အပူၤကွံာ် တဘျုးနံၣ်န့ၣ်, ယပၢ်ဒီးယၤ ပလဲၤဟးလိာ်ကွဲဆူ အံၣ်ကွ့ၣ်ဒီ (Ecuador) ကီၢ် လၢအအဲၣ်ဘၣ်ဝဲန့ၣ်, ပလဲၤဟးစ့ၢ်ကီးဆူ ယပၢ်အဟံၣ်ဖိဃီဖိ အစံာ်အပှဲၤအလီၢ်, ဖဲယပၢ်ဒိၣ်ထီၣ်အလီၢ်န့ၣ်လီၤ. ဖဲန့ၣ်ယပာ်သူၣ်ပာ်သးလၢ သ့ၣ်လီၤဆီတကရူၢ်န့ၣ်လီၤ. ယပၢ်တဲယၤ, ဖဲလၢအဝဲမ့ၢ်ဒံးဒၣ် ဖိသၣ်အကတီၢ်, မ့ၢ်အဲၣ်ဒိးမၤဆဲးအဲးတၢ်န့ၣ်ဒီး, ဟံးန့ၢ်သ့ၣ်ဒ့လၢ ပှၤစူးကွံာ်ဝဲတဒ့, ဒီးလဲၤဘံဃာ်ဝဲဒၣ် သ့ၣ်ဒ့ဖိအံၤလၢသ့ၣ်အဂၤတမုၢ် လၢအဂဲာ်ဖးဝဲအလိၤ, ဒ်ပှၤနီၢ်ဒိၣ်တဖၣ်မၤဝဲန့ၣ်လီၤ. တချုးလၢ သ့ၣ်မုၢ်တဖၣ်သၣ်ထီၣ်ဝဲ တၤသၣ်လၢ ပှၤတဆိကမိၣ်တဖၣ်န့ၣ် အတၢ်မၤဆဲးအဲးတၢ်အံၤ တၢ်တသ့ၣ်ညါအီၤဘၣ်.
ဖဲယပၢ်ဒုးနဲၣ်ဖျါထီၣ် တၢ်ပာ်ထီထီၣ်သ့ၣ်ဒ့ အကျိၤအကျဲအဂ့ၢ်န့ၣ်ဒီး, ယဆိကမိၣ် ကွၢ်ထံ တၢ်ပာ်ထီထီၣ်ပှၤလၢ ယွၤအဟံၣ်ဖိဃီဖိစံးတၢ်န့ၣ် ကမ့ၢ်တၢ်မနုၤလဲၣ်န့ၣ်လီၤ. မ့ၢ်လၢအစူၢ်နာ် ကစၢ်ယ့ၣ်ရှူး, ဒီးကဘၣ်တၢ်ပာ်ထီထီၣ်အီၤလၢ ယွၤအဟံၣ်ဖိဃီဖိအဃိ, ယပၢ်လၢအလဲၤပူၤကွံာ်လံဟီၣ်ခိၣ်တဂၤအံၤ ကအိၣ်ဝဲလၢမူခိၣ်ဘီမုၢ်န့ၣ် ယသ့ၣ်ညါဝဲဒၣ်န့ၣ်လီၤ.
အကတၢၢ်န့ၣ် ပကအိၣ်ဘၣ်လၢ မူခိၣ်ဘီမုၢ်အဂီၢ်, တၢ်လၢကမၤဂၢၢ်မၤကျၢၤပှၤစ့ၢ်ကီး အိၣ်သ့ဝဲဒၣ်န့ၣ်လီၤ. ရိမ့ၤ ၁၁:၁၇ အပူၤန့ၣ် တၢ်မၢဖိစီၤပီလူး ပာ်ဖျါဆှဲထီၣ်ဝဲ ဆူ ဝ့ၢ်ရိမ့ၤ ပှၤစူၢ်က့ၤနာ်က့ၤခရံာ်တဖၣ် လၢယွၤကတဲာ်ကတီၤ ကျဲတဘိလၢ ပှၤတခီဘီမုၢ်ဖိတဖၣ် (မ့တမ့ၢ်) ပှၤလၢအတမ့ၢ် ပှၤယူဒၤဖိတဖၣ်အဂီၢ်, လၢအကမၤဘၣ်လိာ်က့ၤအသးဒီး ယွၤအနီၢ်ကစၢ်အဂ့ၢ်န့ၣ် စံးဝဲဒၣ် “ဒီးနဲဒၣ်နမ့မ့ၢ် သ့ၣ်စၤယံးအမံၤ, လၢတၢ်ထီထီၣ်အီၤလၢဒ့အလီၢ်, ဒီးနန့ၢ် ဃုာ်သ့ၣ်စၤယံးအဂံၢ်ဒီးအသိ” န့ၣ်လီၤ. ဖဲပပာ်လီၤပတၢ်စူၢ်တၢ်နာ်လၢ ကစၢ်ခရံာ်အပူၤန့ၣ်ဒီး, ပဘၣ်တၢ်ပာ်ထီထီၣ် ပှၤဒီးအီၤ, ဒီးပကဲထီၣ်ယွၤအဟံၣ်ဖိဃီဖိတဖၣ်အဂ့ၢ်န့ၣ် ယိၤ ၁၅:၅ ပာ်ဖျါဝဲ “ပှၤလၢ အအိၣ်လၢယပူၤ, ဒီးယအိၣ်လၢအပူၤန့ၣ်, သၣ်ထီၣ်ဝဲဒၣ်အါဖျၢၣ်” န့ၣ်လီၤ.
ဒ်သ့ၣ်အဒ့တဖၣ် ဘၣ်တၢ်ပာ်ထီထီၣ်အသိး, ဖဲပပာ်လီၤပတၢ်စူၢ်တၢ်နာ်လၢ ကစၢ်ခရံာ်အပူၤန့ၣ်ဒီး, ပကဲထီၣ် တၢ်ဘၣ်တ့အသီ, ဒီးပကသၣ်ထီၣ်အါထီၣ် တၤသၣ်တဖၣ်န့ၣ်လီၤ.