ကိးနံၣ်ဒဲး, ယမါသးဘိဒီးယၤ ပလဲၤယီၢ်ဒိးပလ့ၣ်ယီၢ်လၢကျဲဖိဆံးတဖၣ်လၢ မံးခၠံၣ်ကၣ် မုၢ်နုာ် (West Michigan) အဃၢၤဝးဝး, ဒီးပလ့ၣ်ယီၢ်အတၢ်လဲၤန့ၣ် မံးလာ်တဖၣ် အါထီၣ်လၢအကယၤန့ၣ်လီၤ. ဒ်သိးပကမၤဂ့ၤထီၣ်ပတၢ်လဲၤခီဖျိအဂီၢ်, ပစဲထီဃာ် ပိးလီဖိတဖၣ် လၢပလ့ၣ်ယီၢ်တဖၣ်အလိၤန့ၣ်လီၤ. စူ (Sue) အလ့ၣ်ယီၢ်အမဲာ်ညါဒီးအလီၢ်ခံန့ၣ် အိၣ်ဒီးမ့ၣ်အူဒၢ, အီၣ်ဒိၢ်မံထၢၢ် (Odometer) (နီၣ်ထိၣ်လ့ၣ်အတၢ်လဲၤအယံၤ) တဖျၢၣ်, ဒီးလ့ၣ်ယီၢ် အနီၣ်ဝံာ်ဒၢန့ၣ်လီၤ. မ့မ့ၢ်ယလ့ၣ်ယီၢ်န့ၣ် အိၣ်ဝဲဒီးတၢ်ပာ်ထံအီပလီ အလီၢ်န့ၣ်လီၤ. နီၢ်နီၢ်န့ၣ်, ပမ့ၢ်တထီဃာ် တၢ်ပိးတၢ်လီတဖၣ်အံၤဒၣ်ကယၢာ်, ကိးနံၤဒဲးန့ၣ် ပလဲၤတၢ်လီၢ်တတီၤဘၣ်တတီၤသ့ဝဲဂ့ၤဂ့ၤ, ဒီးပာ်ဖှိၣ်မံးလာ်တဖၣ်ခဲလၢာ်သ့ဝဲန့ၣ်လီၤ.

ပိးလီဖိတဖၣ်အံၤ ကဲထီၣ်တၢ်မၤစၢၤဘၣ်ဆၣ်, ပကစိာ် မ့ၢ်ဂ့ၤ ပတစိာ် မ့ၢ်ဂ့ၤန့ၣ် မ့ၢ်ဒၣ် ပတၢ်ဃုထၢန့ၣ်လီၤ. လံာ်အ့းဖ့းစူးအပူၤန့ၣ်, တၢ်မၢဖိ စီၤပီလူး ကွဲးပာ်ဖျါဝဲ ပိးလီကယၢအဂၤတကရူၢ်အဂ့ၢ်- ဘၣ်ဆၣ် တၢ်သ့ၣ်တဖၣ်အံၤ တမ့ၢ်လၢ ပကဘၣ်ဃုထၢအီၤဘၣ်. ပကအိၣ်မူပိာ်ထွဲ ပတၢ်စူၢ်တၢ်နာ်လၢ ကစၢ်ယ့ၣ်ရှူးအပူၤ ဂ့ၤဂ့ၤဘၣ်ဘၣ်အဂီၢ် စီၤပီလူးစံးဝဲလၢ ပကဘၣ် “သိးထီၣ်” တၢ်တဖၣ်အံၤန့ၣ်လီၤ. ပတၢ်အိၣ်မူအတၢ်လဲၤတဖၣ်န့ၣ် တမ့ၢ်တၢ်အဘီၣ်အညီဘၣ်. ဒ်လံာ်အ့းဖ့းစူး ၆:၁၁ ပာ်ဖျါဝဲအသိး, ပအိၣ်မူအိၣ်ဂဲၤလၢ ပကဘၣ် “ထီဒါမုၢ်ကီၤလံၢ် အတၢ်လီတၢ်ဝ့ၤ,” အတၢ်ဒုးတၢ်ယၤအပူၤအဃိ, ပကဘၣ်အိၣ်ကတဲာ်ကတီၤဃာ်ပသးဂ့ၤဂ့ၤန့ၣ်လီၤ.

လံာ်စီဆှံအတၢ်ကူၣ်သ့ မ့ၢ်တအိၣ်ဘၣ်န့ၣ်, ပသးကဒံဝ့ၤဒံဝီၤ, ဒီးတူၢ်လိာ်တၢ်လၢအကမၣ်သ့ဝဲန့ၣ်လီၤ. အဆၢဖိ ၁၄ ပာ်ဖျါဝဲလၢ ပကအိၣ်မူပိာ်ထွဲအ “တၢ်မ့ၢ်တၢ်တီ” အဂီၢ်, ကစၢ်ယ့ၣ်ရှူး မ့ၢ်တမၤစၢၤပှၤဘၣ်န့ၣ်ဒီး, ပကပျဲနုာ် တၢ်လီတၢ်ဝ့ၤတဖၣ်ဆူ ပတၢ်အိၣ်မူ အပူၤန့ၣ်လီၤ. အဆၢဖိ ၁၅ ပာ်ဖျါဝဲ, “တၢ်သးခုကစီၣ်” မ့ၢ်တအိၣ်ဘၣ်န့ၣ်, “တၢ်ဃူတၢ်ဖှိး” တအိၣ်လၢပတၢ်အိၣ်မူအပူၤဘၣ်. အဆၢဖိ ၁၆ ပာ်ဖျါဝဲ “တၢ်စူၢ်တၢ်နာ်” လၢကဒီတဒၢပှၤ မ့ၢ်တအိၣ်ဘၣ်န့ၣ်ဒီး, ပကဒံဝ့ၤဒံဝီၤလၢ တၢ်သးဒ့ဒီအပူၤန့ၣ်လီၤ. အဆၢဖိ ၁၇ စံးဘၣ်ပှၤ, ပ “တၢ်အုၣ်က့ၤခီၣ်က့ၤ,” ဒီးသးမုာ်စီဆှံ ဆီလီၤပှၤ ဂၢၢ်ဂၢၢ်ကျၢၤကျၢၤ, ဒ်သိးပကအိၣ်မူအိၣ်ဂဲၤ ဂ့ၤဂ့ၤဘၣ်ဘၣ်လၢယွၤအဂီၢ်န့ၣ်လီၤ. တၢ်အံၤမ့ၢ် ပသဃိးကတီၤန့ၣ်လီၤ.

လၢသးသမူအတၢ်လဲၤကျဲအပူၤ, တၢ်အကါဒိၣ်နီၢ်မးလၢ ပကဘၣ်တၢ်ဒီဒၣ်ဃာ်ပှၤလၢ တၢ်လီၤဘၣ်ယိၣ်နီၢ်နီၢ်န့ၣ်လီၤ. ပဘၣ်တၢ်ဒီတဒၢဃာ်ပှၤ ဖဲခရံာ်ကတဲာ်ကတီၤန့ၢ်ပှၤ တၢ်တၤတဖၣ် လၢအအိၣ်လၢကျဲဒီဘိညါ အပူၤအကတီၢ်, ဖဲပ “သိးထီၣ်” သဃိးလၢ ယွၤကတဲာ်ကတီၤန့ၢ်ပှၤအခါန့ၣ်လီၤ.