လၢကီၢ်အဲကလံးအပူၤ, ကီး လ့ဒ့းစ်ဖါန် (Lindisfarne) န့ၣ် ဘၣ်တၢ်သ့ၣ်ညါ စ့ၢ်ကီးအီၤ “ကီးစီဆှံ,” လၢအမ့ၢ်ကီးဖိလၢ အဘျးစဲလိာ်အသးဒီးကီၢ်မိၢ်ပှၢ်လၢကျဲဆံးဆံးဖိန့ၣ်လီၤ. ကျဲဖိအံၤ ပီၣ်လဲၣ်ထံလုာ်ဘၢဝဲ တသီန့ၣ်ခံဘျီန့ၣ်လီၤ. ဖဲထံထီၣ်အကတီၢ်, တၢ်ခီဂာ်ကျဲဖိအံၤ မ့ၢ်တၢ်လီၤဘၣ်ယိၣ်အဂ့ၢ်န့ၣ် တၢ်ဟ့ၣ်ပလီၢ်အပနီၣ်တဖၣ် ဒုးသ့ၣ်ညါဝဲဒၣ် ပှၤလဲၤဟးလိာ်ကွဲ, ကွၢ်ကီတၢ်ဖိတဖၣ်န့ၣ်လီၤ. ဘၣ်ဆၣ်, ပှၤလဲၤကွၢ်ကီတၢ်ဖိတဖၣ် တကနၣ်ဃုာ်တၢ်ပနီၣ်တဖၣ်အဃိ, ဒ်သိးပှၤကဟဲမၤစၢၤ အဝဲသ့ၣ်အဂီၢ် ဘၣ်ဆ့ၣ်နီၤအိၣ်ခိးဝဲလၢ သိလ့ၣ်လီၤဘျၢတကူာ်တဝာ်အဖီခိၣ်, မ့တမ့ၢ် ဘၣ်ပီၢ်ထံဆူ တၢ်အိၣ်တဒၢ အဒဲဖိတဖၣ် တလီၢ်လီၢ်န့ၣ်လီၤ. ဒ်မုၢ်ဟဲထီၣ်-မုၢ်နုာ်လီၤန့ၣ် လီၤတံၢ်ဝဲအသိး, ထံထီၣ်-ထံလီၤ မ့ၢ်တၢ်လၢပထိၣ်ဒွးသ့ဝဲဒၣ်န့ၣ်လီၤ. တၢ်ပနီၣ်ဟ့ၣ်ပလီၢ်တဖၣ် အိၣ်ဝဲလၢ တၢ်လဲၤကျဲကိးပူၤဒဲးအဃိ, ပှၤတထံၣ်ဘၣ်န့ၣ် အလီၢ်တအိၣ်ဘၣ်. ဘၣ်ဆၣ်, ဒ်ပှၤကွဲးတၢ်တဂၤ ပာ်ဖျါဝဲအသိး, လ့ဒ့းစ်ဖါန် အကီးမ့ၢ်, “တၢ်လီၢ်လၢ ပှၤတပလီၢ်သူၣ်ပလီၢ်သးတဖၣ် ဘၣ်ဂုၢ်ကျဲးစၢးဃ့ၢ်ဝဲဒီး ထံထီၣ်ထံလီၤ” န့ၣ်လီၤ.

လံာ်ကတိၤဒိ ၁၄:၁၆ ပာ်ဖျါဝဲ ပှၤဟးဂီၤဖိတဖၣ်န့ၣ်, မ့ၢ်ပှၤ “တပလီၢ်သူၣ်ပလီၢ်သး, ဒီးမၤကြီတၢ်” န့ၣ်လီၤ. အဆၢဖိ ၇-၈ ပာ်ဖျါဝဲ ပှၤလၢတပလီၢ်အသးတဂၤန့ၣ်, ဘၣ်ထွဲဒီးတၢ်ကူၣ်သ့ မ့ၢ်ဂ့ၤ တၢ်ဟ့ၣ်ကူၣ်တဖၣ် မ့ၢ်ဂ့ၤ တကနၣ်ဃုာ်ဝဲဘၣ်. တၢ်ဒိးသူၣ်ပာ်သး မ့ၢ်ဂ့ၤ တၢ်မၤစၢၤပှၤဂုၤပှၤဂၤ မ့ၢ်ဂ့ၤ တအိၣ်ဘၣ်န့ၣ်လီၤ. ဘၣ်ဆၣ်, အဆၢဖိ ၁၆ ပာ်ဖျါထီၣ်ဝဲ, ခီဖျိလၢပသးကလၢၢ်ဘၣ်တၢ်တမံၤမံၤအပူၤ, မ့တမ့ၢ် ခီဖျိလၢတၢ်တအိၣ်ဒီးတၢ်ပာ်လီၤသး လီၤတံၢ်လီၤဆဲးတမံၤမံၤအပူၤ, မ်ပသုတမၤဆၢက့ၤတၢ်အဆိအချ့အဂီၢ် တၢ်ကူၣ်သ့န့ၣ် မၤဃၢလီၤ, မၤစှၤလီၤ ပဂံၢ်အသဟီၣ်လၢအချ့, ဒ်သိးပကဒိကနၣ်, ဒီးကွၢ်ထံဆိကမိၣ်က့ၤတၢ်အဂီၢ်န့ၣ်လီၤ. တၢ်ကူၣ်သ့ သိၣ်လိပှၤလၢ ပကသံကွၢ် တၢ်သံကွၢ်လၢအဂ့ၤ, ဒီးဆိကမိၣ်ကွၢ်ထံက့ၤ ပတၢ်မၤတဖၣ်န့ၣ်လီၤ. လၢတၢ်တကနာ်ဃုာ် တၢ်ရ့လိာ်ဘၣ်ထွဲ, မ့တမ့ၢ် တၢ်လၢကဟဲပိာ်ထွဲထီၣ်အသးတဖၣ်- ဘၣ်တဘျီဘျီ တၢ်မ့ၢ်တၢ်တီ, ကမ့ၢ်ဒ်လဲၣ်ဂ့ၤန့ၣ် ပှၤလၢတပလီၢ်အသးတဖၣ်န့ၣ်မၤကြီတၢ်ဆူညါန့ၣ်လီၤ. အဆၢဖိ ၁၅ ပာ်ဖျါထီၣ်ဝဲ “မ့မ့ၢ်, ပှၤလၢအသူၣ်ဆးသးဆးတဖၣ် ပလီၢ်ပဒီအသးအခီၣ်ကါ” (ခ့ခါ-ကညီစှီၤကျိာ်) န့ၣ်လီၤ.

ဘၣ်တဘျီဘျီ, အလီၢ်အိၣ်လၢ ပကဘၣ် မၤဝံၤတၢ် မ့တမ့ၢ် ပဘၣ်မၤချ့ချ့အခါ, ပကမၤဘၣ် လၢတၢ်တပလီၢ်သးပူၤန့ၣ်လီၤ. ဖဲပဒိးန့ၢ်ဒီးမၤထွဲ ယွၤအတၢ်ကူၣ်ဘၣ်ကူၣ်သ့န့ၣ်, အဝဲကဟ့ၣ် ပှၤတၢ်နဲၣ်ကျဲလၢ ပလိၣ်ဘၣ်န့ၣ်လီၤ.