ဖဲအသးအိၣ် (၁၁) နံၣ်န့ၣ် ဆိဖံၣ်ယၤ ရီဘၢး (Sophia Roberts) ထံၣ်ဘၣ်ဝဲ တၢ်ကွဲးကါ ပှၤအသးအဆိကတၢၢ်တဘျီန့ၣ်လီၤ. တၢ်ကွဲးကါဒ်သိးအံၤန့ၣ် ဆံတနံၣ် ဖိသၣ်ဖိတဂၤ အဂီၢ် တမ့ၢ်လၢအကြၢးထံၣ်ဘၣ်ဝဲဘၣ်ဆၣ်, တၢ်လၢပကြၢးသ့ၣ်ညါတမံၤန့ၣ် အပၢ်, ဟါရိၣ် ရီဘၢး ကၠူနယၢၣ် (Dr. Harold Roberts Jr.) မ့ၢ် ကသံၣ်သရၣ်ဖးဒိၣ်လၢ အကွဲးကါပှၤကညီအသးတဂၤန့ၣ်လီၤ. ၂၀၂၂ နံၣ်န့ၣ်, ဖဲ ဆိဖံၣ်ယၤ အသးအိၣ် အနံၣ် ၃၀ န့ၣ်, ကဲထီၣ် ကသံၣ်သရၣ် ကွဲးကါတၢ်တဂၤ, ဒီးမၤသကိးတၢ်ဒီးအပၢ်, လၢတၢ်ကွဲးကါဆိတလဲက့ၤ သးအတြဲၤဖိလၢ အပျဲလီၤတၢ်သွံၣ်န့ၣ်လီၤ. ဟါရိၣ် စံးဝဲဒၣ်, “တၢ်လၢအဂ့ၤန့ၢ်တၢ်အံၤ ကအိၣ်မနုၤလဲၣ်” ဖိသၣ်ဖိအံၤ ကဒိးဝဲ လ့ၣ်ယီၢ်ဒ်လဲၣ်န့ၣ် ယသိၣ်လိအီၤ………… ဒီးခဲကနံၣ်အံၤ, တၢ်ကွဲးကါပှၤကညီအသးဒ်လဲၣ်န့ၣ် ယဘၣ်သိၣ်လိအီၤအဃိ, မ့ၢ်တၢ်လၢ အလီၤကမၢကမၣ်ဖးဒိၣ်န့ၣ်လီၤ.”
ပဝဲတနီ ဖဲပသိၣ်လိဖိသၣ်ဆံးဖိ လၢတၢ်ကွဲးကါ ပှၤကညီအသးဒ်လဲၣ်အကတီၢ်, စီၤပၤ စီၤရှလိၤမိၤ ဒုးနဲၣ်ပာ်ဖျါဝဲ တၢ်သိၣ်လိသီလိလၢအကါဒိၣ်တမံၤ, ဆူခါဆူညါ ဖိလံၤတဖၣ်အဂီၢ်, လၢအမ့ၢ်- တၢ်မၤလၤကပီၤယွၤ, ဒီးအကျဲအကပူၤတဖၣ်အဂ့ၢ်န့ၣ်လီၤ. စီၤပၤ လၢအကူၣ်သ့တဂၤအံၤ, လၢတၢ်သူၣ်အိၣ်သးအိၣ်အပူၤန့ၣ် နီၤဟ့ၣ်ဝဲအဖိ, ဘၣ်ထွဲဒီး တၢ်လၢအမၤလိန့ၢ်ဝဲလၢ အတၢ်ရ့လိာ်သးဒီးယွၤအဂ့ၢ်န့ၣ် ဖျါဖဲ ကတိၤ ၃:၁,၅ အပူၤ, “ယဖိခွါဧၢ … သန့ၤနသးလၢယွၤ လၢနသးဒီဖျၢၣ်ညါတက့ၢ်,” အဆၢဖိ ၇ န့ၣ်, “ပျံၤယွၤ,” အဆၢဖိ ၉ န့ၣ် “မၤလၤကပီၤယွၤ,” ဒီးအဆၢဖိ ၁၁ န့ၣ် “ယွၤသိၣ်ဃီၣ်တၢ်န့ၣ် သုတမၤတရီတပါတဂ့ၤ” န့ၣ်လီၤ. အဆၢဖိ ၁၂ ပာ်ဖျါဝဲလၢ စီၤပၤ စီၤရှလိၤမိၤ သ့ၣ်ညါ ကစၢ်ယွၤ “အဲၣ်ဝဲ,” ဒီး “မုာ်လၤသးခုဝဲ” ဖဲအဖိတဖၣ် မ့ၢ်ဟံးဃာ်အတၢ်သိၣ်က့ၤသီက့ၤတၢ်, ဒီးအတၢ်နဲၣ်ကျဲ လၢတၢ်သူၣ်အိၣ်သးအိၣ်အပူၤန့ၣ်လီၤ.
မ်ပကသိၣ်လိသကိး ခါဆူညါဖိစိၤလံၤစိၤလၢ တၢ်နာ်ကစၢ်ယွၤ, တၢ်ပာ်ဒိၣ်ယွၤ, ဒီးတၢ်မၤလၤကပီၤယွၤ, စံးတၢ်န့ၣ် မ့ၢ်တၢ်အခီပညီမနုၤလဲၣ်, ဒီးလၢတၢ်ဆီၣ်လီၤသး အပူၤန့ၣ်, မ်ပကပျဲယွၤသိပှၤဘှီပှၤန့ၣ်တက့ၢ်. တၢ်မၤသကိးတၢ်ဒီးယွၤန့ၣ် မ့ၢ်ခွဲးယာ်လၢ အကါဒိၣ်ကတၢၢ်တမံၤ, ဒီးမ့ၢ်တၢ်လၢအလီၤကမၢကမၣ် ဒိၣ်ကတၢၢ်တမံၤန့ၣ်လီၤ.
