တၢ်မၤနံၣ်ဆဲးဆၢ လၢတၢ်ဟဲဒုး ကီၢ်အမဲရကၤ ပှဲၤထီၣ်ခံဆံခံဝီၤတဝီၤ, ဖဲလါစဲးပထ့ဘၢၣ် (၁၁) သီ, ၂၀၂၃ နံၣ် အနံၤန့ၣ်, တၢၣ်ကွဲၤ ခံကထၢလၢ အဒုးသးကတုၤပှၤဂၤ အိၣ်ဖျါဝဲဃံဃံလၤလၤ လၢဝ့ၢ်နယူယီး အမူကပိာ်လိၤန့ၣ်လီၤ. ဒ်အမ့ၢ် တၢ်သူၣ်ထီၣ်အတဃံာ်ဖးထီ “ Twin Tower” အိၣ်ဆိးတၢ်အလီၢ်အကျဲအသိး, ဝ့ၢ်အံၤတူၢ်ဘၣ်ခီၣ်ဘၣ်တၢ်ဟဲဒုးမၤဟးဂီၤတၢ်နးနးကျံးကျံးန့ၣ်လီၤ. အနံၣ်ခံဆံဘျဲၣ်အလီၢ်ခံန့ၣ်, ပှၤလၢအထံၣ်ဘၣ်အီၤတဖၣ်အဂီၢ် တၢၣ်ကွဲၤ ခံကထၢအံၤ ဟဲစိာ်န့ၢ်ဝဲ တၢ်မုၢ်လၢ်, ဒီးတၢ်ယါဘျါန့ၣ်လီၤ. လၢတၢ်ဂီၢ်မူအပူၤ ပှၤထံၣ်က့ၤ အကတီၢ်ဖိလၢ တၢၣ်ကွဲၤအံၤ ဟဲဖျါထီၣ်ဝဲလၢ “World Trade Center” တၢ်သူၣ်ထီၣ် အိၣ်တၢ်အလီၢ်အကျဲန့ၣ်လီၤ.
တၢၣ်ကွဲၤတဖၣ်လၢမူကပိာ်လိာ်န့ၣ် ဟဲစိာ်ဝဲ တၢ်မၤဂၢၢ်မၤကျၢၤ ယွၤအတၢ်တီတၢ်လိၤ, စးထီၣ်လၢ စီၤနိအၤ အစိၤန့ၣ်လီၤ. ကစၢ်ယွၤ စံၣ်ညီၣ် တၢ်ဒဲးဘးလၢ အဒုးအိၣ်ထီၣ် တၢ်ဟးဂူာ်ဟးဂီၤဖးဒိၣ် လၢပတၢ်ဆိကမိၣ် တထီၣ်ဘးတဖၣ်န့ၣ်ဝံၤ, ၁ မိၤ ၉:၁၆ ပာ်ဖျါဝဲ ကစၢ်ယွၤပာ်လီၤ တၢၣ်ကွဲၤ အိၣ်ဒီးအလွဲၢ်အကလုာ်ကလုာ်လၢပထံၣ်န့ၢ်အီၤသ့, ဒ်အမ့ၢ် တၢ်ဒုးသ့ၣ်နီၣ်ထီၣ်က့ၤ “တၢ်အၢၣ်လီၤအီၤလီၤအထူအဃိာ်လၢယွၤအၢၣ်လီၤအီလီၤ ဒီးကယဲၢ်တၢ်သးလၢကယဲၢ်တၢ်ညၣ်အကျါ” အဂီၢ်န့ၣ်လီၤ. ၁မိၤ ၇:၁၇-၂၄ ပာ်ဖျါဝဲလၢ “ထံလုၣ်ဘၢတၢ် အသီလွံၢ်ဆံ, ……ဒိးထံဆူၣ်ထီၣ်လၢဟီၣ်ခိၣ်ချၢ အနံၤတကယၤယဲၢ်ဆံ” ဝံၤန့ၣ်ဒီး, ဒ် ၁ မိၤ ၉:၁၂-၁၃ ပာ်ဖျါဝဲအသိး, စီၤနိအၤဒီးအဟံၣ်ဖိဃီဖိတဖၣ်န့ၣ် ကဆၢတူၢ်လိာ်မုာ် တၢၣ်ကွဲၤအံၤ- “တၢ်အၢၣ်လီၤအီလီၤအပနီၣ်”- ထဲလဲၣ်န့ၣ် ပဆိကမိၣ်ကွၢ်သ့ဝဲဒၣ်န့ၣ်လီၤ. တၢ်အံၤမ့ၢ် တၢ်မၤသ့ၣ်နီၣ်ထီၣ် ယွၤအတၢ်တီတၢ်လိၤ, ဒ်သိး ၁ မိၤ ၉:၁၁ စံးဘၣ်ပှၤလၢ “ကယဲၢ်တၢ်ညၣ်တဘၣ်လၢၤဘၣ် တၢ်ဒီၣ်တဲာ်ကွံာ်အီၤလၢ ထံလုၢ်ဘၢတၢ်ဘၣ် ဒီးထံလုၢ်ဘၢတၢ်လၢ အကမၤဟးဂီၤကွံာ် ဟီၣ်ခိၣ်အံၤ တအိၣ်ထီၣ်လၢၤဘၣ်” န့ၣ်လီၤ.
ဖဲပဘၣ်ကွၢ်ဆၢၣ်မဲာ် မုၢ်နံၤလၢအခံးသူတဖၣ်, တၢ်နးတၢ်ဖှီၣ်, တၢ်လီၤမၣ်လၢ အလီၤသးအုးတဖၣ်- ဒ်အမ့ၢ် န့ဆၢၣ်မၤဟးဂီၤတၢ်တဖၣ်, နီၢ်ခိ မ့ၢ်ဂ့ၤ နီၢ်သး တူၢ်ဘၣ်ခီၣ်ဘၣ်တၢ်တဖၣ်, မ့တမ့ၢ် လၢတၢ်ဆူးတၢ်ဆါအဃိမ့ၢ်ဂ့ၤ, လၢတၢ်အကတီၢ်တဖၣ်အံၤအပူၤန့ၣ် မ်ပကွၢ်ထီၣ်ဆူ ကစၢ်ယွၤအအိၣ်န့ၣ်တက့ၢ်. ဖဲတၢ်အကတီၢ်ဒ်သိးအံၤအပူၤန့ၣ် ပမ့ၢ်တထံၣ်ဘၣ် ကစၢ်ယွၤအတၢၣ်ကွဲၤဒၣ်လဲာ် ပအိၣ်ဂၢၢ်ကျၢၤဒီးကစၢ်ယွၤအတၢ်သးတီ လၢအတၢ်အၢၣ်လီၤအီလီၤသ့ဝဲဒၣ်န့ၣ်လီၤ.