ယဘါထုကဖၣ်တၢ်လၢ ပှၤကွဲးလံာ်သရၣ်တဂၤ လၢအဘၣ်ခဲစၢၣ်တၢ်ဆါတဂၤ လၢအပာ်ဖျါအဂ့ၢ် လၢအီၣ်လဲ(online) န့ၣ်လီၤ. အဝဲပာ်ဖျါအတၢ်ဆူးတၢ်ဆါ ဒီးအတၢ်ကီတၢ်ခဲသ့ၣ်တဖၣ်ဒီး ပာ်ဖျါစ့ၢ်ကီး အတၢ်သကွံာ်ကညးတၢ်ထုကဖၣ်, လံာ်စီဆှံအဆၢဖိတဖၣ်, ဒီးစံးထီၣ်ပတြၢၤယွၤလီၤ. ပထံၣ်ဘၣ် စ့ၢ်ကီး အတၢ်နံၤကမှံ ဖဲအဝဲလဲၤတၢ်ဒီး ယါဘျါအသးလၢ တၢ်ဆါဟံၣ်ဒီး အခိၣ်သူသ့ၣ်တဖၣ်လီၤထဲး, ဘၣ်ဆၣ် အဝဲအိၣ်ဒီး တၢ်နံၤကမှံလီၤ. အိၣ်ဒီး အတၢ်ကီတၢ်ခဲစုာ်စုာ်, ဘၣ်ဆၣ် တလီၤတူၢ်လီၤကာ်လၢ တၢ်ဟ့ၣ်ဂံၢ်ဟ့ၣ်ဘါပှၤဂၤလၢ တၢ်နာ်န့ၢ်ယွၤဘၣ်.

ဖဲပဘၣ်ကွၢ်ဆၢၣ်မဲာ်ဒီး တၢ်ကီတၢ်ခဲအဆၢကတီၢ်ဒီး ပကဃုထံၣ်ယွၤအဘျုးဒီးကစံးထီၣ်ပတြၢၤအီၤအဂီၢ် မ့ၢ်တၢ်လၢ အကီစ့ၢ်ကီးလီၤ. ဘၣ်ဆၣ်ဒီး, ထါစံးထီၣ်ပတြၢၤ ၁၀၀ စံးဘၣ်ပှၤလၢ အလီၢ်အိၣ်လၢ ပကသူၣ်ခုသးခုဒီး စံးထီၣ်ပတြၢၤယွၤန့ၣ်လီၤ. စံးဝဲ “သ့ၣ်ညါလၢယွၤမ့ၢ် ပကစၢ်တက့ၢ်. အဝဲဒၣ်န့ၣ်တ့ပှၤ, တမ့ၢ်ဘၣ် ပကစၢ်ဒၣ်ပဝဲဘၣ်. ပမ့ၢ်အပှၤဂီၢ်မုၢ်, ဒီးအတၢ်အီၣ်ဆၣ်အလီၢ်အသိတဖုလီၤ”(:၃), ဒီးစံးကဒီးဝဲ“အဂ့ၢ်ဒ်အံၤ, ယွၤန့ၣ်ဂ့ၤဝဲ, ဒီးအဘျုးအဖှိၣ် အိၣ်ဝဲ လီၤထူလီၤယိာ်ဒီး အတၢ်မ့ၢ်တၢ်တီ အိၣ်ဝဲအစိၤစိၤအဃၣ်ဃၣ်လီၤ.” (:၅).

ပတၢ်ကီတၢ်ခဲ မ့ၢ်အိၣ်ဒ်လဲၣ်ဒ်လဲၣ် ဘၣ်ဆၣ်ဒီး, မ့ၢ်လၢပသ့ၣ်ညါလၢ ယွၤအိၣ်ဘူးဒီးပှၤလၢအသူၣ်ကၣ်အသးလီၤတဖၣ်အဃိ ပဟံးန့ၢ် သးအဂံၢ်အဘါသ့န့ၣ်လီၤ (စံး ၃၄:၁၈). ပမ့ၢ်ဟ့ၣ်တၢ်ဆၢကတီၢ်အါလၢ တၢ်ဖးလံာ်စီဆှံဒီး တၢ်ထုကဖၣ်န့ၣ်ဒီး ပကဒိးန့ၢ် တၢ်ခွဲးတၢ်ယာ်အါ ဒ်သိး ပက“ဟဲနုာ်လၢအပဲတြီဒီး တၢ်သးဝံၣ်, အဂၢၤတဖၣ်ဒီး တၢ်စံးထီၣ်ပတြၢၤ…, (ဒီး) သးဝံၣ်ထီၣ်အီၤ, ဒီးစံးထီၣ်ပတြၢၤအမံၤ(န့ၣ်လီၤ)” (စံး ၁၀၀:၄). ပကိးထီၣ်ယွၤသ့လၢ တၢ်သူၣ်ဖှံသးညီ အပူၤန့ၣ်လီၤ. (စံး ၁၀၀:၁). အဂ့ၢ်ဒ်အံၤ, လၢတၢ်ကီတၢ်ခဲ အကတီၢ်န့ၣ် ပကစၢ်ယွၤန့ၢ် တီဒီးအတၢ်အၢၣ်လီၤအီလီၤန့ၣ်လီၤ.