တချုးလၢ ပဒိးတ့ဒိးဖျီပသး ပမၤမူးသးဖှံ (wedding shower) အကတီၢ်န့ၣ်, ပှၤဟဲစိာ်ဟ့ၣ်တၢ်ဟ့ၣ်တဖၣ်အကျါ ပတံၤသကိး ဒ့း (Dave) လၢအမဲာ်ဆှးသ့တဂၤ, ဖီၣ်ဃာ်ဝဲတၢ်ဘိၣ်ထီထီတဘိၣ် လၢအဘၣ်တၢ်ဘိၣ်ဘံဃာ်အီၤလၢ စးခိကဘျံး ဘူတလါဖိ, ဒီးဆၢထၢၣ်အိၣ်ဝဲဖဲတၢ်အသနၢၣ်န့ၣ်လီၤ. ဖဲတၢ်ဆၢကတီၢ်ဘၣ်ဝဲလၢ အဝဲကဘၣ်ဟ့ၣ်အတၢ်ဟ့ၣ်န့ၣ်ဒီး, အဝဲဟဲဟ့ၣ်အတၢ်ဟ့ၣ်ဖိန့ၣ်လီၤ. အံဘၢၣ် (Evan) ဒီးယၤ ပအိးထီၣ် အတၢ်ဟ့ၣ်ဖိအံၤန့ၣ်ဒီး, ပထံၣ် သ့ၣ်ကျီၣ်ထီထီဖိလၢ အဘၣ်တၢ်စိးပျၤအီၤကဝီၤကျီၤဖိလၢစု ဂ့ၤဂ့ၤဘၣ်ဘၣ်, ဒီးတၢ်ကတိၤ, “ယွၤအတၢ်လီၤလးတနီၤ မ့ၢ်တၢ်ဆံးဆံးဖိလီၤ” န့ၣ် ဘၣ်တၢ်စိးပျၤအီၤလၢ သ့ၣ်ကျီၣ်အလိၤ န့ၣ်လီၤ. သ့ၣ်ကျီၣ်ဖိအံၤ ဘၣ်တၢ်ဘျးလီၤစဲၤအီၤလၢ ပဟံၣ်န့ၣ်အိၣ်ဝဲ ၄၅ နံၣ်လံ, ဒီးတလီၢ်လီၢ်န့ၣ် ဒုးသ့ၣ်နီၣ်ထီၣ်ပှၤလၢ တၢ်ဆံးဆံးဖိတဖၣ်အပူၤဒၣ်လဲၣ် ယွၤမၤတၢ်န့ၣ်လီၤ. ကျိာ်စ့လၢတၢ်ကဘၣ်ဟ့ၣ် ဒ့ၣ်ကမၣ်တဖၣ်, ယွၤကတဲာ်ကတီၤန့ၢ်တၢ်အီၣ်တၢ်အီ, ယွၤမၤဘျါက့ၤပှၤလၢ တၢ်ဆူးတၢ်ဆါ, တၢ်သ့ၣ်တဖၣ်အံၤ ပမ့ၢ်ပာ်ဖှိၣ်ဂံၢ်ထီၣ်ခဲလၢာ်န့ၣ်ဒီး, ယွၤအတၢ်အံးထွဲကွၢ်ထွဲပှၤန့ၣ် မ့ၢ်တၢ်လၢအလီၤကမၢကမၣ်န့ၣ်လီၤ.

ဘၣ်ထွဲဒီး တၢ်သူၣ်ထီၣ်က့ၤ ဝ့ၢ်ယရူၤရှလ့ၣ်, ဒီးတၢ်လုၢ်ဟံၣ်အဂီၢ်, ယူဒၤ အပဒိၣ်, စီၤစရူဘၤဘ့လး, ဒိးန့ၢ်ဝဲ တၢ်ကစီၣ်ဒ်သိးအံၤ လၢယွၤအအိၣ် ခီဖျိလၢ ဝံစကၤရယၤန့ၣ်လီၤ. ဘၤဘူလိၣ်တၢ်စိာ်မၢကဲကုၢ်ဝံၤအလီၢ်ခံ, ဖဲပှၤအံၣ်စရ့လးဖိတဖၣ် ဟဲက့ၤဆူအထံအကီၢ်န့ၣ်ဒီး, တၢ်လဲၤထီၣ်လဲၤထီ ဆံးစှၤဝဲလၢအဝဲသ့ၣ် အဂီၢ်အဃိ, ပှၤဂီၢ်မုၢ်တဖၣ် အသးဟးဂီၤဝဲဒၣ်န့ၣ်လီၤ. စကၤ ၄:၁၀ အပူၤန့ၣ်, ယွၤဘိးဘၣ်သ့ၣ်ညါဝဲလၢ “မ့ၢ်မတၤတပာ်ကဲဘၣ် တၢ်အဆံးတဖၣ် အမုၢ်တနံၤန့ၣ် တဂၤလဲၣ်” န့ၣ်လီၤ. တၢ်လၢကစၢ်ယွၤအတၢ်သးအိၣ်တဖၣ်န့ၣ် မၤလၢထီၣ်ပှဲၤထီၣ်ဝဲဒၣ် ခီဖျိလၢပှၤ, ဒီးဘၣ်တဘျီဘျီန့ၣ်, တမ့ၢ်ဒီးပှၤဘၣ်န့ၣ်လီၤ. စကၤ ၄:၆ ပာ်ဖျါထီၣ်ဝဲ, “တမ့ၢ်ဘၣ်လၢတၢ်အဂံၢ်အဘါဘၣ်, တမ့ၢ်ဘၣ်လၢ တၢ်အစိအကမီၤဘၣ်, မ့ၢ်လၢယသးလီၤ, တၢ်သုးမုၢ်ဂီၢ်မုၢ်အယွၤစံးဝဲဒၣ်” န့ၣ်လီၤ.

ပတၢ်အိၣ်မူအပူၤ, ဒီးပခိၣ်ပဃၢၤဝးဝးန့ၣ်, ဖျါလၢယွၤအတၢ်မၤတဖၣ် ကဆံးစှၤဝဲအဃိ, ပတၢ်သးဟးဂီၤ မ့ၢ်ဒိၣ်ထီၣ်အါထီၣ်န့ၣ်ဒီး, ယွၤအတၢ်မၤလီၤလးတနီၤန့ၣ် မ့ၢ်တၢ်လၢ “အဆံးတဖၣ်” လီၤန့ၣ် မ်ပကသ့ၣ်နီၣ်ထီၣ်က့ၤတက့ၢ်. ဒ်သိးကစၢ်ယွၤ ကသူၣ်ထီၣ် အတၢ်ပညိၣ်အဒိၣ်အထီတဖၣ်အဂီၢ်, ယွၤသုဝဲ တၢ်လၢအဆံးတဖၣ်န့ၣ်လီၤ.