ဖဲဟီၣ်ခိၣ်ဒီဘ့ၣ် တၢ်ဒုးဖးဒိၣ်ခံဘျီတဘျီအကတီၢ်, ကီၢ်အမဲရကၤ ကဘီသုးဖိ (Navy) လ့ ဝဲးစတၢၣ် (Lynne Weston) လၢတၢ်ကူစါယါဘျါတၢ်တကပၤန့ၣ် ဘၣ်လဲၤထီၣ်ဆူထံကၢၢ်ခိၣ်ဃုာ်ဒီးသုးဖိလၢ အကဘၣ်လဲၤဒုးတၢ်သတူၢ်ကလာ် ဒ်သိးဒီးကမၤန့ၢ်ကီးတဖၣ် လၢဒုၣ်ဒါအစုပူၤန့ၣ်လီၤ. လၢတၢ်ဟးဆှဲးတသ့ဘၣ်အပူၤန့ၣ် တၢ်သံတၢ်ပှၢ်တဖၣ်အိၣ်ဝဲ ဒိၣ်ဒိၣ်မုၢ်မုၢ်န့ၣ်လီၤ. အဝဲမၤအဂ့ၤကတၢၢ် လၢတၢ်စိာ်ပူၤဖျဲး ပှၤသုးဖိလၢအဘၣ်ဒိဘၣ်ထံး နးနးကလဲာ်တဖၣ်ဆူ တၢ်လီၢ်လၢအပူၤဒီးတၢ်ဒုးတၢ်ယၤန့ၣ်လီၤ. ဘၣ်တဘျီ, အသုးဖိလၢကူစါယါဘျါတၢ်တဖၣ် ထံၣ်န့ၢ် ဒုၣ်ဒါအသုးဖိ ဘၣ်ဒိဘၣ်ထံးနးနးကလဲာ်လၢအဟၢဖၢန့ၣ်လီၤ. ဒ်တၢ်ဘၣ်ဒိဘၣ်ထံး အတၢ်အိၣ်အသးအသိးန့ၣ်, ပှၤဆါအံၤ ပှၤဒုးအီအီၤထံတသ့ဘၣ်. ဒ်သိးပှၤတဂၤအံၤ အသုတသံအဂီၢ်န့ၣ် တၢ်ကူစါယါဘျါတၢ် သုးဖိအခိၣ် ဝဲးစတၢၣ် ဆဲးနုာ်လီၤန့ၢ် တၢ်သွံၣ်အထံဆှံ လၢသုးဖိအံၤ အသွံၣ်ကျိၤပူၤန့ၣ်လီၤ.
မရ့သုးဖိတဂၤ စံးဘၣ် ဝဲးစတၢၣ် လၢ “ပာ်တ့ၢ်တၢ်သွံၣ်အထံဆှံတဖၣ် လၢပပှၤ သုးဖိတဖၣ်အဂီၢ်ဒံး” န့ၣ်လီၤ. ဝဲးစတၢၣ် တပာ်သ့ၣ်ညါအသးဘၣ်. ဒ်ကစၢ်ယ့ၣ်ရှူး စံးဝဲဒၣ်လၢ မး ၅:၄၄ အပူၤအသိး, ကမၤဝဲတၢ်မနုၤလဲၣ်န့ၣ် ဝဲးစတၢၣ် သ့ၣ်ညါဝဲဒၣ်န့ၣ်လီၤ.
ကစၢ်ယ့ၣ်ရှူး မၤဝဲအါန့ၢ်ဒိၣ်န့ၢ် အတၢ်ကတိၤလၢ အတၤတၢ်တဖၣ်, ဒီးအိၣ်မူတ့ၢ်ဝဲဒ်အစံးကတိၤဝဲအသိးန့ၣ်လီၤ. ပှၤဂီၢ်မုၢ်လၢအထီဒါ ကစၢ်ယ့ၣ်ရှူးတဖၣ် ဖီၣ်အီၤ, ဒီးဆှၢအီၤဆူ ပှၤလုၢ်တၢ်အခိၣ်အဂ့ၢ်န့ၣ် လူၤ ၂၂:၆၃ ပာ်ဖျါဝဲ “ပှၤကညီလၢအဟံးန့ၢ် ယ့ၣ်ရှူးတဖၣ်န့ၣ်ဒုၣ်ဒွဲၣ်အီၤ, ဒီးဝ့ၤအီၤတီၢ်အီၤလီၤ” န့ၣ်လီၤ. စးထီၣ်လၢတၢ်တတီတလိၤအပူၤ ပှၤသမံသမိးအီၤ တုၤလၢတၢ်စံၣ်ညီၣ်မၤသံအီၤ အကျဲဒီဘိညါ, တၢ်မၤအီၤတတီတတြၢ်န့ၣ် တဆိတ့ၢ်ဝဲဒၣ်ဘၣ်န့ၣ်လီၤ. တမ့ၢ်ထဲလၢ ကစၢ်ယ့ၣ်ရှူး တူၢ်ခီၣ်ဝဲ တၢ်နးတၢ်ဖှီၣ်ဘၣ်. လူၤ ၂၃:၃၄ ပာ်ဖျါထီၣ်ဝဲ ဖဲရိမ့ၤသုးဖိတဖၣ် ပျၤထီအီၤလၢ ထူၣ်စုညါအလိၤအဆၢကတီၢ်, ကစၢ်ယ့ၣ်ရှူး ဃ့ထုကဖၣ်တၢ်လၢ ပၢ်ယွၤကပျၢ်အဝဲသ့ၣ်အတၢ်ဒဲးဘးအဂီၢ်န့ၣ်လီၤ.
တမ့ၢ်လၢ ပကဘၣ်ကွၢ်ဆၢၣ်မဲာ်ဒီးဒုၣ်ဒါနီၢ်နီၢ် လၢအဂုာ်မၤသံပှၤဘၣ်န့ၣ်လီၤ. ဘၣ်ဆၣ် ပှၤအါဒံအါဂၤသ့ၣ်ညါဝဲလၢ တၢ်ဝံသးစူၤ တူၢ်ဘၣ်ခီၣ်ဘၣ် တၢ်လၢပှၤနံၤဘၣ်ဖၣ်လဲပှၤ, ဒီးတၢ်ထံၣ်ဆံးပှၤတဖၣ်န့ၣ် မ့ၢ်တၢ်ဒ်လဲၣ်န့ၣ်လီၤ. ဒ်ပှၤကညီအန့ဆၢၣ်အသိး, ပစံးဆၢမၤဆၢက့ၤတၢ် လၢတၢ်သးဒိၣ်သးထီၣ်အပူၤန့ၣ်လီၤ. မး ၅:၄၄ အပူၤန့ၣ် ကစၢ်ယ့ၣ်ရှူး စံးဝဲ “ဒီးပှၤလၢအမၤတရီတပါသု, ဒီးမၤအၢမၤနးသုန့ၣ် ဘါထုကဖၣ်န့ၢ်အဂီၢ် တက့ၢ်” န့ၣ် မ့ၢ်တၢ်လၢအမၤထီထီၣ် တၢ်အတီၤအပတီၢ် လၢပဂီၢ်န့ၣ်လီၤ.
တနံၤအံၤ, ဒ်ကစၢ်ယ့ၣ်ရှူးမၤတ့ၢ်ဝဲအသိး, မ်ပကလဲၤတၢ်လၢ တၢ်အဲၣ်ဒ်သိးအံၤ, ဒီးပာ်ဖျါထီၣ်တၢ်သးကညီၤဆူ ပဒုၣ်ဒါတဖၣ်အဂီၢ်ဒၣ်လဲာ်န့ၣ်တက့ၢ်.
