လၢတၢ်ကွဲးနီၣ်အပူၤ, ဘီး စ့ၣ်လဲမ် (Bob Salem) မ့ၢ်ပှၤအချ့ကတၢၢ်တဂၤလၢအဆီၣ်ထီၣ် သဘ့ဟီၣ်လာ်ဖိတဖျၢၣ် (မြေပဲ) လၢအနါစ့ၤ, ခီဖျိလၢတၢ်စဲထီဃာ် နီၣ်တၢၤတဘိ လၢအမဲာ်လိၤ ဆူ ပဲး ပံး (Pike’s Peak) ကစၢၢ်ဒီခိၣ်န့ၣ်လီၤ. ဒ်သိးဒီးကပဒ့ၣ်ဟးဆှဲး ပှၤကွၢ်ကီတၢ်တဖၣ်အတၢ်မၤတံာ်တာ်အဂီၢ်န့ၣ် ဘၣ်မၤဝဲလၢမုၢ်နၤခီ, ဒီးအဝဲမၤဝံၤတၢ်မၤတမံၤအံၤ လၢနွံသီအတီၢ်ပူၤန့ၣ်လီၤ. ဘီး မ့ၢ်ပှၤလွံၢ်ဂၤတဂၤလၢ အမၤဝံၤတၢ်မၤကီခဲတမံၤအံၤ, ဒီးအခီပညီမ့ၢ်ဝဲ ပှၤ “သူၣ်စူၤသးစူၤ” ဒိၣ်မး သၢဂၤ, လၢအမဲာ်ညါတဖၣ်န့ၣ် မၤတ့ၢ်လံဝဲတၢ်မၤအံၤန့ၣ်လီၤ.
ဘၣ်သ့ၣ်သ့ၣ် ပကစံးလၢ တၢ်လိၣ်ဘၣ်တၢ်သူၣ်စူၤသးစူၤ လၢတၢ်မၤအံၤအဂီၢ်န့ၣ် မ့ၢ်ဒၣ်တၢ်ဃုမၤကီမၤခဲပသးဒၣ်ဝဲဘၣ်ဆၣ်, လၢတၢ်အိၣ်မူအပူၤ အါစုအါဘျီန့ၣ်တမ့ၢ်တၢ်ဒ်သိးအံၤန့ၣ်ဘၣ်. ပ “လိၣ်” ဘၣ် တၢ်ဝံသးစူၤလီၤ. ဒ် ကလၤ ၅:၂၂ ပာ်ဖျါဝဲအသိး, တၢ်ဝံသးစူၤန့ၣ် မ့ၢ်သးအတၤသၣ်, ဒီးမ့ၢ်ပါရမံလုၢ်လၢ်အဂ့ၤ လၢပလိၣ်ဘၣ်နီၢ်နီၢ်, ဒီး ယၤ ၁:၄ ပာ်ဖျါဝဲ ဒ်သိးပက “လၢထီၣ်ပှဲၤထီၣ်, ဒီးအိၣ်ဒီးတၢ်ခဲလၢာ်, ဒီးတလီၤစှၤဘၣ်လၢတၢ်နီတမံဘၣ်” အဂီၢ်န့ၣ်လီၤ. ဖဲလၢပှၤအိၣ်ဝးတရံးတဖၣ် သူၣ်ကိၢ်သးဂီၤဒိၣ်မးအကတီၢ်န့ၣ်, ပှၤလၢအဝံသးစူၤတၢ်တဖၣ် ပာ်အသးမုာ်မုာ်န့ၣ်လီၤ. အဝဲသ့ၣ်အဲၣ်ဒိးလၢ တၢ်အိၣ် အသး ကလီၤဆီထီၣ်ဘၣ်ဆၣ်, တၢ်ဆီတလဲ မ့ၢ်တအိၣ်ဒၣ်လဲာ် လၢအဝဲသ့ၣ်အဂီၢ် တၢ်ဂ့ၢ်ကီတအိၣ်ဘၣ်. ဒ် ယၤ ၁:၅ ပာ်ဖျါဝဲအသိး အဝဲသ့ၣ် လဲၤတၢ်သပှၢ်ပှၢ် တုၤအကတၢၢ်, ဒ်သိးဒီးကမၤတၢ်လၢတၢ်ကူၣ်သ့အဂီၢ် နာ်ဝဲလၢယွၤကဟ့ၣ်လီၤတၢ်ကူၣ်သ့န့ၣ်လီၤ.
ပကမၤလိန့ၢ် တၢ်ဝံသးစူၤအဂီၢ် ကျဲအိၣ်ထဲတဘိဧိၤန့ၣ်လီၤ. ဖဲအဆၢဖိ ၃ န့ၣ်, စီၤယၤကိာ် စံးဝဲဒၣ်လၢ “တၢ်မၤကွၢ်သုတၢ်နာ်န့ၣ်, ဒုးအိၣ်ထီၣ်တၢ်ဝံသးစူၤလီၤ.” တၢ်မၤကွၢ် ဒ်သိးအံၤ ဟဲဝဲလၢ ကျဲအကလုာ်ကလုာ်န့ၣ်လီၤ. ယကွဲးတၢ်ဂ့ၢ်အံၤလၢ ကဘီယူၤသန့န့ၣ်လီၤ. ယကဘၣ်ဒိးကဘီယူၤ အဆၢကတီၢ်န့ၣ် မုၢ်နၤခီ ၁၁ နၣ်ရံၣ်ဘၣ်ဆၣ်တၢ်သုးအီၤဆူ ဂီၤ ခံ နၣ်ရံၣ်, ဝံၤန့ၣ်ဒီးတၢ်တြူာ်ကွံာ် ကဘီယူၤအတၢ်လဲၤန့ၣ်လီၤ. ဒီတနၤကျၢၤ ယတမံဘၣ်အဃိ. ခဲအံၤ ယဘၣ်သးအီ ခီဖံၣ် ဒီးမုၢ်လၢ်ယဲလၢ ယကက့ၤတုၤဟံၣ် ဖဲတၢ်ဆၢကတီၢ်လၢ ယတသ့ၣ်ညါလီၤတံၢ်ဘၣ်န့ၣ်လီၤ. လၢတၢ်မံခ့မံသပ့ၤအပူၤ ယတအဲၣ်ဒိးမၤလၢာ်ဂီၤမုၢ်နံၤ ဒီတနံၤကျၢၤလၢ ကဘီယူၤသန့အပူၤဘၣ်ဆၣ် ယပၢ်ယွၤလၢအအဲၣ်တၢ်တဂၤန့ၣ် သိၣ်လိယၤလၢ တၢ်ဝံသးစူၤန့ၣ်လီၤ.
ယထုကဖၣ်လၢ ယတၢ်မၤလိလၢ တနံၤအဂီၢ်အံၤ ကဝံၤဝဲဘၣ်ဆၣ်, မ့ၢ်မတၤတဲ ကသ့လဲၣ်. ပှၤအမံၤစရီအိၣ်ကတဲာ်ကတီၤအသးလၢ ကဘီယူၤလၢခံတခိၣ်အပူၤန့ၣ် ယကကွၢ်ထံမၤလီၤတံၢ်ယမံၤအဂီၢ်, အဆၢကတီၢ်ဘၣ်လံန့ၣ်လီၤ.
