ဘၣ်တဘျီဘျီန့ၣ်, လၢတၢ်လီၤကမၢကမၣ်အပူၤ သူၣ်ဂ့ၢ်သးကျိၤအတၢ်ကစီၣ်, ဟဲဖျါထီၣ် သတူၢ်ကလာ်လၢ တၢ်တဆၢမုၢ်လၢ်ဘၣ်တၢ်အလီၢ်, အဒိ, လၢလံာ်တၢ်ဂီၤကွံးကွးအပူၤန့ၣ်လီၤ. စတဲ(န်) လံၤ (Stan Lee) မ့ၢ်ပှၤလၢအတ့ထုးထီၣ် မၤဘဲလ် (Marvel comic) လံာ်တၢ်ဂီၤကွံးကွး လၢအမံၤဟူသၣ်ဖျါတဖၣ်န့ၣ်, လဲၤပူၤကွံာ် ဟီၣ်ခိၣ် ဖဲ ၂၀၁၈ နံၣ်, ဒီးပာ်လီၤတဲာ်တ့ၢ်တၢ်န့ၢ်သါတဖၣ်, လၢအမ့ၢ် စပဲၣ်ဒၢၣ် မဲ(န်) (Spider-Man), အါယၢၢ် မဲ(န်) (Iron Man), ဖဲ(န်)တဲးစတ့း ဖီ (Fantastic Four), ဟီး (Hulk), ဒီးလံာ်တၢ်ဂီၢ်ကွံးကွးအဂၤတဖၣ်န့ၣ်လီၤ.
ပှၤလၢ အဒိးမဲာ်ဒိးလၢအဒီတဒၢမုၢ်, အိၣ်ဒီးအမဲာ်နံၤကမှံ, ဒီးအမံၤဟူသၣ်ဖျါတဂၤအံၤ, နံၣ်လၢအဆံတဖၣ်အဆံတီၢ်ပူၤန့ၣ် ဆဲးလီၤဝဲအနီၢ်ကစၢ်တၢ်ပနီၣ် လံာ်ကျိၤ “အ့းစဲလ်စံၤယၤ” အံၤလၢ ကိးလါဒဲး အလံာ် မၤဘဲလ် တၢ်ဂီၤကွံးကွးတဖၣ်အပူၤန့ၣ်လီၤ. ဖဲ ၂၀၁၀ နံၣ်န့ၣ် စတဲ(န်) လံၤ ကွဲးပာ်ဖျါဝဲလၢ ထွံးထၢၣ် (Twitter) အပူၤ, ဘၣ်ထွဲဒီးအလံာ်မဲာ်ဖျၢၣ် “အ့းစဲလ်စံၤယၤ” အခီပညီ- ဒ်အမ့ၢ်, ဆူလီၢ်ထီၣ်ထီ, ဒီးဆူညါ တၢ်မၤလၤကပီၤဒိၣ်ဒိၣ်မုၢ်မုၢ်န့ၣ်လီၤ. တဘျီလၢ်လၢ်, ဖဲယကွဲးတီၢ်ထီၣ် တၢ်တမံၤမံၤလၢထွံးထၢၣ်အလိၤဝံၤ, ယဆၢဂ့ၤဆၢဝါဘၣ်သုလၢ, “အ့းစဲလ်စံၤယၤ” န့ၣ်လီၤ.
ယဘၣ်သူၣ်ဘၣ်သးလၢတၢ်ဂ့ၢ်အံၤန့ၣ်လီၤ. စတဲ(န်) လံၤ အနီၢ်ကစၢ်ဒၣ်ဝဲ ပာ်သူၣ်ပာ်သးဧါ, တပာ်သူၣ်တပာ်သးဧါန့ၣ် ယတသ့ၣ်ညါလီၤတံၢ်ဘၣ်ဆၣ်, အဝဲသူလံာ်မဲာ်ဖျၢၣ်လၢ ပှၤတညီနုၢ်သူဝဲန့ၣ် ဒုးနဲၣ်ဖျါက့ၤ စီၤပီလူး ကွဲးသဆၣ်ထီၣ်, ပှၤစူၢ်က့ၤနာ်က့ၤတၢ်ဖိတဖၣ်လၢ ဝ့ၢ်ဖံလံးပံၤ, ဒ်သိးကကွၢ်စိဃီၤတၢ် ဆူအမဲာ်ညါ, ဒီးဆူတၢ်ထီၣ်ထီ, ဒီးတမ့ၢ်ဘၣ်တၢ်ဂုၤက့ၤဆူ အလီၢ်ခံအဂီၢ်န့ၣ်, ပကထံၣ်ဘၣ်ဖဲ ဖံလံး ၃:၁၃-၁၄ အပူၤ, “ယပာ်သးပ့ၤနီၣ်ယသးလၢ တၢ်အိၣ်လၢယလီၢ်ခံ ဒီးယယူာ်ဃီၤယသးဆူတၢ်အိၣ်လၢယမဲာ်ညါ… ဒ်သိးယကန့ၢ်ဘၣ် တၢ်ဘျုးဘၣ်ဃးဒီးယွၤ အတၢ်ကိးထီၣ်ထီလၢယ့ၣ်ရှူးခရံာ်အပူၤန့ၣ်လီၤ.”
ပဘျးစဲထီသ့ဝဲဒၣ်ညီ ခီဖျိတၢ်ပီၢ်ယၢ်လီၤက့ၤသးလၢ ပမၤတၢ်တမံၤမံၤအဖီခိၣ်, မ့တမ့ၢ် တၢ်ဆိကမိၣ်က့ၤတၢ် ခံဘျီတဘျီ, လၢခါအပူၤကွံာ် ပမၤတ့ၢ်တဖၣ်န့ၣ်လီၤ. ဘၣ်ဆၣ် ပကဘၣ်ပျဲလဲၤပူၤကွံာ် တၢ်ပီၢ်ယၢ်လီၤက့ၤသးတဖၣ်, ဒီးဟံးဃာ်ပၢၤဃာ်တၢ်ပျၢ်တၢ်ဒဲးဘး, ဒီးအတၢ်တိာ် လၢကစၢ်ယ့ၣ်ရှူးခရံာ် ဟ့ၣ်လီၤပှၤထူးထူးတီၤတီၤ, ဒီးဃ့ၢ်သဘျိၣ် ဆူလီၢ်ထီၣ်ထီ, ဒီးဆူတၢ်မဲာ်ညါ လၢကစၢ်ယွၤအလၤကပီၤဒိၣ်ဒိၣ်မုၢ်မုၢ်အဂီၢ်န့ၣ်လီၤ. ” အ့းစဲလ်စံၤယၤ- Excelsior” န့ၣ်လီၤ.