စကီး (Scott) မ့ၢ်သူးစကီၤတဂၤ (sergeant) လၢဘြံးထံးရှ သုးမုၢ်အပူၤန့ၣ်လီၤ. လၢကီၢ်အဖကၣ်န့းစတၣ် (Afghanistan) န့ၣ် ဘၣ်ဟးဝ့ၤဝီၤ တၢ်လီၢ်အကီအခဲ လၢအတၤတၢ်တဖၣ် ဝံၤအလီၢ်ခံန့ၢ်, အဝဲအတၢ်အိၣ်မူ လီၤပှီၢ်ဝဲဒၣ်န့ၣ်လီၤ. စကီးသ့ၣ်နီၣ်ထီၣ်က့ၤဝဲ “ယအိၣ်ဆိးလၢ တၢ်လီၢ်ခံးသူတတီၤ” န့ၣ်လီၤ. ဘၣ်ဆၣ် ဖဲအဝဲ “ထံၣ်က့ၤကစၢ်ယ့ၣ်ရှူး, ဒီးစးထီၣ်ပိာ်ဝဲအခံ” န့ၣ်ဒီး, အတၢ်အိၣ်မူလဲလိာ်ကွံာ်ဝဲဒၣ်လၢာ်လၢာ်ဆ့ဆ့န့ၣ်လီၤ. ခဲကနံၣ်အံၤ, အဝဲဂုာ်ကျဲးစၢၤနီၤဟ့ၣ် ကစၢ်ခရံာ်အတၢ်အဲၣ်ဆူပှၤဂၤတဖၣ်အအိၣ်, လီၤဆီဒၣ်တၢ် ပှၤမၤတ့ၢ် သုးအတၢ်မၤတဖၣ်, လၢအပြၢ သကိးတၢ်ဒီးအီၤ, သုးဖိလၢအဘၣ်ဒိဘၢၣ်ထံးတဖၣ်, ဒီးပှၤလၢအမၤတ့ၢ်တၢ်လၢ သုးအတၢ်မၤတဖၣ်အဂီၢ် လၢဟီၣ်ခိၣ်ဒီဘ့ၣ် တၢ်ပြၢ (Invictus Games) န့ၣ်လီၤ.
တချုးလၢ စကီးလဲၤဝဲဆူ တၢ်လိာ်ကွဲပြၢအံၤန့ၣ်, အဝဲဟံးန့ၢ်နီၢ်သးဂံၢ်ဘါလၢတၢ်ဖးလံာ်စီဆှံ, တၢ်ထုကဖၣ်, ဒီးတၢ်ဒိကနၣ် တၢ်ဘူၣ်တၢ်ဘါ အတၢ်သူၣ်ဝံၣ်သးဆၢတဖၣ်န့ၣ်လီၤ. မ့ၢ်ဝံၤန့ၣ်ဒီး, ယွၤမၤစၢၤအီၤ ဒ်သိး “ကကွၢ်ထံဆိကမိၣ်က့ၤ ကစၢ်ယ့ၣ်ရှူး အသကဲးပဝးကံၢ်စီ, ဒီးကဒုးနဲၣ်တၢ်အဲၣ်သူၣ်ကညီၤသးကညီၤတၢ်, တၢ်သူၣ်စူၤသးစူၤ, ဒီးတၢ်ဘျုးတၢ်ဖှိၣ်” ဆူပှၤပြၢသကိးတၢ်ဒီးအီၤတဖၣ်န့ၣ်လီၤ.
ဖဲအံၤန့ၣ် စကီး ယၢၤထီၣ်ဝဲ သးအတၤသၣ်တနီၤ, လၢတၢ်မၢဖိစီၤပီလူးကွဲးဝဲဆူ ဝ့ၢ်ကလၤတံ အပှၤစူာ်က့ၤနာ်က့ၤတၢ်ဖိတဖၣ်အအိၣ်န့ၣ်လီၤ. လၢသရၣ်ဘျၣ်တဖၣ် အတၢ်သိၣ်လိနဲၣ်လိ လုၢ်ဘၢတၢ်အဖီလာ်န့ၣ် အဝဲသ့ၣ်ဘၣ်ဂဲၤလိာ်ဝဲအဃိ, ကလၤ ၅:၁၆ န့ၣ် စီၤပီလူး ဟ့ၣ်ဂံၢ်ဟ့ၣ်ဘါအဝဲသ့ၣ်လၢ ကအိၣ်တီအိၣ်လိၤဒီးယွၤ, ဒီးယွၤအဘျုးအဖှိၣ်အပူၤ, ဒ်သိး “ကလဲၤတၢ်လၢ ယွၤအသးအပူၤ” န့ၣ်လီၤ. အဝဲသ့ၣ် မ့ၢ်မၤဝဲဒ်န့ၣ်ဒီး, ကသၣ်ထီၣ် သးအတၤသၣ်တဖၣ်, လၢအမ့ၢ် ” တၢ်အဲၣ်တၢ်ကွံ, တၢ်သူၣ်ခုသးခု, တၢ်ဃူတၢ်ဖှိၣ်, တၢ်ဝံသးစူၤ, တၢ်သူၣ်စူၤသးစူၤ, တၢ်မၤဂ့ၤတၢ်, တၢ်စူၢ်တၢ်နာ်, တၢ်ဆီၣ်လီၤပသး, တၢ်ကီၤသူၣ်ကီၤသး” သ့ၣ်တဖၣ်န့ၣ်လီၤ.
ယွၤအသးမ့ၢ်အိၣ်ဆိးဝဲလၢပပူၤန့ၣ်ဒီး, သးစီဆှံအတၢ်ဂ့ၤတၢ်ဝါ, ဒီးအတၢ်အဲၣ်တၢ်ကွံန့ၣ် ကပှဲၤလုၢ်ကွံာ်ဝဲလၢပသးပူၤစ့ၢ်ကီးန့ၣ်လီၤ. ပဝဲစ့ၢ်ကီး ပကဒုးနဲၣ်ဖျါထီၣ် တၢ်သူၣ်စူၤသးစူၤ, ဒီးတၢ်အဲၣ်သူၣ်ကညီၤသးကညီၤတၢ်ဆူ ပှၤလၢပခိၣ်ပဃၢၤဝးဝးတဖၣ်အအိၣ်န့ၣ်တက့ၢ်.
