ပတံၤသကိးတနီၤ မုၢ်လၢ်ဝဲလၢ တၢ်ထိၣ်ဒွးဆိ ကလံၤမုၢ်တၢ်ကစီၣ် ကဆီတလဲအဂီၢ်, ဒီးဒိးလိာ်ကွဲသကိးချံ ဖဲအဲကလံး ထံအကျိၤန့ၣ်လီၤ. ဘၣ်ဆၣ် ကလံၤဆူၣ်ထီၣ်, ဒီး လပီတဖၣ် ဆှဲးဆှိးအါထီၣ်, ဒီးတၢ်ဘံၣ်တၢ်ဘၢလၢအချံအဂီၢ်န့ၣ် တၢ်ဘၣ်ယိၣ်အလီၢ်အိၣ်ထီၣ်အဃိ ဆှၢလီၤလီတၢ်ကစီၣ်ဆူ “ထံကီၢ် တၢ်မၤစၢၤအုၣ်ခီၣ်က့ၤတၢ် ချံကရၢ” RNLI (the Royal National Lifeboat Institution) ဒ်သိးကဟဲမၤစၢၤ အဝဲသ့ၣ် န့ၣ်လီၤ. တၢ်ကီတၢ်ခဲဖးဒိၣ် အကတီၢ် ဝံၤအလီၢ်ခံ, လၢအယံၤန့ၣ် အဝဲသ့ၣ် ထံၣ်စိ ပှၤဟဲမၤစၢၤတၢ်တဖုအဃိ, အဝဲသ့ၣ်အသးကလၢၢ်ဘၣ်ဝဲလၢ တယံာ်ဘၣ်န့ၣ် ကပူၤဖျဲးလၢ တၢ်ကီတၢ်ခဲအံၤန့ၣ်လီၤ. လၢခံန့ၣ်ဒီး, ယတံၤသကိးတဂၤ စံးဘျုးက့ၤဝဲလၢ, “ပှၤကညီတဖၣ် ဒိကနၣ်ပိာ်ထွဲ ပီၣ်လဲၣ်အတၢ်ဘျၢ မ့ၢ်ဂ့ၤ တပိာ်ထွဲ မ့ၢ်ဂ့ၤ “ထံကီၢ်တၢ်မၤစၢၤ အုၣ်ခီၣ်က့ၤတၢ် ချံကရၢ” (RNLT) ကဟဲဃုမၤစၢၤက့ၤ အဝဲသ့ၣ်” ထီဘိန့ၣ်လီၤ.
ဖဲအဝဲပာ်ဖျါထီၣ်က့ၤ တၢ်ဂ့ၢ်ဖိအံၤန့ၣ်ဒီး, ယဆိကမိၣ်ထီၣ်က့ၤ ကစၢ်ယ့ၣ်ရှူးအတၢ်ကဲခိၣ်ကဲနၢ်လၢ ကစၢ်ယွၤအတၢ်လူၤဃု, ဒီးမၤစၢၤက့ၤ တၢ်မၤအံၤဒ်လဲၣ် န့ၣ်လီၤ. ကစၢ်ယ့ၣ်ရှူး ဟဲလီၤဝဲဆူဟီၣ်ခိၣ်ချၢ ဒ်ပှၤကညီတဂၤအသိး, ဒီးအိၣ်မူအိၣ်ဂဲၤဝဲလၢပှၤကညီတဖၣ်အကျါန့ၣ်လီၤ. ဖဲလၢပတၢ်ဒဲးဘး, ဒီးတၢ်တဒိကနၣ်တၢ်န့ၣ် ထုးဖးပှၤဒီးယွၤအကတီၢ်, ကတဲာ်ကတီၤန့ၢ်ပှၤ တၢ်ပှ့ၤက့ၤပှၤအတၢ်ရဲၣ် တၢ်ကျဲၤ, ခီဖျိလၢအတၢ်သံ, ဒီးအတၢ်ဂဲၤဆၢထၢၣ်သမူထီၣ်က့ၤန့ၣ်လီၤ. တၢ်မၢဖိ စီၤပီလူး မၤဂၢၢ်မၤကျၢၤ တၢ်မ့ၢ်တၢ်တီအံၤ ဖဲအကွဲးဆှၢလီၤဝဲဆူ ကလၤတံ တၢ်အိၣ်ဖှိၣ်, ဒီးစံးဝဲ, “မ့ၢ်လၢယ့ၣ်ရှူးခရံာ်… ဟ့ၣ်လီၤအသးဒၣ်ဝဲလၢ ပတၢ်ဒဲးဘးအဃိ, ဒ်သိးအကထုးထီၣ်န့ၢ်ပှၤလၢ အအံၤတဃၣ်လၢအအၢအပူၤ” န့ၣ်လီၤ (ကလၤ ၁:၃-၄). စီၤပီလူး ဒုးသ့ၣ်နီၣ်ဝဲဒၣ် ပှၤကလၤတံဖိတဖၣ်, ခီဖျိလၢကစၢ်ယ့ၣ်ရှူးအတၢ်သံ, ဒီးအဝဲသ့ၣ် ဒိးန့ၢ်ဘၣ်တၢ်ဟ့ၣ်, လၢအမ့ၢ် တၢ်မူအသီအံၤအဃိ, အဝဲသ့ၣ်ကြၢးမၤလၤကပီၤယွၤ ကိးမုၢ်နံၤဒဲးန့ၣ်လီၤ.
ကစၢ်ယ့ၣ်ရှူး, လၢအမ့ၢ်တၢ်အုၣ်ခီၣ်ကစၢ်တဂၤန့ၣ်, ဒ်သိး ကအုၣ်က့ၤခီၣ်က့ၤပှၤလၢအလီၤမၢ်တဖၣ်အဂီၢ်, လၢတၢ်သူၣ်အိၣ်သးအိၣ်အပူၤန့ၣ် ဟ့ၣ်လီၤအသးသမူလၢပဂီၢ်န့ၣ်လီၤ. မ့ၢ်လၢအဝဲမၤတၢ်ဒ်သိးအံၤအဃိ, ပဒိးန့ၢ်ဘၣ်တၢ်မူ လၢမူခိၣ်ဘီမုာ်, ဒီးလၢတၢ်သ့ၣ်ညါ စံးဘျုးစံးဖှိၣ်က့ၤအီၤအဂီၢ်, ပကဟ့ၣ်ခီဟ့ၣ်နီၤ တၢ်အုၣ်က့ၤခီၣ်က့ၤ-သးသမူ အတၢ်ကစီၣ်အံၤဆူ ပပှၤတဝၢအပူၤန့ၣ်လီၤ.
