လၢယတၢ်မၤလီၢ်န့ၣ်, ဖဲပှၤသံကွၢ်ယၤ မ့ၢ်ယကတူၢ်လိာ် မူဒါအသီဧါ အကတီၢ်န့ၣ်, ယအဲၣ်ဒိးစံးဆၢက့ၤ “ယတတူၢ်လိာ်ဘၣ်” န့ၣ်လီၤ. ယဆိကမိၣ်ထီၣ် တၢ်ကီတၢ်ခဲတဖၣ်, ဒီးယကဘှါဆှဲသုးကျဲၤ တၢ်ဂ့ၢ်ကီတဖၣ်အံၤအဂီၢ် ယသးကလၢၢ်ဘၣ်လၢ ယတတုၤထီၣ်ဘးဒံးဘၣ်န့ၣ်လီၤ. ဘၣ်ဆၣ် ဒ်ယဃ့ဘါထုကဖၣ်, ဒီးဃုထံၣ်န့ၢ် တၢ်နဲၣ်ကျဲ လၢလံာ်စီဆှံ, ဒီးလၢပှၤစူာ်က့ၤနာ်က့ၤတၢ် အဂုၤအဂၤတဖၣ်န့ၣ်ဒီး, ယသ့ၣ်ညါဘၣ် ကစၢ်ယွၤအဲၣ်ဒိးဝဲ ယကစံးဆၢ “မ့ၢ်” န့ၣ်လီၤ. ဘၣ်ထွဲဒီးကစၢ်ယွၤအတၢ်မၤစၢၤန့ၣ်, တၢ်မၤလီၤတံၢ်က့ၤယၤ ခီဖျိယွၤအကလုၢ်ကထါန့ၣ်လီၤ. လၢတၢ်န့ၣ်အဃိ, ယတူၢ်လိာ် တၢ်မၤအံၤ, ဘၣ်ဆၣ်, တၢ်ပျံၤတၢ်ဖုး အိၣ်ဒံးဝဲလၢယပူၤန့ၣ်လီၤ.
ယထံၣ်လီၤက့ၤယသးလၢ ပှၤအံၣ်စရ့လးဖိတဖၣ်, ဒီးပှၤလဲၤကွၢ်ဟုၣ်တၢ်အဂၤတဆံအလီၢ်, လၢအသံးက့ၤသးဆူခံ ဖဲအကလဲၤနုာ်လီၤဆူ ကီၢ်ကနၤဧၣ်န့ၣ်, ဖျါဖဲ ၄မိၤ ၁၃:၂၇-၂၉, ၃၁-၃၃, ၁၄:၁-၄ အပူၤန့ၣ်လီၤ. အဝဲသ့ၣ်ထံၣ်စ့ၢ်ကီးဝဲတၢ်ကီတၢ်ခဲတဖၣ်, ဒီးဆိကမိၣ်ဝဲလၢ မ့ၢ်အကမၤနၢၤ ပှၤအဆူၣ်တဖၣ်လၢကီၢ်အံၤအပူၤ, ဒီးကမၤနၢၤမၤဃၣ်ဝ့ၢ်တဖၣ် လၢအအိၣ်ဒီးတၢ်ဒူၣ်အထီတဖၣ် ကသ့ဒ်လဲၣ်န့ၣ်လီၤ. ဖဲ ၄မိၤ ၁၃:၃၃ န့ၣ်, ပှၤကွၢ်ဟုၣ်တၢ်တဖၣ်စံးဝဲ “ပမၤသးဒ် ဒွဲၣ်ဧိၤတြၤဧိၤအသိး,” ဒီးဖဲ ၄မိၤ ၁၄:၃ န့ၣ် ပှၤအံၣ်စရ့လးဖိတဖၣ် ကဒူးကဒ့ၣ်တၢ်ဒီးစံးဝဲ, “ယွၤဒုးဟဲပှၤဆူကီၢ်အံၤ ဒ်သိးပကလီၤဃံၤလၢ နးဧိၤဘီဧိၤ….န့ၣ်, မ့ၢ်အဘၣ်မနုၤလဲၣ်” န့ၣ်လီၤ.
ထဲစီၤကၤလ့းဒီးစီၤယိၤရှူဧိၤ သ့ၣ်နီၣ်ထီၣ်က့ၤ ယွၤအၢၣ်လီၤတ့ၢ်လံလၢ ကဟ့ၣ်လီၤဝဲ ကီၢ်ကနါဧၣ်အံၤ ဆူအပှၤဂီၢ်မုၢ်အဂ့ၢ်န့ၣ်, ဖျါဖဲ ၁ မိၤ ၁၇:၈, ၄မိၤ ၁၃:၂ အပူၤန့ၣ်လီၤ. အဝဲသ့ၣ်ဟံးန့ၢ် တၢ်နာ်န့ၢ်လီၤသး လၢယွၤအတၢ်အၢၣ်လီၤအပူၤ, ဒီးထံၣ်ဝဲလၢ ယွၤကအိၣ်ဒီးကမၤစၢၤအဝဲသ့ၣ်, ဖဲတၢ်ကီတၢ်ခဲလၢ အကဟဲတဖၣ်အကတီၢ်န့ၣ်လီၤ. ၄ မိၤရှ့ ၁၄:၆-၉ ပာ်ဖျါဝဲလၢ အဝဲသ့ၣ်ကွၢ်ဆၢၣ်မဲာ် တၢ်ကီတၢ်ခဲတဖၣ်အံၤတမ့ၢ်လၢ အကစၢ်ဒၣ်ဝဲဘၣ်, မ့မ့ၢ် လၢယွၤအစိကမီၤ, အတၢ်ဒီတဒၢကဟုကယာ်, ဒီးဂံၢ်ခီၣ်ထံးတဖၣ်န့ၣ်လီၤ.
တၢ်မၤလၢယွၤဟ့ၣ်ယၤန့ၣ် တမ့ၢ်တၢ်အဘီၣ်အညီဘၣ်ဆၣ်, ဒ်သိးယကမၤဝံၤဂ့ၤဂ့ၤဘၣ်ဘၣ်အဂီၢ် ယွၤမၤစၢၤယၤန့ၣ်လီၤ. တၢ်ဖံးတၢ်မၤတဖၣ် လၢယွၤဟ့ၣ်ပှၤန့ၣ်တမ့ၢ်လၢကပူၤဒီးတၢ်ကီတၢ်ခဲတဖၣ် ထီဘိဘၣ်ဆၣ်, ဒ်စီၤကၤလ့းဒီးစီၤယိၤရှူ အသိး, လၢတၢ်သ့ၣ်ညါ “ယွၤအိၣ်ဒီးပှၤ,” ဖျါဖဲအဆၢဖိ ၉ အသိး, ပကွၢ်ဆၢၣ်မဲာ် တၢ်ကီတၢ်ခဲတဖၣ်သ့ဝဲဒၣ်န့ၣ်လီၤ.
