မ့ၢ်လၢ နတသ့ၣ်နီၣ်ထီၣ်က့ၤ ပှၤအမံၤ မ့တမ့ၢ် နံၤသီအဃိ, ဖဲနစံးကတိၤတၢ်ဂ့ၢ် တမံၤမံၤအကတီၢ်, နဘၣ်ဆိကတီၢ်နတၢ်ကတိၤန့ၣ် မ့ၢ်အိၣ်တဘျီဘျီဧါ. ပနာ်လၢဖဲပသးပှၢ်ထီၣ်အကတီၢ် ယံာ်ထိၣ်ယံာ်ထီၣ်ဒီး, တၢ်လၢပသ့ၣ်ညါတဖၣ်န့ၣ် ဟါမၢ်ကွံာ်ဝဲဒၣ်သ့န့ၣ်လီၤ. ဘၣ်ဆၣ် ဖဲတၢ်တယံာ်ဒံးဘၣ်န့ၣ်, တၢ်ဃုထံၣ်သ့ၣ်ညါတဖၣ်န့ၣ် စံးဝဲဒၣ်လၢ တၢ်လၢပနာ်တ့ၢ်တဖၣ်န့ၣ် တဘၣ်ဝဲဒၣ်ဘၣ်လီၤ. နီၢ်နီၢ်န့ၣ်, အဝဲသ့ၣ်ပာ်ဖျါဝဲလၢ ပတၢ်သ့ၣ်နီၣ်တဖၣ်န့ၣ် တမ့ၢ် တၢ်ဂ့ၢ်ကီဘၣ်. တၢ်လၢအကီအခဲန့ၣ် မ့ၢ်ပတၢ်သ့တၢ်ဘၣ် လၢကဒိးန့ၢ်ကဒါက့ၤ ပတၢ်သ့ၣ်နီၣ်တဖၣ်အံၤ
န့ၣ်လီၤ. ပမ့ၢ်တမၤညီနုာ် တၢ်မၤသ့ၣ်နီၣ်က့ၤပသး, ဒ်လုၢ်လၢ်တမံၤအသိးဘၣ်ဒီး,တၢ်ကမၤန့ၢ်က့ၤ ပတၢ်သ့ၣ်နီၣ်တဖၣ်န့ၣ် ကကီခဲဝဲဒၣ်လၢပဂီၢ်န့ၣ်လီၤ.
ကျဲတဘိလၢ ပကမၤဂ့ၤထီၣ် ပတၢ်သ့တၢ်ဘၣ်လၢ အဘၣ်ထွဲဒီးတၢ်မၤန့ၢ်က့ၤ ပတၢ်သ့ၣ်နီၣ်တဖၣ်န့ၣ်, မ့ၢ်တၢ်ဒုးအိၣ်ထီၣ်လုၢ်လၢ်လၢ အမၤသ့ၣ်နီၣ်က့ၤပှၤ, မ့တမ့ၢ် ဆိကမိၣ်ထီၣ်က့ၤ တၢ်သ့ၣ်နီၣ်တဖၣ်အံၤန့ၣ်လီၤ. တၢ်ဘၣ်တ့အကစၢ်, ပယွၤန့ၣ် သ့ၣ်ညါဝဲ တၢ်ဂ့ၢ်အံၤအဃိ, မၤလိၣ်ဝဲ ပှၤအံၣ်စရ့လးဖိတဖၣ်လၢ တနွံန့ၣ် ကဘၣ်ပာ်လီၤဆီဝဲ မုၢ်နံၤတနံၤ, ဒ်သိးကဘူၣ်ထီၣ်ဘါထီၣ်တၢ်, ဒီးကအိၣ်ဘှံးအိၣ်သါအဂီၢ်န့ၣ်လီၤ. လၢနီၢ်ခိအတၢ်အိၣ်ဘှံးအိၣ်သါအဂီၢ်, တကးဒံးဘၣ်န့ၣ်, ပကသ့ၣ်နီၣ်ထီၣ်က့ၤ ၂ မိၤ ၂၀:၁၁ အတၢ်ပာ်ဖျါ, “ဃုနံၤအတီၢ်ပူၤန့ၣ် ယွၤတ့လီၤမူခိၣ်, ဒီးဟီၣ်ခိၣ်, ပီၣ်လဲၣ်, ဒီးကယဲၢ်တၢ်အိၣ်လၢ အဝဲသ့ၣ်တဖၣ်အပူၤ,” ဒ်သိးဒီးပကဒိးန့ၢ်ခွဲးယာ်လၢ ပကသိၣ်လိပနီၢ်သးအဂီၢ်န့ၣ်လီၤ. တၢ်အံၤ ကမၤစၢၤပှၤ ဒ်သိးပကသ့ၣ်နီၣ်ထီၣ်က့ၤ တၢ်လၢကစၢ်ယွၤန့ၣ် အိၣ်ထဲတဂၤဧိၤ, ဒီးတမ့ၢ်ပှၤဘၣ်န့ၣ်လီၤ.
ပတၢ်အိၣ်မူလၢ ပဘၣ်ဖံးမၤတၢ်အဆိအချ့တဖၣ်အပူၤ, ဘၣ်တဘျီဘျီန့ၣ် ဒ်သိးပကဟံးဃာ် တၢ်သ့ၣ်နီၣ်တဖၣ်လၢ ယွၤမၤတ့ၢ်တၢ်လၢပဂီၢ်, ဒီးပှၤဂၤအဂီၢ်န့ၣ် ပညိကွံာ်ဝဲဒၣ်န့ၣ်လီၤ. ဖဲပသးကလၢၢ်ဘၣ် တၢ်သးလီၤဘှံး, ဒီးပအိၣ်ထဲတဂၤဧိၤ အကတီၢ်, ပှၤလၢအအံးထွဲကွၢ်ထွဲပတၢ်အိၣ်မူ ဘူးဘူးတံၢ်တံၢ်, ဒီးအၢၣ်လီၤပှၤလၢ ကအိၣ်ဒီးပှၤတဂၤန့ၣ် ပသးပ့ၤနီၣ်ကွံာ်ဝဲဒၣ်န့ၣ်လီၤ. တၢ်ဆိကတီၢ် ညီနုာ်ပတၢ်ဖံးတၢ်မၤတဖၣ်အပူၤန့ၣ်, ဟ့ၣ်ပှၤခွဲးယာ်လၢ ပကဒိးန့ၢ်က့ၤ- “တၢ်မၤအလုၢ်အလၢ်လၢ တၢ်မၤန့ၢ်ကဒါက့ၤတၢ်”- မ့ၢ်တၢ်ပာ်လီၤသးလၢ တၢ်ဆိကတီၢ်, ဒီးသ့ၣ်နီၣ်က့ၤ ပကစၢ်ယွၤ, ဒ် စံး ၁၀၃:၂ ပာ်ဖျါဝဲအသိး “အတၢ်မၤဂ့ၤတဖၣ်န့ၣ် မ်နသုတသးပ့ၤနီၣ် နီတမံၤတဂ့ၤ” န့ၣ်လီၤ.