ဖဲလၢ တဲးကစဲး (Texas) A&M ခီလ့ၣ်ကၠိ အပှၤလိာ်ကွဲဖျၢၣ်ထူ စဲး စမီလ် (Seth Small), ဒ်သိးကထူနုာ်လီၤ ဖျၢၣ်ထူအဂီၢ်န့ၣ် ဟံးန့ၢ်ဝဲအလီၢ် ဖဲတၢ်လိာ်ကွဲ အတၢ်ဆၢကတီၢ်ကဝံၤဝဲအဂီၢ်န့ၣ် အိၣ်တ့ၢ်ဒၣ်ထဲ ခံစဲးကီးအကတီၢ်, ဒီးတၢ်လိာ်ကွဲအတၢ်သူၣ်ထီၣ်အပူၤ, ပှၤကမျၢၢ် ၁၀၇,၀၀၀ ဂၤ ဃၣ်ဃၣ်န့ၣ် ဂဲၤဆၢထၢၣ်ခိးကွၢ် လၢတၢ်သူၣ်ဟူးသးဂဲၤအပူၤန့ၣ်လီၤ. A&M ဖျၢၣ်ထူကရၢ, ဒီးထံကီၢ်ပူၤ ဖျၢၣ်ထူကရၢအဂ့ၤ ကတၢၢ်လၢတၢ်အါနံၣ်အါလါတဖု လိာ်ကွဲပြၢလိာ်အသး, ဒီးခံဖုလိာ်မၤန့ၢ်ဝဲဒၣ် ၃၈-၃၈ ဖီး ဒ်သိးသိးအဃိ တၢ်ထူနုာ်လီၤ ဖျၢၣ်ထူဆူ ကိ (Goal) ပူၤန့ၣ် ကမ့ၢ်စဲပနီၣ် တၢ်မၤနၢၤလၢအပှဲၤဒီးတၢ်သူၣ်ဒူသးဒူ, ဒီးတၢ်အဲၣ်တၢ်ကွံန့ၣ်လီၤ. စမီလ်ကထူနုာ်ဝဲဖျၢၣ်ထူအဂီၢ် ဟံးန့ၢ်ဝဲအလီၢ်န့ၣ် ဖျါလၢတၢ်ပာ်သးမုာ်မုာ်ခုၣ်ခုၣ်န့ၣ်လီၤ. တၢ်မၤနၢၤ ကိ (Goal) နုာ်လီၤဝံၤန့ၣ်ဒီး, ခီဖျိလၢပှၤဂီၢ်မုၢ်အတၢ်ကိးပသူထီၣ်အဃိ, တၢ်လိာ်ကွဲလီၢ် အတၢ်သူၣ်ထီၣ်အံၤ လီၤဂာ်မးလၢ အပိၣ်ဖးထီၣ်ဝဲဒၣ်န့ၣ်လီၤ.
ဖဲ ပှၤဃုသ့ၣ်ညါ တၢ်ကစီၣ်သံကွၢ်အီၤလၢ တၢ်ဆၢကတီၢ်လၢအဆူၣ် ဒ်သိးအံၤအဂီၢ် မ့ၢ်အကတဲာ်ကတီၤပာ်အသး ဒ်လဲၣ်န့ၣ်ဒီး, စမီလ် စံးဆၢဝဲလၢ အဝဲရူး ထါစံးထီၣ်ပတြၢၤ ၂၃ အဆၢဖိ ၁, “ယွၤမ့ၢ်ယပှၤကွၢ်သိ, တၢ်တမိၣ်န့ၢ်ဘၣ်ယသးလၢ တၢ်နီတမံၤဘၣ်” တဘျီဝံၤတဘျီန့ၣ်လီၤ. ဖဲ စမီလ် လိၣ်ဘၣ်ဝဲ ဂံၢ်ဘါ, ဒီးလၢတၢ်ဒုးအိၣ်ထီၣ်က့ၤ တၢ်နာ်န့ၢ်လီၤသးအဂီၢ်, ဟံးန့ၢ်ဝဲ အနီၢ်ကစၢ်တၢ်ကတိၤဟ့ၣ်ဒိလၢ ကစၢ်ယွၤ ဒ်အမ့ၢ်ပှၤကွၢ်သိတဂၤန့ၣ်လီၤ.
မ့ၢ်လၢ စံး ၂၃ န့ၣ် မၤဂၢၢ်မၤကျၢၤပှၤလၢ, ပအိၣ်ဘၣ်လၢ တၢ်ဃူတၢ်ဖိးအပူၤ (မ့တမ့ၢ်) တၢ်မုာ်တၢ်ပၢၤအပူၤန့ၣ်, ခီဖျိလၢပအိၣ်ဒီး ပှၤကွၢ်သိလၢအအဲၣ်ပှၤ, ဒီးပနာ်န့ၢ်အီၤသ့တဂၤန့ၣ် အံးထွဲကွၢ်ထွဲပှၤအဃိ, မ့ၢ်ထါတယုာ်လၢအဘၣ်တၢ်အဲၣ်အီၤန့ၣ်လီၤ. အဆၢဖိ ၄ န့ၣ် စီၤဒၤဝံးအုၣ်အသးလၢ တၢ်ပျံၤတၢ်ဖုးနးနးဒိၣ်ဒိၣ် အတၢ်မၤအသးနီၢ်နီၢ် (မ့တမ့ၢ်) တၢ်အိၣ်အသး ကီကီခဲခဲအပူၤဒၣ်လဲာ်န့ၣ် ကစၢ်ယွၤကတဲာ်ကတီၤဟ့ၣ်လီၤ တၢ်မၤမုာ်ထီၣ်က့ၤတၢ်န့ၣ်လီၤ. တၢ်ကွဲးကျိာ်ထံ တၢ်ကတိၤ “တၢ်မၤမုာ်ထီၣ်က့ၤတၢ်” အခီပညီန့ၣ် အိၣ်ဃုာ်ဒီး တၢ်မၤဂၢၢ်မၤကျၢၤက့ၤ တၢ်နာ်န့ၢ်လီၤသး, မ့တမ့ၢ်, ခီဖျိလၢကစၢ်ယွၤအတၢ်နဲၣ်ဆှၢအိၣ်ဒီးပှၤအဃိ, လၢတၢ်စူၢ်တၢ်နာ်အဂၢၢ်အကျၢၤ, ဒီးလၢတၢ်သးဒူအပူၤ ပကလဲၤတၢ်ဆူညါန့ၣ်လီၤ. ဖဲပလဲၤတၢ်လၢ တၢ်ကီတၢ်ခဲတဖၣ်အပူၤ- ဆူညါတၢ်ကမၤအသးဒ်လဲၣ်န့ၣ် ပတသ့ၣ်ညါဘၣ်အကတီၢ်, တၢ်လၢအမၤသ့ၣ်နီၢ်က့ၤပှၤကပုာ်လုးဖိလၢ ပှၤကွၢ်သိအဂ့ၤတဂၤ လဲၤသကိးတၢ်ဒီးပှၤန့ၣ်, ပကရူးအီၤ, ဒီးဟံးန့ၢ်တၢ်သူၣ်ဒူသးဒူ သ့ဝဲဒၣ်န့ၣ်လီၤ.
