီးမၤတၢ်လီၤလးတဖၣ်သ့ဝဲဘၣ်ဆၣ်, ယွၤဃုထၢမၤတၢ်လၢ “ယွၤဒီးပှၤကညီအတၢ်မၤသကိးတၢ်အပူၤ” န့ၣ်လီၤ.
ယတံၤသကိးမုၣ်လဲၤခီဖျိဝဲ တၢ်ကူစါအသး, ဒီးလၢခံန့ၣ် ဒိးန့ၢ်ဝဲအဖိဂ့ၤဂ့ၤဘၣ်ဘၣ်န့ၣ်လီၤ. တၢ်အံၤ တမ့ၢ် တၢ်ဘျၢအကျဲ (Formula)လၢ တၢ်လီၤလးတမံၤ အဂီၢ်ဘၣ်ဆၣ်, မ့ၢ်တၢ်မၤလိတမံၤလၢ ယတံၤသကိးမုၢ်ဒီးယဂီၢ်န့ၣ်လီၤ. အါစုအါဘျီန့ၣ်, ယွၤမၤတၢ်လီၤလး ခီဖျိကျိၤကျဲလၢအပာ်လီၤန့ၢ်ဝဲလၢပစုပူၤတဖၣ်န့ၣ်လီၤ.
