“လၢတၢ်ဒိးစဲးန့ၣ် ယမၤန့ၢ် ၈၄ မးလီၤ.” ဖဲယဖးဘၣ် ယဖိမုၣ် မုၣ်လိၤဘိ ဆှၢလီၤဝဲ တၢ်ကစီၣ်ဆူ ယလီတဲစိအပူၤန့ၣ်ဒီး ယသးကလၢၢ်ဘၣ်လၢ အဝဲအသူၣ်ပိၢ်သးဝးန့ၣ်လီၤ. အဝဲစးထီၣ်လဲၤမၤလိတၢ် ဖဲတီၤထီကၠိတဖျၢၣ်, ဒီးသူဝဲအလီတဲစိ ဖဲမုၢ်ဆါ တၢ်အီၣ်အကတီၢ်န့ၣ်လီၤ. မိၢ်အသးလၢယပူၤ စံၣ်ထီၣ်ဝဲန့ၣ်, တမ့ၢ်ထဲလၢ ယဖိမုၣ် မၤတ့ၢ်တၢ် ဂ့ၤဂ့ၤဘၣ်ဘၣ်လၢ တၢ်ဒိးစဲးအကီအခဲတခါအပူၤအဃိဘၣ်. မ့မ့ၢ်ဃုထၢဝဲလၢ ကဆဲးကျိးစံးကတိၤတၢ်ဒီးယၤအဃိန့ၣ်လီၤ. အဝဲအဲၣ်ဒိးနီၤဟ့ၣ် တၢ်ကစီၣ်လၢအမုာ်ဒီးယၤန့ၣ်လီၤ.

အတၢ်ကွဲးဆှၢလီၤတၢ်မုၢ်နံၤဖိအံၤ ဒုးကဲထီၣ်မုၢ်နံၤသးဖှံလၢယဂီၢ်, ဒီးယဆိကမိၣ်ထီၣ်က့ၤလၢခံန့ၣ်, ဖဲယယူာ်ဃီၤယသးဆူယွၤအအိၣ်န့ၣ်ဒီး, မ့ၢ်အသးကကလၢၢ်ဘၣ်ဝဲ ဒ်လဲၣ်အဂ့ၢ်န့ၣ်လီၤ. ဖဲယကတိၤတၢ်ဒီးအီၤန့ၣ်, အသးကခုဒိၣ်မးဧါ. တၢ်ထုကဖၣ်န့ၣ် မ့ၢ်ပတၢ်ဆဲးကျိးလိာ်သးဒီးယွၤ, ဒီး ၁ သ့း ၅:၁၇ ပာ်ဖျါဝဲ, ပကဘၣ်မၤအီၤ “တထံၣ်ဃီ” န့ၣ်လီၤ. ဖဲပလဲၤခီဖျိတၢ်မုာ်ဒီးတၢ်ဖှီၣ်အကတီၢ်, တၢ်ကတိၤသကိးတၢ်ဒီးယွၤန့ၣ် မၤသ့ၣ်နီၣ်ထီၣ်က့ၤပှၤလၢ အဝဲအိၣ်ဒီးပှၤန့ၣ်လီၤ. ယွၤသ့ၣ်ညါပာ်စၢၤ ပဂ့ၢ်ပကျိၤ ခဲလၢာ်ဘၣ်ဆၣ်, တၢ်တဲသကိး ပတၢ်ဂ့ၢ်တၢ်ကျိၤဒီးအီၤန့ၣ် မ့ၢ်တၢ်လၢအကဲဘျုး, မ့ၢ်လၢပသုးကွံာ်ပတၢ်ကွၢ်စူၣ်တၢ်တဖၣ်, ဒီးပဆိကမိၣ်ထီၣ် ယွၤအဂ့ၢ်အဃိန့ၣ်လီၤ. ယရှါယၤ ၂၆:၃ စံးဝဲဒၣ် “ပှၤအသးလၢအသန့ၤအသးလၢနၤန့ၣ် နကပၢၤအီၤ လၢတၢ်ဃူတၢ်ဖိးအလၢအပှဲၤန့ၣ်လီၤ. အဂ့ၢ်ဒ်အံၤ, သန့ၤအသးလၢနၤလီၤ.” ဖဲပဃၣ်ဃီၤပသးဆူယွၤအအိၣ်န့ၣ်ဒီး, တၢ်ဃူတၢ်မုာ်အိၣ်ခိးပာ်စၢၤပှၤန့ၣ်လီၤ.

ပမ့ၢ်ဘၣ်ကွၢ်ဆၢၣ်မဲာ်တၢ် တမံၤဂ့ၤတမံၤဂ့ၤ, မ်ပကကတိၤတၢ်ဒီးယွၤတထံၣ်ဃီ, ဒီးဆဲးကျိးတုၤဃီၤ ပတၢ်ဘၣ်တ့ကစၢ်, ဒီးတၢ်အုၣ်က့ၤခီၣ်က့ၤကစၢ်ထီဘိန့ၣ်တက့ၢ်. စံးကတိၤကသွံ ထုကဖၣ်တၢ်, ဒီးသ့ၣ်နီၣ်နဲလၢ နကသူၣ်ဖှံသးညီ ဒီး“စံးထီၣ်ပတြၢၤ တၢ်အဘျုးအဖှိၣ်” န့ၣ်တက့ၢ်. အဂ့ၢ်ဒ်အံၤ, ၁ သ့း ၅:၁၈ အပူၤန့ၣ် စီၤပီလူး စံးဝဲလၢ တၢ်မၤအံၤ “မ့ၢ်တၢ်ဘၣ်ယွၤအသး” လၢပဂီၢ်န့ၣ်လီၤ.