ယတံၤသကိးတဂၤ ဖဲအခွါဖိ ထီၣ်ဆူ တၢ်ဘါယွၤသရိာ်, အလီၢ်ဆ့ၣ်နီၤဖးထီအဖီခိၣ်, ဒီးဝံၣ်ဝၣ်အစုခံခီန့ၣ်ဒီး, တဲဝဲအဖိခွါ, “စံၣ်လီၤ” လၢအကလုၢ်ဆူၣ်ဆူၣ်န့ၣ်လီၤ. ဖိသၣ်န့ၣ်စံးဆၢဝဲလၢ အတၢ်ကမၣ်တအိၣ်ဘၣ်အပူၤ, “ယအဲၣ်ဒိးလၢ တၢ်အိၣ်ဖှိၣ်သရၣ်ကထံၣ်ယၤ,” ဒီး “ယမ့ၢ်တဆၢထၢၣ်န့ၣ်ဒီး, တမ့ၢ်လၢ အဝဲကထံၣ်ယၤဘၣ်” န့ၣ်လီၤ. တၢ်ဘါယွၤသရိာ်အါတက့ၢ်န့ၣ်, တၢ်တဟ့ၣ်တၢ်အခွဲးလၢ တၢ်ကအိၣ်ဂဲၤဆၢထၢၣ်လၢလီၢ်ဆ့ၣ်နီၤဖးထီအဖီခိၣ်ဘၣ်ဆၣ်, ယတံၤသကိးအဖိခွါန့ၣ် အိၣ်ဒီး တၢ်ပညိၣ်လၢ အဂ့ၤန့ၣ်လီၤ. တၢ်ဂဲၤဆၢထၢၣ်, ဒီးဝံၣ်ဝၣ်အစုအံၤ မ့ၢ်ကျိၤကျဲတမံၤလၢ တၢ်ကထံၣ်အီၤ, ဒီးကဒိးန့ၢ်ဝဲ တၢ်အိၣ်ဖှိၣ်သရၣ် အတၢ်သ့ၣ်ညါပာ်သူၣ်ပာ်သးအီၤအဂီၢ်န့ၣ်လီၤ.

ဖဲပဂုာ်ကျဲးစၢၤဒိးန့ၢ်ဘၣ် ယွၤအတၢ်သ့ၣ်ညါပာ်သူၣ်ပာ်သးပှၤအဂီၢ်န့ၣ်, မ့ၢ်ကစၢ်ယွၤ ထံၣ်ပှၤကစီဒီဧါန့ၣ် တၢ်ဘၣ်ယိာ်အလီၢ်တအိၣ်ဘၣ်. ကိးဆၢကတီၢ်ဒဲးန့ၣ် ကစၢ်ယွၤထံၣ် ပဝဲတဂၤဘၣ်တဂၤန့ၣ်လီၤ. အဝဲမ့ၢ်ယွၤတဂၤဃီ လၢအဒုးနဲၣ်ဖျါထီၣ်အသးဆူ နီၢ်ဟၤကၢ်, ဘၣ်သ့ၣ်သ့ၣ်, နီၢ်ဟၤကၢ် ဘၣ်အိၣ်သယုၢ်သညိထဲတဂၤဧိၤ, အတၢ်အိၣ်မူ ကမ့ၢ်ဖဲတၢ်လီၢ်အဖုၣ်ကတၢၢ်, အိၣ်ပှဲၤဒီးတၢ်သးဟးဂီၤနးနးကျံးကျံးအကတီၢ်န့ၣ်လီၤ. ၁ မိၤ ၁၆:၃ ပာ်ဖျါဝဲဒၣ်လၢ နီၢ်စၤရဲ စူးကါဝဲနီၢ်ဟၤကၢ် ဒ်ပီးလီတမံၤ, ဒ်သိးဒီးကဆံးစၢ်န့ၢ်ဝဲ ဖိခွါတဂၤအဂီၢ်, ဘၣ်တၢ်ဟ့ၣ်လီၤအီၤဆူ စီၤအၤဘြၣ်န့ၣ်လီၤ. ဖဲလၢနီၢ်ဟၤကၢ် အဟုးအသး အိၣ်ထီၣ်ဝဲန့ၣ်ဒီး, စီၤအၤဘြၣ် ဟ့ၣ်တၢ်ပျဲလၢအမါ ဒ်သိးကမၤနးမၤဖှီၣ် နီၢ်ဟၤကၢ်အဃိ, အဆၢဖိ ၆ စံးဘၣ်ပှၤလၢ, “ဒီးနီၢ်စၤရဲ မၤနးမၤဖှီၣ်အီၤ, ဒီးအဝဲဒၣ် ဃ့ၣ်ထီၣ်ကွံာ်လၢအမဲာ်ညါလီၤ” န့ၣ်လီၤ.

ကုၢ်ပိာ်မုၣ်လၢ အဃ့ၣ်ဟးထီၣ်ဝဲတဂၤအံၤ, ထံၣ်လီၤက့ၤအသးလၢ ဘၣ်အိၣ်ဒၣ်ထဲတဂၤဧိၤ, အိၣ်ဒီးအဟုးအသး, ဒီးအသးဘၣ်ဒိဘၣ်ထံၤနးနးကျံးကျံးန့ၣ်လီၤ. ဖဲအစုကတၢၢ်, ခီၣ်ကတၢၢ် တၢ်မၤစၢၤတအိၣ်, လၢပှၢ်မုၢ်ကနၢအကတီၢ်, အဆၢဖိ ၁၁ ပာ်ဖျါဝဲ, လၢတၢ်သးကညီၤအပူၤ ကစၢ်ယွၤဆှၢလီၤမူခိၣ်ကလူး ဒ်သိးကစံးဘၣ်အီၤ “ယွၤနၢ်ဟူလံ နတၢ်နးတၢ်ဖှိၣ်လံ” န့ၣ်လီၤ. ဒီးအဆၢဖိ ၁၃ န့ၣ် ပကထံၣ်ဘၣ် ပိာ်မုၢ်အတၢ်စံးဆၢ, “ယွၤလၢအကတိၤတၢ်ဒီးအီၤန့ၣ်, ကိးဝဲအမံၤလၢ ထံၣ်တၢ်ကစၢ်” န့ၣ်လီၤ.

တၢ်လၢပသ့ၣ်ညါန့ၢ်ပၢၢ်က့ၤန့ၣ် လီၤလီၤဆီဆီ လၢပှၢ်မုၢ်ကနၢအသးကံၢ်ပူၤဒၣ်လဲာ်, ကစၢ်ယွၤထံၣ် နီၢ်ဟၤကၢ်ဒီးသးကညီၤဝဲဒၣ်န့ၣ်လီၤ. တၢ်ဂ့ၢ်ကီတဖၣ်ကနးထဲလဲၣ်ဂ့ၤ, ထဲလဲၣ်ဂ့ၤန့ၣ်, ကစၢ်ယွၤထံၣ်နၤလီၤ.