“ယွၤန့ၣ်ဂ့ၤတ့ၢ်မးလၢပဂီၢ်လံ. ယအဲၣ်ဒိး စံးဘျုးစံးဖှိၣ်အီၤလၢ ပတၢ်တ့တၢ်ဖျီအနံၣ်ဆဲးဆၢအဂီၢ်န့ၣ်လီၤ.” ထဲရံၣ် (Terry) စံးကတိၤဝဲလၢ အကလုၢ်အဂၢၢ်အကျၢၤ, ဒီးအမဲာ်ထံလၢအမဲာ်တိာ်ပူၤတဖၣ်န့ၣ် ပာ်ဖျါထီၣ် အတၢ်သးကလၢၢ်ဘၣ်တၢ် အမ့ၢ်အတီန့ၣ်လီၤ. ပှၤအိၣ်လၢပကရူၢ်ဆံးဖိတဖၣ် အသးဘၣ်ဒိဒိၣ်ဒိၣ်ယိာ်ယိာ်န့ၣ်လီၤ. အပူၤကွံာ် နံၣ်တဖၣ်အပူၤန့ၣ် ထဲရံၣ်ဒီးအဝၤသးဘိအဂီၢ်, ကီဝဲခဲဝဲထဲလဲၣ်န့ၣ် ပသ့ၣ်ညါအဃိန့ၣ်လီၤ. ရီဘၢး (Robert) မ့ၢ်ပှၤစူၢ်က့ၤနာ်က့ၤတၢ်တဂၤဘၣ်ဆၣ်, သတူၢ်ကလာ်န့ၣ် ဒိးန့ၢ်ဝဲ သးအတၢ်ဆါနးနးကလဲာ်, ဒီးမၤသံဘၣ်အဝဲသ့ၣ်အဖိမုၣ်လၢအသးအိၣ် (၄) နံၣ်ဖိန့ၣ်လီၤ. အဝဲကဘၣ်လဲၤအိၣ် ကူဆါယါဘျါအသးလၢ သးအတၢ်ဆါဟံၣ်န့ၣ် ကယံာ်ဝဲ နံၣ်လၢအဆံတဖၣ်ဘၣ်ဆၣ်, ထဲရံၣ် လဲၤထံၣ်အီၤန့ၣ်လီၤ. ဒီးယွၤမၤတၢ်ယါဘျါက့ၤတၢ် အဃံအလၤ, ဒီးမၤစၢၤ ထဲရံၣ် ဒ်သိးကပျၢ်အဝၤအတၢ်ကမၣ်န့ၣ်လီၤ. နီၢ်သးအတၢ်ဘၣ်ဒိဘၣ်ထံး ဒိၣ်ဝဲယိာ်ဝဲမးဘၣ်ဆၣ်, အဝဲသ့ၣ် တဂၤဒီးတဂၤအဖီခိၣ် အတၢ်အဲၣ်န့ၣ် ဒိၣ်ထီၣ်အါထီၣ်ဝဲဒၣ်န့ၣ်လီၤ.

တၢ်အဲၣ်တၢ်ကွံ, ဒီးတၢ်ပျၢ်တၢ်ကမၣ် ဒ်သိးအံၤန့ၣ် ဟဲခီဖျိသ့ဝဲဒၣ်ထဲ တၢ်ဂံၢ်အခီၣ်ထံးတမံၤဧိၤန့ၣ်လီၤ. ဖဲစံးထီၣ်ပတြၢၤ ၁၀၃:၁၀, ၁၂ န့ၣ် စီၤဒၤဝံး ကွဲးဖျါထီၣ်ယွၤအဂ့ၢ် ဒ်သိးအံၤ, “တမၤဘၣ်ပှၤ ဒ်ပတၢ်ဒဲးဘးအသိးဘၣ်,… ဒ်မုၢ်ထီၣ်တခီ ယံၤဝဲဒီးမုၢ်နုာ်တခီအသိးန့ၣ် နဒုးယံၤထီၣ်ပတၢ်သရူးကမၣ်ဒီးပှၤလီၤ.” န့ၣ်လီၤ.

ဒ်အဆၢဖိ (၁၁) ပာ်ဖျါဝဲ “အဂ့ၢ်ဒ်အံၤ, တုၤသိးမူခိၣ်ကစီၤထီၣ်ဝဲလၢ ဟီၣ်ခိၣ် အဖီခိၣ်အသိးန့ၣ် အဘျုးအဖှိၣ်ဒိၣ်ဝဲ” အသိး, တၢ်သးကညီၤလၢ ယွၤဒုးနဲၣ်ဖျါထီၣ်ဝဲ လၢပဂီၢ်န့ၣ် ဟဲခီဖျိလၢ အတၢ်အဲၣ်အဒိၣ်အအါန့ၣ်လီၤ. ယိၤ ၁:၁၂ ပာ်ဖျါဝဲ ဒ်သိးယွၤကကိးက့ၤဝဲ “ဖဲဒၣ်ပှၤလၢအတူၢ်လိာ်အီၤ” တဖၣ်ဆူဟံၣ်န့ၣ်, ကစၢ်ယွၤ အတၢ်အဲၣ်အဒိၣ်အယိာ်အံၤ ကဟံးထီၣ်ကွံာ် ပတၢ်ဒဲးဘးအဂီၢ် ဒုးလဲၤကစၢ်ယ့ၣ်ရှူး ဆူထူၣ်စုညါအကျဲ, ဒီးတၢ်သွၣ်ခိၣ်အတၢ်ယိာ်ပူၤန့ၣ်လီၤ.

ထဲရံၣ် အတၢ်ကတိၤ, “ယွၤန့ၣ်ဂ့ၢ်တ့ၢ်မးလၢပဂီၢ်လံ” န့ၣ်ဘၣ်ဝဲန့ၣ်လီၤ. အတၢ်အဲၣ်, ဒီးအတၢ်ပျၢ်တၢ်ကမၣ်န့ၣ် လဲၤတလၢကွံာ် တၢ်အဒူၣ်အဆၢတဖၣ်လၢ ပဆိကမိၣ်တန့ၢ်, ဒီးဟ့ၣ်ပှၤတၢ်မူ အထူအယိာ်န့ၣ်လီၤ.