ဖဲယတံၤသကိး ကၠၢၣ်ရံၣ် ဒိးန့ၢ်ဝဲ တၢ်အိၣ်ဘှံးအဆၢကတီၢ်တစိၤဖိန့ၣ် ဒ်သိးပကအီၣ်သကိးမုၢ်ဆါတၢ်အီၣ်အဂီၢ်, ပလဲၤချ့ချ့ ဆူပှၤဆါတၢ်အီၣ်အချ့အကျးတဖျၢၣ်န့ၣ်လီၤ. ဖဲပလဲၤတုၤဆူပဲတြီအမဲာ်ညါ တကတီၢ်ဃီန့ၣ်, ပှၤသးစၢ်ဃုဂၤ ဟဲတူၤ, ဒီးလဲၤနုာ်ဝဲလၢ ပမဲာ်ညါန့ၣ်လီၤ. ပတၢ်ဆၢကတီၢ် တအိၣ်အါအါန့ၣ် ပသ့ၣ်ညါအဃိ, ပကဒုးကဒ့ၣ်တၢ်လၢပသးကံၢ်ပူၤန့ၣ်လီၤ. ပှၤသးစၢ်တဖၣ် ဟံးန့ၢ်အလီၢ် ဒ်ကရူၢ်တဖုအသိး, လၢပှၤမၤလိာ် တၢ်အီၣ်တၢ်အီ အစီၢ်နီၤခိၣ် ခီထၢၣ် ခံဖျၢၣ်အမဲာ်ညါ, ဒ်သိးကမၤလိာ်ဒိးန့ၢ်ဆိတၢ်အီၣ်အဂီၢ်န့ၣ်လီၤ. အကတီၢ်ဖဲန့ၣ်, ယနၢ်ဟူထွဲ ကၠၢၣ်ရံၣ် ကတိၤကသွံတၢ်လၢ “ခဲကနံၣ်အံၤ, ဒုးနဲၣ်လၢ်ဘၣ်ယၤ တၢ်ဘျုးတၢ်ဖှိၣ်တက့ၢ်” န့ၣ်လီၤ. ဒ်သိးပကဒိးန့ၢ်ဆိတၢ်အီၣ်အဂီၢ်, အဝဲသ့ၣ်မ့ၢ်ပျဲဆိပှၤန့ၣ် ကမ့ၢ်တၢ်အဂ့ၤလၢပဂီၢ်ဘၣ်ဆၣ်, တမ့ၢ်လၢပကဘၣ်ကွၢ်ဒၣ်ထဲပဂီၢ်ဘၣ်. မ့ၢ်တၢ်ဒုးသ့ၣ်နီၣ်ပှၤလၢ ပကဘၣ်ဆိကမိၣ်တၢ်လၢ ပှၤဂုၤပှၤဂၤ
အဂီၢ်စ့ၢ်ကီးန့ၣ်လီၤ.
လံာ်စီဆှံ သိၣ်လိပှၤလၢ တၢ်အဲၣ်တၢ်ကွံ ဝံသးစူၤတၢ်ဃဲးဃဲး ဒီးမၤဂ့ၤတၢ်, တၢ်အဲၣ်တၢ်ကွံ တသးကါဘၣ်တၢ်ဘၣ်. ၁ ကရံၣ် ၁၃:၅ ပာ်ဖျါဝဲလၢ တၢ်အဲၣ်တၢ်ကွံ “အသးတဒိၣ်ထီၣ်ဘၣ်” န့ၣ်လီၤ. ပှၤကွဲးထုးထီၣ် လံာ်စီဆှံအခီပညီ, မဲးသယူ ဟဲနရ့ၣ် ကွဲးပာ်ဖျါဝဲ တၢ်အဲၣ်တၢ်ကွံအဂ့ၢ်, “အသူၣ်အိၣ်အသးအိၣ် (လၢပှၤအါဂၤအဂီၢ်) တၢ်အဂ့ၤအဝါ, ပှၤဂၤအတၢ်သူၣ်မံသးမံ, အါန့ၢ်ဒံးအကစၢ်ဒၣ်ဝဲအဘျုးန့ၣ်လီၤ.” ကစၢ်ယွၤ ပတၢ်သကညီၤပတၢ်အဲၣ်တၢ်ကွံ မ့ၢ်တၢ်လၢ ပဆိကမိၣ်ထီၣ်တၢ်လၢပှၤဂုၤပှၤဂၤအဂီၢ်လၢယဆိကတၢၢ်န့ၣ်လီၤ.
ပှၤအါဂၤန့ၣ် ဘၣ်အိၣ်မူ ဖဲဟီၣ်ခိၣ်လၢ ဒုးကဲထီၣ်တၢ်သးတံာ်တာ်ညီဒိၣ်မးတဘ့ၣ်အဃိ, ဒ်သိးပကဃုထၢတၢ်သူၣ်စူၤသးစူၤ, ဒီးသူၣ်ကညီၤသးကညီၤ ပှၤဂုၤပှၤဂၤအဂီၢ်, အဆၢဖိ ၄ ပာ်ဖျါဝဲ ပကဘၣ်ဃ့ကစၢ်ယွၤ အတၢ်မၤစၢၤ, ဒီးအတၢ်ဘျုးတၢ်ဖှိၣ် တလီၢ်လီၢ်န့ၣ်လီၤ. ကတိၤဒိ ၁၉:၁၁ ပာ်ဖျါအါထီၣ်ဝဲ “ပှၤကူၣ်တၢ်သ့န့ၣ် သးထီၣ်ကီ, ဒီးလဲၤကပာ်တၢ်ကမၣ်န့ၣ် မ့ၢ်အလၤကပီၤလီၤ” န့ၣ်လီၤ.
တၢ်အဲၣ်အတၢ်မၤ ဒ်သိးအံၤန့ၣ် ဟဲစိာ်တၢ်မၤလၤကပီၤယွၤ, ဒီးပှၤဂုၤပှၤဂၤ ဒ်သိး ကဆိကမိၣ် အအဲၣ်တၢ်ကွံအဂီၢ် ယွၤကစူးကါတၢ်အဲၣ်အတၢ်မၤအံၤသ့ၣ်သ့ၣ်န့ၣ်လီၤ.
ခဲကန့ၣ်အံၤ, ခီဖျိလၢယွၤ အဂံၢ်အဘါအပူၤန့ၣ်, မ်ပကဟံးန့ၢ်တၢ်ခွဲးတၢ်ယာ် ကိးမံၤလၢပကဒုးနဲၣ် ယွၤအတၢ်ဘျုးတၢ်ဖှိၣ်အဂီၢ်န့ၣ်တက့ၢ်.