ပှၤသးဝံၣ် Country Music အမံၤဟူသၣ်ဖျါ, ကၠီနံၣ် ကဲးၡ် (Johny Cash) ဘူးထီၣ်လၢကသံဝဲအဆၢကတီၢ်ဒၣ်လဲာ် ပာ်လီၤအသးလၢ ကကွဲးထုးထီၣ် တၢ်သးဝံၣ်တဖၣ်န့ၣ်လီၤ. အတၢ်သးဝံၣ်အကတြူၢ်လၢခံကတၢၢ်, “ပှၤအမဲရကၤ နီၣ်ဂံၢ် ၆- တၢ်သွၣ်ခိၣ် တမ့ၢ်ဘၣ်” (American VI: Ain’t No Grave), အံၤ ဘၣ်တၢ်ဖီၣ်န့ၢ် အကလုၢ် ဖဲအဝဲတချုးသံ တဘျုးလါန့ၣ်လီၤ. ကၠီနံၣ် သးဝံၣ်က့ၤဝဲ ကလီးဒ် အံၣ်လဲ (Hymn by Claude Ely) အထါသးဝံၣ် စံးထီၣ်ပတြၢၤယွၤ, ဒ်အကစၢ်ဒၣ်ဝဲ စတဲၣ် (Style) န့ၣ် ဟ့ၣ်ထီၣ်ပှၤ တၢ်ထံၣ်လၢ ကၠီနံၣ် ကဲးၡ် အတၢ်ဆိကမိၣ်လၢခံကတၢၢ်, ဖဲပနၢ်ဟူဘၣ် အတၢ်သးဝံၣ်အပူၤ ပာ်ဖျါဝဲအတၢ်မုၢ်လၢ် ဘၣ်ထွဲဒီးတၢ်ဂဲၤဆၢထၢၣ်သမူထီၣ်က့ၤအဂ့ၢ်န့ၣ်လီၤ. ခီဖျိလၢ အတၢ်ဆူးတၢ်ဆါအဃိ, အကလုၢ်ဖးဒိၣ်လၢအမံၤဟူသၣ်ဖျါအံၤ, အဂံၢ်စၢ်လီၤဝဲဘၣ်ဆၣ်, အတၢ်သးဝံၣ်န့ၣ် ပာ်ဖျါထီၣ် အတၢ်အုၣ်အသးလၢ အတၢ်စူၢ်တၢ်နာ်အစိကမီၤဒိၣ်ဒိၣ်မုၢ်မုၢ်န့ၣ်လီၤ.
ကၠီနံၣ် အတၢ်မုၢ်လၢ်န့ၣ် တမ့ၢ်လၢ ကစၢ်ယ့ၣ်ရှူးဂဲၤထၢၣ်သမူထီၣ်က့ၤ, ဖဲခရံာ်ဂဲၤဆၢထၢၣ်သမူထီၣ်က့ၤ အမုၢ်နံၤ (Easter Sunday) အဂ့ၢ်ယိယိဖိ န့ၣ်ဘၣ်. မုၢ်တနံၤန့ၣ်, အနီၢ်ခိအနီၢ်ကစၢ် ကဂဲၤဆၢထၢၣ်သမူထီၣ်က့ၤ, ဒီးကမူထီၣ်က့ၤန့ၣ် ကၠီနံၣ် နာ်ဝဲဒၣ်န့ၣ်လီၤ.
လၢတၢ်မၢဖိ စီၤပီလူး အစိၤဒၣ်လဲာ်, ပှၤဂီၢ်မုၢ်တဖၣ် သမၢဝဲဒၣ်လၢ ခါဆူညါနီၢ်ခိအတၢ်ဂဲၤဆၢထၢၣ်သမူထီၣ်က့ၤအဃိ, တၢ်ဂဲၤဆၢထၢၣ်သမူထီၣ်က့ၤလၢနီၢ်ခိန့ၣ် မ့ၢ် တၢ်မ့ၢ်တၢ်တီအကါဒိၣ်တမံၤလၢ ကဘၣ်တၢ်မၤဂၢၢ်မၤကျၢၤအီၤန့ၣ်လီၤ. လၢတၢ်ကတိၤဆူၣ်ဆူၣ်အပူၤ, စီၤပီလူး ဒုၣ်ဒွဲၣ်ဝဲ ပှၤဂီၢ်မုၢ်တဖၣ် အတၢ်ကတိၤဂ့ၢ်လိာ်တဖၣ် ဒီးကွဲးပာ်ဖျါဝဲလၢ, ၁ ကရံၣ် ၁၅:၁၃-၁၄ အပူၤန့ၣ် “ဒီးခရံာ်မ့ၢ်တဂဲၤဆၢထၢၣ်က့ၤဘၣ်ဒီး, ပစံၣ်တဲၤတဲလီၤတၢ်န့ၣ်, မ့ၢ်တၢ်ကလီကလီ, ဒီးသုစူၢ်က့ၤနာ်က့ၤတၢ်န့ၣ်, မ့ၢ်စ့ၢ်ကီး တၢ်ကလီၤကလီလီၤ” န့ၣ်လီၤ.
ဒ်တၢ်သွၣ်ခိၣ်ဟံးဃာ် ခရံာ်အနီၢ်ကစၢ်တန့ၢ်ဘၣ်အသိး, မုၢ်တနံၤ, ပှၤလၢအစူၢ်နာ်ခရံာ်ဂဲၤဆၢထၢၣ်သမူထီၣ်က့ၤ လၢတၢ်သံတဖၣ်န့ၣ်, ၁ ကရံၣ် ၁၅:၂၂ ပာ်ဖျါဝဲလၢ “ကဘၣ်တၢ်မၤမူထီၣ်က့ၤအီၤ” န့ၣ်လီၤ. ပနီၢ်ခိလၢ အဘၣ်တၢ်ဂဲၤဆၢထၢၣ်သမူထီၣ်က့ၤတဖၣ်န့ၣ်, ပကသးခုဃုာ်ဒီးခရံာ်လီၤစိၤ လၢဟီၣ်ခိၣ်အသီန့ၣ်လီၤ. တၢ်အံၤမ့ၢ်တၢ်ဂ့ၢ်လၢ ပကသးဝံၣ်စံးထီၣ်ပတြၢၤတၢ်အဂီၢ်န့ၣ်လီၤ.