ကၠီးစ်လ့ (Jocelyn) အတၢ်အီၣ်ကျးန့ၣ် တၢ်အီၣ်လၢ အဆါဘၣ်ကတၢၢ်, မ့ၢ်ဝဲဒၣ် မ့ၤချီ န့ၣ်လီၤ. ကၠီးစ်လ့ ခွဲးခွးဝဲဒၣ် အမ့ၤ ချီ ကယီကယီလီၤတံၢ်လီၤဆဲး တုၤလၢအမ့ၤ ချီန့ၣ် ကပုာ်ဘျ့ကဆှၣ်ခဲလၢာ်ခဲဆ့န့ၣ်လီၤ. ဖဲပှၤဟဲအီၣ်ညီနုၢ်လၢ အကျးတဂၤန့ၣ် တဲအီၤလၢ “နမ့ၤချီန့ၣ် တဒ်သိးဒီးအပူၤကွံာ်ဘၣ်. တကပုာ်, တဘျ့ဂ့ၤဂ့ၤ ဒ်အပူၤကွံာ်အသိးဘၣ်” န့ၣ်ဒီး, အဝဲဖုးဘၣ်အသးန့ၣ်လီၤ.
ကၠီးစ်လ့ အပှၤမၤတၢ်ဖိအသီလၢ အမၤစၢၤအီၤတဂၤ ကတဲာ်ကတီၤဝဲ မ့ၤချီအံၤ ဒီးပာ်ဖျါထီၣ်ဝဲဒၣ်လၢ ဘၣ်မနုၤအဃိ မ့ၤချီအံၤ လီၤဆီဝဲဒၣ်လဲၣ်အဂ့ၢ်န့ၣ်လီၤ. “မ့ၤချီ အံၤ ယတခွဲးခွးဝဲယံာ်ယံာ်, ဒ်လံာ်တၢ်နဲၣ်ကျဲပာ်ဖျါဝဲအသိးဘၣ်. ယတ့ၢ်နုာ် နံၣ်သိအသိ စ့ၢ်ကီးန့ၣ်လီၤ. လၢယဂီၢ်ဒု မ့ၤချီ အဝံၣ်အဘဲအါထီၣ်ဝဲဒၣ်န့ၣ်လီၤ.” အဝဲပာ်လီၤအသး လၢကလဲၤကပာ်ကွံာ် လံာ်တၢ်နဲၣ်ကျဲ လၢတၢ်အီၣ်အံၤအဂီၢ်, ဒီးမၤဝဲဒ်အကျိၤကျဲဒၣ်ဝဲအသိးန့ၣ်လီၤ.
အတၢ်မၤန့ၣ် လီၤဂာ်ဒီးယၤ, ဘၣ်တဘျီဘျီ ဖဲယတလဲၤတၢ် ဒ်ယွၤအတၢ်နဲၣ်ကျဲအသိးအကတီၢ်န့ၣ်လီၤ. ဒ်အကလုၢ်ကထါစီဆှံပာ်ဖျါဝဲအသိး ယကဘၣ်လဲၤလၢလၢပှဲၤပှဲၤ အလီၢ်န့ၣ်, ဒ်ယထံၣ်အသိး ယဘှီက့ၤအီၤ, ဒီးယလဲၤဒ်ယကျဲအသိးန့ၣ်လီၤ.
စူၤရံ အသုးမုၢ်အခိၣ်ကျၢၢ် စီၤနဧၤမၣ် စ့ၢ်ကီး မၤဝဲတၢ်ကမၣ်ဒ်သိးအံၤန့ၣ်လီၤ. ခီဖျိလၢဝံအလံၤရှါန့ၣ် အဝဲဒိးန့ၢ် ယွၤအတၢ်နဲၣ်ကျဲ, ဒ်သိးအတၢ်ဆါအၢကဘျါက့ၤအဂီၢ် ကဘၣ်လဲၤလုၣ်ထံနွံဘျီလၢ ယၢ်ဒ့ၣ်ထံကျိအပူၤန့ၣ်ဒီး, သုးခိၣ်လၢအပာ်သးကဖၢလၢတဂၤအံၤ အသူၣ်ဒိၣ်သးဖျိးဝဲဒၣ်န့ၣ်လီၤ. ၂ စီၤ ၅:၁၁-၁၂ ပာ်ဖျါဝဲလၢ ဒ်သိးအတၢ်ဆါကဘျါက့ၤအဂီၢ် အနီၢ်ကစၢ်, ဒီးအတၢ်ဆိကမိၣ်ဒၣ်ဝဲ အိၣ်ပာ်စၢၤလံန့ၣ်လီၤ, မ့ၢ်လၢ အဝဲနာ်လီၤအသးလၢ အတၢ်ထံၣ်ဆိကမိၣ်န့ၣ် ဂ့ၤဒိၣ်န့ၢ်ဒံးယွၤ အကလုၢ်န့ၣ်လီၤ. ဘၣ်ဆၣ် အဆၢဖိ ၁၃ စံးဘၣ်ပှၤလၢ အခ့အပှၤတဖၣ် တဲနၢ်ပၢၢ်အီၤလၢ ကမၤဝဲ ဒ်တၢ်လၢဝံအလံၤရှါ စံးဘၣ်အီၤန့ၣ်လီၤ. တၢ်အစၢဟဲထီၣ်ဝဲလၢ စီၤနဧၤမၣ် အတၢ်ဆါအၢန့ၣ် ဘျါက့ၤဝဲဒၣ်န့ၣ်လီၤ.
ပမ့ၢ်မၤတၢ် ဒ်ယွၤအတၢ်နဲၣ်ကျဲအသိးန့ၣ်ဒီး, ပကလဲၤခီဖျိဘၣ် တၢ်မုာ်တၢ်ပၢၤလၢပပာ်ဖျါထီၣ်အီၤတန့ၢ်ဘၣ်န့ၣ်လီၤ. လၢတၢ်မၤလၢပှဲၤ ယွၤအတၢ်တိာ်ပာ်တဖၣ်အဂီၢ်, မ်ပကမၤသကိးတၢ်ဒီးယွၤန့ၣ်တက့ၢ်.
