လၢကွဲၤထံၣ်ဟူ အပူၤ, ပှၤအိၣ်ခိးကွၢ် တၢ်ပာ်လီၤ နီၢ်ပၤမုာ် အဲလံၤစဘဲး ခံဂၤတဂၤ အဒဲဟီၣ်ခိၣ် အတၢ်ရဲၣ်တၢ်ကျဲၤ, လၢဟီၣ်ခိၣ်ဒီဘ့ၣ်န့ၣ် ကအိၣ်ဝဲ အကကွဲၢ်လၢ အကထိတဖၣ်, ဒီးဘၣ်သ့ၣ်သ့ၣ်, ကမ့ၢ် စံၣ်စိၤနုာ် တၢ်ရဲၣ်တၢ်ကျဲၤလၢ ပှၤကွၢ်တၢ်ဖိအအါကတၢၢ်န့ၣ်လီၤ. ဖဲလၢမုၢ်နံၤအံၤန့ၣ် ပှၤကညီၤ တကကွဲၢ် ဆၢထၢၣ်ရဲၣ်လီၤအသး လၢဝ့ၢ်လိဒိၣ်အကျဲတဖၣ်, ဒီးတနွံအတီၢ်ပူၤန့ၣ်, ပှၤခံကလီၢ်ယဲၢ်ကလး ဆၢထၢၣ်ပိာ်လိာ်အခံ ဒ်သိး ကကွၢ်ဝဲ နီၢ်ပၤမုၣ်အကျုာ်န့ၣ်လီၤ. စီၤပၤဒီးနီၢ်ပၤမုၣ် ယဲၢ်ကယၤ, ကီၢ်ခိၣ်တဖၣ်, ဒီးဝ့ၢ်ခိၣ်တဖၣ် ဟဲဟ့ၣ်တၢ်ယူးယီၣ်ဆူ ပိာ်မုၣ်တဂၤလၢ အဘၣ်တၢ်သ့ၣ်ညါအီၤလၢအဂ့ၢ်အဘါ, ဒီးအတကဲာ်ပဝးတဖၣ်အဃိ, ကဲထီၣ်ဝဲ စံၣ်စိၤနုာ်အကတီၢ်န့ၣ်လီၤ.
ဒ်ဟီၣ်ခိၣ်ဒီဘ့ၣ် ခိးကွၢ် ကီၢ်အဲကလံး, ဒီးအနီၢ်ပၤမုၣ်လၢ အပာ်တ့ၢ်အထံဖိကီၢ်ဖိ အကတီၢ်န့ၣ်, ယတၢ်ဆိကမိၣ်တဖၣ် လဲၤတူၤဆူ တၢ်ဂ့ၢ်အဂၤတမံၤ, လၢအမ့ၢ် – ပကစၢ်စီၤလိၣ်စီၤပၤအတၢ်ဟဲက့ၤန့ၣ်လီၤ. ယရှါ ၄၅:၂၀-၂၂ န့ၣ် တၢ်စံးဘၣ်ပှၤလၢ မုၢ်နံၤတနံၤ ကဟဲတုၤဃီၤဝဲလၢ, ဟီၣ်ခိၣ်ဒီဘ့ၣ် ကပာ်ဖှိၣ်အသး ဒ်သိးကဟ့ၣ်တၢ်ယူးယီၣ်ဆူ စီၤလိၣ်စီၤပၤတဂၤ, လၢအဒိၣ်န့ၣ် စီၤပၤတဖၣ်ခဲလၢာ်န့ၣ်လီၤ. အဆၢဖိ ၂၄ စံးဘၣ်ပှၤလၢ အဝဲမ့ၢ်ခိၣ်နၢ်လၢ အအိၣ်ဒီးတၢ်တီတၢ်လိၤ, ဒီးတၢ်အဂံၢ်အဘါ ဒီးအဆၢဖိ ၂၃ ပာ်ဖျါဝဲလၢ “ကယဲၢ်ပှၤကချံးလီၤ အခီၣ်လ့ၢ်ခိၣ် လၢအမဲာ်ညါ, ဒီးကယဲၢ်ပှၤအပျ့ၤကဆိၣ်တၢ်လၢအမဲာ်ညါ” န့ၣ်လီၤ. လီၣ်ဖျါ ၂၁:၂၄,၂၆ ပာ်ဖျါဝဲလၢ ဟီၣ်ခိၣ်ဒီဘ့ၣ် ခိၣ်နၢ်တဖၣ်စ့ၢ်ကီး ကဟ့ၣ်အီၤတၢ်ယူးယီၣ်, ဒီးကနဲၣ်ဆှၢအထံအကီၢ် ဒ်သိးကလဲၤတၢ်လၢ ယွၤအတၢ်ကပီၤအပူၤအဂီၢ်န့ၣ်လီၤ. စီၤလိၣ်စီၤပၤတဂၤအံၤ အတၢ်ဟဲန့ၣ် တမ့ၢ်လၢကယဲၢ်ပှၤခဲလၢာ် ကတူၢ်လိာ်မုာ်အီၤဘၣ်ဆၣ်, ယရှါ ၄၅:၂၄-၂၅ ပာ်ဖျါဝဲ ပှၤလၢအတူၢ်လိာ်အီၤတဖၣ်န့ၣ် ကသူၣ်ခုသးခုဝဲလၢ အတၢ်ပၢဆှၢတၢ်အဖီလာ်လီၤစိၤန့ၣ်လီၤ.
ဒ်ဟီၣ်ခိၣ်ဒီဘ့ၣ်ပာ်ဖှိၣ်အသး, ဒီးခိးကွၢ်ဝဲ နီၢ်ပၤမုၣ်လၢ အလဲၤပူၤကွံာ်ဟီၣ်ခိၣ်တဂၤအသိး, မုၢ်တနံၤန့ၣ် ပှၤဟီၣ်ခိၣ်ဖိတဖၣ် ကထံၣ်ဘၣ်ဝဲ စီၤပၤဖးဒိၣ်တဂၤ အတၢ်ဟဲက့ၤန့ၣ်လီၤ. မုၢ်နံၤတနံၤအံၤ ကမ့ၢ်ဝဲဒ်လဲၣ်န့ၣ်, ဖံး ၂:၁၀-၁၁ စံးဘၣ်ပှၤလၢ ကယဲၢ်တၢ်အိၣ်လၢမူခိၣ်, ဒီးတၢ်အိၣ်လၢဟီၣ်ခိၣ်, ဒီးတၢ်အိၣ်လၢဟီၣ်ခိၣ်လာ်ခဲလၢာ်န့ၣ်, ကချံးလီၤအခီၣ်လၢကစၢ်ယ့ၣ်ရှူးခရံာ်အမဲာ်ညါ, ဒီးကယဲၢ်ပျ့ၤတဖၣ်န့ၣ် ကအၢၣ်လီၤအီၤလီၤဝဲလၢ ကစၢ်ယ့ၣ်ရှူးခရံာ် မ့ၢ်ကစၢ်ယွၤန့ၣ်လီၤ.
