တၢ်ကတိၤ “တၢ်လီၢ်အံၤ တဘၣ်ထွဲဒီးနၤဘၣ်” အံၤန့ၣ်, မၤဘၣ်ဒိဆါ ပိာ်မုၣ်ဖိသၣ် ဃိးနံၣ် ဖိတဂၤအသး, ဒီးတၢ်သးဆါအံၤ အိၣ်တ့ၢ်လၢ အသးကံၢ်ပူၤန့ၣ်လီၤ. အဝဲသ့ၣ် အဟံၣ်ဖိဃီဖိတဖၣ် အိၣ်ဟဲဝဲလၢ ပှၤဘၣ်ကီဘၣ်ခဲ အဒဲကဝီၤ, ဖဲထံကီၢ်လၢအပှဲၤဒီးတၢ်ဒုးတၢ်ယၤ, ဒီးသူးလီၢ်သူးကျဲ ဆူထံကီၢ်အသီအဃိ, လၢတၢ်သူးလီၢ်သူးကျဲ လံာ်က့အပူၤန့ၣ် တၢ်ဒိလီၤ “ပှၤတခီဘီမုၢ်ဖိ” အလံာ်မဲာ်ဖျဲၣ်န့ၣ်လီၤ. လၢတၢ်န့ၣ်အဃိ, အသးကလၢၢ်ဘၣ်ဝဲလၢ အတဘၣ်ဃးဒီးတၢ်လီၢ်အံၤဘၣ်န့ၣ်လီၤ.

ဒ်ပှၤဒိၣ်တုာ်ခိၣ်ပှဲၤတဂၤအသိး အဝဲစူၢ်က့ၤနာ်က့ၤ ကစၢ်ယ့ၣ်ရှူးဘၣ်ဆၣ်, အသး ကလၢၢ်ဘၣ်ဝဲလၢ အမ့ၢ်ဒံးဒၣ် ပှၤတဘၣ်ဃးဒီးထံကီၢ်အံၤဘၣ်န့ၣ်လီၤ. အသးဘၣ်ဒိဆါလၢတူၢ်ဘၣ်ခီၣ်ဘၣ်ဝဲ, တၢ်ပာ်အီၤဒ်ပှၤတၢ်ချၢတဂၤအသိးန့ၣ်လီၤ. ဖဲအဖးလံာ်စီဆှံန့ၣ်ဒီး, ဃုထံၣ်န့ၢ်ဝဲ ယွၤအတၢ်အၢၣ်လီၤအီၤလီၤလၢ အ့ဖ့းစူး အဆၢဒိၣ် ၂ အပူၤ, ဒီးအဆၢဖိ ၁၂ န့ၣ်ထံၣ်ဝဲ တၢ်ကတိၤ “ပှၤတခီဘီမုၢ်ဖိ” လၢအမၤကီမၤခဲတ့ၢ်အီၤ, ဒီးလံာ်စီဆှံပာ်ဖျါထီၣ်ဝဲ “လၢဖဲအကတီၢ်န့ၣ်သုတအိၣ်ဘၣ်ဒီးခရံာ်ဘၣ်, ပှၤတခီဘီမုၢ်ဖိလၢ အတဘၣ်ဃးဒီး အံၣ်စရ့လးဘၣ်, ဒီးပှၤတမှံၤတပျီၤလၢအတဘၣ်ဃးဘၣ်ဒီး တၢ်စံးပာ်အတၢ်အၢၣ်လီၤအီၤလီၤဘၣ်, ပှၤတအိၣ်ဘၣ်ဒီး တၢ်မုၢ်လၢ်ဘၣ်, ဒီးတအိၣ်ဘၣ်ဒီးယွၤလၢဟီၣ်ခိၣ်ချၢ” န့ၣ်လီၤ. ဘၣ်ဆၣ်, ဖးကဒီးဝဲဆူညါန့ၣ်ဒီး, ထံၣ်ဝဲလၢ ကစၢ်ခရံာ်တူၢ်သံအသးန့ၣ်, ပျိာ်လဲလိာ်က့ၤအတၢ်မ့ၢ်တၢ်န့ၣ်လီၤ. ဖးဝဲတုၤ အဆၢဖိ ၁၉- လၢအစံးဘၣ်အီၤ, ပှၤတခီဘီမုၢ်ဖိ, မ့တမ့ၢ် ပှၤတမှံၤတပျိၤ မ့ၢ်ဂ့ၢ် “နတမ့ၢ်လၢၤဘၣ်” န့ၣ်လီၤ. အဝဲမ့ၢ် “ပှၤဝ့ၢ်ဖိသကိးပှၤဝ့ၢ်ဖိ,” လၢယွၤအပှၤဟံၣ်ဖိဃီဖိအကျါန့ၣ်လီၤ. ဖဲအသ့ၣ်ညါနာ်ပၢၢ်ဝဲလၢ ကဲထီၣ်ဘၣ် မူခိၣ်ဘီမုၢ်ဖိတဂၤအဃိ, အသူၣ်ခုသးခုဝဲဒိၣ်မးန့ၣ်လီၤ. အဝဲတမ့ၢ်ပှၤတၢ်ချၢနီတဘျီလၢၤဘၣ်န့ၣ်လီၤ. ယွၤဟံးန့ၢ်က့ၤအီၤဆူအဟံၣ်ပူၤ, ဒီးတူၢ်လိၣ်က့ၤအီၤန့ၣ်လီၤ.

ခီဖျိလၢပတၢ်ဒဲးဘးအဃိ, ပဘၣ်အိၣ်ယံၤ, အိၣ်လီၤဖးဒီးကစၢ်ယွၤန့ၣ်လီၤ. ဘၣ်ဆၣ် ပတဘၣ်အိၣ်ဝဲ ဒ်န့ၣ်အသိးလၢၤဘၣ်. အ့း ၂:၁၇ စံးဘၣ်ပှၤလၢ, ကစၢ်ယ့ၣ်ရှူး ဟဲစိာ်တၢ်ဃူတၢ်ဖိးဆူ ပဝဲကိးဂၤလၢ “အယံၤဒီးယွၤ” အဂီၢ်, ဒီးဒုးကဲထီၣ်ပှၤလၢအစူၢ်က့ၤနာ်က့ၤအီၤတဖၣ်လၢ ပှၤဝ့ၢ်ဖိသကိးပှၤဝ့ၢ်ဖိ, ဖဲအဘီမုၢ်လီၤထူလီၤယိာ်- ကဘၣ်တၢ်ပာ်ဖှိၣ်က့ၤလၢ ခရံာ်အနီၢ်ခိအပူၤန့ၣ်လီၤ.