တၢ်ရ့လိာ်ဘၣ်ထွဲ ပှာ်ဘျးစဲ (Facebook) အပူၤ, တၢ်သ့ၣ်နီၣ်အဂီၢ် ယတၢ်ဂီၤဖိ ဟဲဖျါထီၣ်ဝဲ, လၢအမ့ၢ် ယမၤနၢၤတၢ်လိာ်ကွဲ ဂုၢ်သ့ၣ်ဒီးဃီ အတၢ်လိာ်ကွဲ ဖဲယသးအိၣ်ယဲၢ်နံၣ်အခါန့ၣ်လီၤ. တၢ်လိာ်ကွဲအံၤ ပဘၣ်လိာ်ကွဲအီၤ လၢတၢ်သူၣ်ဖှံသးညီ, ဒီးတၢ်သူၣ်ဟူးသးဂဲၤအပူၤန့ၣ်လီၤ. ဖဲပဖိသၣ်အကတီၢ် မ့ၢ်လၢယဒီပုၢ်ဝဲၢ်တဖၣ် ပလိာ်ကွဲတၢ်လိာ်ကွဲအံၤအဃိ, ယဘျးစဲပနီၣ်အဝဲသ့ၣ်န့ၣ်လီၤ. တၢ်လိာ်ကွဲအံၤ ဘၣ်တၢ်သန့ၤထီၣ်အီၤလၢ အပူၤကွံာ် နံၣ်ကယၤ အတၢ်လိာ်ကွဲန့ၣ်လီၤ. တၢ်လိာ်ကွဲအံၤ မၤစၢၤပှၤလိာ်ကွဲတဖၣ် ဒ်သိးကဂံၢ်ဒွးနီၢ်ဂံၢ်တဖၣ်, ဒီးဟ့ၣ်တၢ်သးကနိး, တၢ်သးခုဆူ ပှၤလၢအမၤနၢၤ လဲၤတုၤဆူ နီၢ်ဂံၢ် ၁၀၀ အဆိကတၢၢ်တဂၤအဂီၢ် န့ၣ်လီၤ. ဘၣ်ဆၣ် တၢ်ကဘၣ်ပာ်သူၣ်ပာ်သး ဝဲတၢ်တမံၤန့ၣ် ဖဲလၢနလဲၤတုၤ နီၢ်ဂံၢ် ၉၈ န့ၣ်ဒီး, ဂုၢ်သ့ၣ်ဖးထီ ကယူၢ်လီၤနၤ, ဒီးနကလီၤတဲာ်ဆူ တၢ်ဖီလာ်န့ၣ်လီၤ. တၢ်အိၣ်အသးအံၤ ကထုးယံၤပှၤ မ့တမ့ၢ်ကတြီဃာ်ပှၤလၢ တၢ်မၤနၢၤအဂီၢ်န့ၣ်လီၤ.
တၢ်အံၤ လီၤဂာ်ဒီးပတၢ်အိၣ်မူ တမ့ၢ်ဘၣ်ဧါ. လၢတၢ်အဲၣ်တၢ်ကွံအပူၤ ကစၢ်ယ့ၣ်ရှူး ကတဲာ်ကတီၤပှၤ, လၢပတၢ်အိၣ်မူအထီၣ်အလီၤတဖၣ်အဂီၢ်န့ၣ်လီၤ. ယိၤ ၁၆:၃၃ န့ၣ် ကစၢ်ယ့ၣ်ရှူး စံးဝဲလၢ ပကဘၣ်ကွၢ်ဆၢၣ်မဲာ် “တၢ်နးတၢ်ဖှီၣ်,” ဘၣ်ဆၣ် အဝဲဟ့ၣ်စ့ၢ်ကီး တၢ်ကစီၣ် အမုာ်အပၢၤန့ၣ်လီၤ. တၢ်မၤကွၢ်လၢ ပဘၣ်ကွၢ်ဆၢၣ်မဲာ်တဖၣ်န့ၣ် ပကဘၣ်ပျံၤဘၣ်ဖုးအဂီၢ် အလီၢ်တအိၣ်ဘၣ်. ဘၣ်မနုၤအဃိလဲၣ်. မ့ၢ်လၢ ကစၢ်ခရံာ်မၤနၢၤ ဟီၣ်ခိၣ်လံအဃိန့ၣ်လီၤ. တၢ်လၢအဒိၣ်န့ၢ် ကစၢ်ခရံာ်အစိကမီၤန့ၣ် တအိၣ်ဘၣ်. လၢတၢ်န့ၣ်အဃိ, ပဝဲစ့ၢ်ကီး လၢပသးသမူအတၢ်လဲၤကျဲန့ၣ်, ဒ် အ့းဖ့း ၁:၁၉ စံးဘၣ်ပှၤအသိး, ခီဖျိလၢကစၢ်ခရံာ် “အစိဒိၣ်အကမီၤဒိၣ်” လၢအကတဲာ်ကတီၤန့ၢ်ပှၤအပူၤ, ပကွၢ်ဆၢၣ်မဲာ်တၢ်ကီတၢ်ခဲတဖၣ်သ့ဝဲဒၣ်န့ၣ်လီၤ.
ဒ်တၢ်လိာ်ကွဲဖိအံၤအသိး ဘၣ်တဘျီဘျီ ပတၢ်အိၣ်မူအပူၤန့ၣ် ကအိၣ်ဒီးဃီသွါလၢ အမၤထီၣ်မၤထီပှၤ, ဒီးဘၣ်တဘျီဘျီန့ၣ် ပကလီၤတလံာ်ဆူ တြီၤလာ်တဖၣ်အပူၤန့ၣ်လီၤ. ဘၣ်ဆၣ် တမ့ၢ်လၢပကဘၣ်လဲၤ ပသးသမူအတၢ်လဲၤ လၢတၢ်မုၢ်လၢ်တအိၣ်ဘၣ်အပူၤန့ၣ်ဘၣ်. ပအိၣ်ဒီးကစၢ်ယ့ၣ်ရှူးအစိကမီၤလၢ ကမၤစၢၤပှၤ ဒ်သိးပကမၤနၢၤတၢ်ခဲလၢာ်အဂီၢ်န့ၣ်လီၤ.