တၢ်ဆါသံသတြိာ် မၤနၢၤတၢ်လံန့ၣ် မ့ၢ် ကသံၣ်သရၣ် ကၠ့စၢၣ် ဖၢၣ်စီး (Jason Persoff), အတၢ်ထံၣ်န့ၣ်လီၤ. အဝဲဘၣ်ကွၢ်ထွဲ ဂ့ၢ်ဂီၤအူဒၢး (Emergency Room), ဒ်သိးဒီး ကမၤစၢၤပှၤဆါလၢအဘၣ် ကိၣ်ဘ့း တၢ်ဆါအၢအဂီၢ် ဟ့ၣ်လီၤအသး, လၢတၢ်ဆါဟံၣ်ဖးဒိၣ်တဖျၢၣ်န့ၣ်လီၤ. အဝဲကဟ့ၣ်ထီၣ်တၢ်မၤစၢၤအဂ့ၤကတၢၢ်ဒ်လဲၣ်. ဖဲအဝဲအိၣ်ဘှံးအိၣ်သါ အဆၢကတီၢ် ဒိဝဲဒၣ် တၢ်ဂီၤလၢ တၢ်ဆံးဆံးဖိတဖၣ် ဘၣ်တၢ်မၤဒိၣ်ထီၣ်အီၤ အဂီၤန့ၣ်လီၤ. ကသံၣ်သရၣ် ဖၢၣ်စီး စံးလီၤအသးလၢ “ယမၤတၢ်အံၤ ဖျါဒ်သိးပှၤပျုၢ်တဂၤ” န့ၣ်လီၤ. ဘၣ်ဆၣ် တၢ်ဃုထံၣ်န့ၢ် တၢ်သးခုလၢတၢ်ဆံးဆံးဖိ, လၢအမ့ၢ်တၢ်အဃံအလၤအံၤန့ၣ် “ဟ့ၣ်ယၤခွဲးယာ်လၢ ယကစၢဖှိၣ်က့ၤယသးဒီးယတၢ်ဘၣ်တ့ကစၢ်ယွၤ, ဒီးဒ်ပှၤစှၤဂၤလၢ အဟံးန့ၢ်တၢ်ဆၢကတီၢ်တစိၢ်ဖိ, ဒီးပာ်သူၣ်ပာ်သး, ဒီးထံၣ်ဘၣ်ဟီၣ်ခိၣ်အတၢ်ဃံတၢ်လၤတဖၣ်အသိး, ယထံၣ်ဘၣ် ဟီၣ်ခိၣ်အတၢ်ဃံတၢ်လၤန့ၣ်လီၤ.”

တၢ်ဃုထံၣ်န့ၢ်တၢ်သးခု လၢတၢ်ကူၣ်သ့- လၢအမၤကဆှၣ်လီၤဝဲ ပတၢ်ဃၢတၢ်စံၣ်တဖၣ်, ဒီးဒုးအိၣ်ထီၣ် တၢ်တူၢ်န့ၢ်ခီၣ်ကဲ ဒ်သိးအံၤန့ၣ်- ကသံၣ်သရၣ် စံးဝဲဒၣ်လၢ အမ့ၢ်တၢ်လုၢ်ဒိၣ်ပှ့ၤဒိၣ် လၢတၢ်ကူစါယါဘျါအတၢ်မၤပူၤန့ၣ်လီၤ. ဘၣ်ဆၣ် လၢပှၤကိးဂၤအဂီၢ်, ဟ့ၣ်ကူၣ်ဝဲဒၣ်လၢ, နကဘၣ်သါထီၣ်သါလီၤဝဲဒၣ်န့ၣ်လီၤ. နကသါထီၣ်သါလီၤအဂီၢ်, ဒီးလၢနတၢ်အိၣ်မူအပူၤ နကမုာ်လၤသးခုတၢ်အဂီၢ် နကဘၣ်ဃုကျိၤကျဲန့ၣ်လီၤ.

စံးထီၣ်ပတြၢၤ ၁၆ အပူၤန့ၣ် ပှၤကွဲးထါ စီၤဒၤဝံး ဒုးနဲၣ်ဖျါထီၣ် တၢ်ထံၣ်အံၤ ဖဲလၢအဘိးဘၣ်သ့ၣ်ညါဝဲ တၢ်ကူၣ်သ့လၢ အဃုထံၣ်န့ၢ်တၢ်သးခု လၢကစၢ်ယွၤအပူၤန့ၣ်လီၤ. စံး ၁၆:၅ အပူၤန့ၣ် စီၤဒၤဝံး ကွဲးပာ်ဖျါဝဲ, “ယွၤမ့ၢ်ယတၢ်န့ၢ်သါ, ဒီးယလီခီအဂီၢ်လီၤ,” ဒီးအဆၢဖိ ၉ န့ၣ် “မၤသးဒ်န့ၣ်ဒီး ယသးသူၣ်ခုသးခု ဒီးယလၤကပီၤ သူၣ်ဖှံသးညီလီၤ. ယဖံးယညၣ်စ့ၢ်ကီး ကအိၣ်ကဆိးလၢတၢ်မုၢ်လၢ်အပူၤလီၤ” န့ၣ်လီၤ.

ဒ်သိးတၢ်ကမၤဆံးလီၤစှၤလီၤ နီၢ်သးအတၢ်ဆီၣ်သနံးတဖၣ်အဂီၢ် ပှၤကညီတဖၣ်မၤဝဲလၢ တၢ်ကူၣ်သ့တအိၣ်ဘၣ်အပူၤန့ၣ် အိၣ်အါမးန့ၣ်လီၤ. ကသံၣ်သရၣ် ပၣ်စီး ဃုထံၣ်န့ၢ်ကျိၤကျဲလၢ အအိၣ်ဒီးတၢ်ကူၣ်သ့, မ့ၢ်ကျဲလၢ အနဲၣ်အီၤဆူ တၢ်ဘၣ်တ့ကစၢ်, ပှၤလၢအဟ့ၣ်ပှၤ တၢ်သးခုလၢအမဲာ်ညါန့ၣ်လီၤ. စံး ၁၆:၁၁ ပာ်ဖျါဝဲ “နကဘိးဘၣ်သ့ၣ်ညါယၤလၢ တၢ်မူအကျဲလီၤ, တၢ်သူၣ်ခုသးခု လၢထီၣ်ပှဲၤထီၣ်ဝဲလၢနမဲာ်ညါ, တၢ်အမုာ်အိၣ်လၢ နစုထွဲလီၤထူလီၤယိာ်” န့ၣ်လီၤ. ပဃုထံၣ်န့ၢ် တၢ်သးခုထီဘိ လၢကစၢ်ယွၤ အပူၤန့ၣ်လီၤ.