ဒ်ယမ့ၢ်ဖိမုၣ်တဂၤလၢ အအိၣ်ဒီး မိၢ်ပၢ်ခံဂၤလၢ အမၤတၢ်ဆူၣ်ဒီးအဲၣ်ဘၣ်ယၤ ဒီးအိၣ်ဟဲဝဲလၢ အမဲရကၤ ကလံၤထံး ကီၢ်မိၢ်ပှၢ် အခၢၣ်သးထံကီၢ် လဲးတ့ၣ် အမဲရံကၤ န့ၣ်လီၤ. လၢအဒူၣ်ဖိထၢဖိတဖၣ်အကျါ မ့ၢ်ပှၤအဆိကတၢၢ် ခံဂၤ, အိၣ်ဒီးတၢ်သးဒူ လၢကသုးလီၢ်သုးကျဲ, နုာ်လီၤအိၣ်ဆိး လၢကီၢ်အမဲရကၤ, ဒ်သိးကဒိးန့ၢ်အါထီၣ် ခွဲးဂ့ၤယာ်ဘၣ် လၢတၢ်လုၢ်အီၣ် သးသမူအဂီၢ်အဃိ, ယဘၣ်စံးဘျုးအဝဲသ့ၣ်န့ၣ်လီၤ. အဝဲသ့ၣ်ခံဂၤ ထံၣ်လိာ်အသး ဖဲအသးစၢ်, ဒိၣ်တုာ်ခိၣ်ပှဲၤထီၣ်သီအကတီၢ် ဖဲဝ့ၢ်နယူယီး, ဒိးတ့ဒိးဖျီအသး, အိၣ်ဖျဲၣ်ထီၣ်ဝဲ ယဝဲၢ်ပိာ်မုၣ်ဒီးယၤ, ဒီးဖံးမၤအတၢ်ဖံးတၢ်မၤဒၣ်ဝဲဆူညါကွ့ၢ်ကွ့ၢ်န့ၣ်လီၤ.

ဒ်ယမ့ၢ်ပှၤဝ့ၢ်နယူယီးဖိ, ဒီးယဒိၣ်ထီၣ် ဟံးဃာ်ပၢၤဃာ် ပှၤလဲးတ့ၣ် အမဲရံကၤဖိ အတၢ်ဟ့ၣ်သါအဃိ, ပှၤလၢအအိၣ်ဒီး အတၢ်လီၤစၢၤ အဂ့ၢ်အကျိၤလီၤဆီတဖၣ်န့ၣ် ယအိၣ်ဒီးတၢ်သးစဲအဒိၣ်အအါန့ၣ်လီၤ. အဒိ, ယနီၤဟ့ၣ်ဘၣ် ယတၢ်စူၢ်တၢ်နာ်အဂ့ၢ် တဘျီ, ဖဲပှၤအါကလုာ်အါမၠိ အတၢ်ဘါသရိာ် လၢဟါတၢ်ဘါအကတီၢ်, တဘျီန့ၣ် တၢ်လီၢ်အံၤဘၣ်တၢ်စူးကါတ့ၢ်ဝဲ ဒ်အမ့ၢ် တၢ်ဒုးနဲၣ်, ဒီးတၢ်ဂဲၤကလံၣ် အတၢ်သူၣ်ထီၣ်လီၢ်လံၤ, ဖဲ ဘရီးဝ့ (Broad Way) န့ၣ်လီၤ. ယကတိၤလီၤ ယွၤအတၢ်အဲၣ်အဂ့ၢ်ဆူ ပှၤအိၣ်ဒီးလုၢ်လၢ်ဆဲးလၤအါကလုာ်လၢ အဟဲပာ်ဖှိၣ်ထီၣ်သးအကတီၢ်, ဒီးဖဲပထံၣ်ဘၣ် ပှၤကလုာ်တဖၣ်, လၢအိၣ်ဒီးအတၢ်လီၤဆီတဖၣ် ဟဲဘါသကိးတၢ်တပူၤဃီ ဒ်ခရံာ်အနီၢ်ခိအသိးန့ၣ် မ့ၢ်တၢ်လၢပထံၣ်တဖျဲးဘၣ် မူခိၣ်ဘီမုၢ်စံးတၢ်န့ၣ် မ့ၢ်တၢ်ဒ်လဲၣ်န့ၣ်လီၤ.

လၢလံာ်လီၣ်ဖျါအပူၤန့ၣ်, တၢ်မၢဖိ စီၤယိၤဟၣ် ဟ့ၣ်ပှၤမူခိၣ်ဘီမုၢ်အက့ၢ်အဂီၤလၢ အလီၤကမၢကမၣ်အံၤ, ဒီးပာ်ဖျါဝဲလၢ လီၣ်ဖျါ ၇:၉ အပူၤ, “ဒီးကွၢ်ကွၢ်, ပှၤဂီၢ်မုၢ်ဖးဒိၣ် လၢပှၤဂံၢ်ထီၣ်တသ့ဘၣ် နီတဂၤဘၣ်န့ၣ်, ဟဲလၢကယဲၢ်ပှၤကလုာ်, ဒီးကယဲၢ်ပှၤအဒူၣ်, ဒီးကယဲၢ်ပှၤဂီၢ်မုၢ်, ဒီးကယဲၢ်ပှၤကတိၤတၢ်အကျိာ်အကလုာ်ကလုာ်အကျါသ့ၣ်တဖၣ်န့ၣ် ဆၢထၢၣ်လၢလီၢ်ပစိာ်အမဲာ်ညါ, ဒီးသိဖိအမဲာ်ညါ” န့ၣ်လီၤ. အဆၢဖိ ၁၂ ပာ်ဖျါဝဲ ကစၢ်ယွၤလၢအအုၣ်က့ၤခီၣ်က့ၤပှၤန့ၣ် ကဒိးန့ၢ်ဝဲ “တၢ်စံးထီၣ်ပတြၢၤ, ဒီးတၢ်လၤကပီၤ,” ဒီး အါန့ၢ်အန့ၣ် ကစၢ်ယွၤန့ၣ်ကြၢးဝဲဘၣ်ဝဲဒီး “တၢ်လီၤထူလီၤယိာ်” န့ၣ်လီၤ.

ခဲကနံၣ်အံၤ, ပထံၣ်တဖျဲးဘၣ်, မူခိၣ်ဘီမုၢ်န့ၣ် လီၤဂာ်ဒီးတၢ်မနုၤလဲၣ်န့ၣ်လီၤ. ဘၣ်ဆၣ် မုၢ်တနံၤန့ၣ်, ပဝဲပှၤစူၢ်က့ၤနာ်က့ၤ ကစၢ်ယ့ၣ်ရှူးသ့ၣ်တဖၣ်န့ၣ် ကဘၣ်တၢ်ပာ်ဖှိၣ်ကဒီးအီၤ, ဃုာ်ဒီးပှၤဂီၢ်မုၢ်လၢ ထံကီၢ်သ့ၣ်တဖၣ်, လုၢ်လၢ်ဆဲးလၤတဖၣ်, ဒီးကျိာ်တၢ်ကတိၤတဖၣ် လၢအလီၤဆီတဖၣ်န့ၣ်လီၤ. မ့ၢ်လၢ ကစၢ်ယွၤအဲၣ် ပှၤကလုာ်တဖၣ်အဃိ, မ်ပကအဲၣ် ပဟီၣ်ခိၣ်ဒီဘ့ၣ် အဒူၣ်ဖိထၢဖိ လၢကစၢ်ခရံာ်အပူၤန့ၣ်တက့ၢ်.