ဖဲယဖုးကတြူာ် ယသၣ်မံယီၤမံၤဖိ မ့းစတ့း (Mystique) အဟၢဖၢ ကပုာ်လုးဖိ, ဒီးယလိာ်ကွဲဒီးအီၤ, မ့တမ့ၢ် ဖဲအဝဲမံဘၣ်အသးလၢ ယဖီခိၣ်အကတီၢ်ဖိန့ၣ်, အဝဲမ့ၢ် သၣ်မံယီၤမံၤတဒုလၢ ယထံၣ်န့ၢ်အီၤ လၢအပူၤကွံာ် နံၣ်တဖၣ်န့ၣ် မ့ၢ်တၢ်ကီလၢ ယကနာ်အီၤန့ၣ်လီၤ. မ့းစတ့း န့ၣ် ညီနုာ်အိၣ်ဆိးဝဲလၢ ကျဲမုၢ်ခိၣ်, ဃဲၤ, ဒီးဘၣ်ပျံၤဘၣ်ဖုးဝဲဒၣ် ပှၤခဲလၢာ်န့ၣ်လီၤ. ဘၣ်ဆၣ်, ဖဲယဟ့ၣ်အီၤတၢ်အီၣ်ကိးမုၢ်နံၤန့ၣ်ဒီး, အတၢ်အိၣ်မူအံၤန့ၣ် လဲလိာ်အသးတဆီဘၣ်တဆီန့ၣ်လီၤ. ဘၣ်တနံၤန့ၣ် အဝဲပျဲ ယကဖုးလဲးအီၤ, ဒီးခဲအံၤ ကဲထီၣ်ဝဲဒၣ် ယသၣ်မံယီၤဖိန့ၣ်လီၤ.
မ့းစတ့း အတၢ်အိၣ်မူလဲလိာ်သးအံၤ, ဒုးသ့ၣ်နီၣ်ယၤလၢ တၢ်ယါဘျါဂ့ၤထီၣ်က့ၤစံးတၢ်န့ၣ် ဟဲခီဖျိသ့ဝဲလၢ တၢ်အဲၣ်, ဒီးတၢ်သူၣ်စူၤသးစူၤအပူၤန့ၣ်လီၤ. တၢ်ဂ့ၢ်ဖိအံၤ, ဒုးသ့ၣ်နီၣ်ထီၣ်က့ၤယၤ ယွၤအသး, ဖျါလၢ ယရှါယၤ ၄၂ အပူၤန့ၣ်လီၤ. ယရှါ ၄၂:၁ ပာ်ဖျါဝဲ အခ့အပှၤလၢအပှဲၤဒီးယွၤအသးစီဆှံတဂၤ ကဟဲဝဲအဂ့ၢ်, ဒီး အဆၢဖိ ၃-၄ စံးဘၣ်ပှၤလၢ ယွၤအခ့အပှၤတဂၤအံၤ ကမၤဝဲ “တၢ်စံၣ်ညီၣ်တီ,” ဒ်သိးကဒုးအိၣ်ထီၣ် “ကစၢ်ယွၤအတၢ်စံၣ်ညီၣ်ဆူ ဟီၣ်ခိၣ်ချၢ,” အဂီၢ် တလီၤဘှံးလီၤဘှါဝဲဒၣ်ဘၣ်န့ၣ်လီၤ.
ဘၣ်ဆၣ်, မး ၁၂:၁၈-၂၀ ပာ်ဖျါဝဲ ကစၢ်ယ့ၣ်ရှူး- လၢအမ့ၢ်ယွၤအခ့အပှၤတဂၤန့ၣ်, တဟဲစိာ်ဝဲ ယွၤအတၢ်စံၣ်ညီၣ်တီဆူ ဟီၣ်ခိၣ်ချၢအံၤ ခီဖျိလၢတၢ်စုဆူၣ်ခီၣ်တကး မ့ၢ်ဂ့ၤ, လၢတၢ်သူတၢ်စိတၢ်ကမီၤ မ့ၢ်ဂ့ၤန့ၣ်ဘၣ်. လၢတၢ်မၤဆူၣ်မၤစိးတၢ်အလီၢ်န့ၣ်, ယရှါ ၄၂:၂ ပာ်ဖျါဝဲလၢ, ယွၤအခ့အပှၤတဂၤအံၤ တထုထီၣ်အကလုၢ်, ဒီးတကိးပသူထီၣ်ဝဲဘၣ်. လၢအတၢ်အဲၣ်ကပုာ်လုးဖိ, ဒီးလၢတၢ်သူၣ်စူၤသးစူၤအပူၤန့ၣ် ကကွၢ်ထွဲကဟုကယာ်ဝဲဒၣ် ပှၤလၢအဘၣ်တၢ်စူးကွံာ်ညိကွံာ်အီၤတဖၣ်- ယရှါ ၄၂:၃ ပာ်ဖျါဝဲ ပှၤလၢအဘၣ်ဒိဘၣ်ထံး, ဒီးဘၣ်ဆူးဘၣ်ဆါတဖၣ်န့ၣ်လီၤ.
ကစၢ်ယွၤ ကဒိးန့ၢ်က့ၤ အဖိတဖၣ်အဂီၢ် တဆိကတီၢ်ဝဲနီတဘျီဘၣ်. ဒ်သိးကကွၢ်ထွဲကဟုကယာ် ပနီၢ်သးလၢအဘၣ်ဒိတဖၣ်, တုၤအဘၣ်တၢ်ယါဘျါဂ့ၤထီၣ်က့ၤတစုန့ၣ်, ကစၢ်ယွၤအိၣ်ဒီးပှၤထီဘိ လၢဟီၣ်ခိၣ်ချၢအံၤန့ၣ်လီၤ. ဒ်သိးပကအဲၣ်ယွၤ, ဒီးနာ်က့ၤယွၤ ခီဖျိလၢယွၤအတၢ်အဲၣ်ကဟုကယာ် ကပုာ်လုးဖိ, ဒီးအတၢ်သူၣ်စူၤသးစူၤအပူၤန့ၣ် ပမၤလိန့ၢ်ဘၣ်တၢ် တပတီၢ်ဘၣ်တပတီၢ်န့ၣ်လီၤ.