တီၤဘျီကၠိဖိတဂၤ ကိးတၢ်ဆူလီပှံၤအနီၣ်ဂံၢ် ဘၣ်ထွဲဒီးဂ့ၢ်ဂီၤအူန့ၣ်လီၤ. ဖဲပှၤဘၣ်မူဘၣ်ဒါတဂၤ စံးဆၢအီၤန့ၣ်ဒီး, ပိာ်ခွါဖိအံၤ စံးဘၣ်အီၤ “ယလိၣ်ဘၣ်တၢ်မၤစၢၤ” န့ၣ်လီၤ. ဖဲပှၤဘၣ်မူဘၣ်ဒါ ကတဲာ်ကတီၤသးအဆၢကတီၢ်, နၢ်ဟူဝဲပိာ်မုၣ်တဂၤအကလုၢ်, ဒီးတဲဘၣ်ပိာ်ခွါဖိအံၤလၢ “ကၠီနံၣ်, မ့ၢ်နမၤတၢ်မနုၤန့ၣ်လဲၣ်” န့ၣ်လီၤ. ကၠီနံၣ် စံးဆၢက့ၤလၢ မ့ၢ်လၢဒွးဝဲလံာ်တၢ်ဒွးတဘၣ်အဃိ, ဒ်အမိၢ်စံးဘၣ်အီၤ,ဖဲလၢနလိၣ်တၢ်မၤစၢၤ နကိးဃ့တၢ်မၤစၢၤသ့ဝဲဒၣ်အဃိ, အဝဲကိးထီၣ်နီၣ်ဂံၢ် ၉-၁-၁ အံၤန့ၣ်လီၤ. ကၠီနံၣ် အဂီၢ်, မ့ၢ်ဂ့ၢ်ဂီၤအူအတၢ်လိၣ် နီၢ်နီၢ်န့ၣ်လီၤ. ပှၤလၢအသူၣ်ကညီၤသးကညီၤတၢ်တဂၤ, လၢအနၢ်ဟူဘၣ် ဖိသၣ်အတၢ်ဃ့အံၤအဂီၢ်န့ၣ်, မ့ၢ်အကတီၢ်လၢအကါဒိၣ်ကတၢၢ်, ဒ်သိးကမၤစၢၤဝဲဖိသၣ်အံၤန့ၣ်လီၤ.

စံး ၃၉:၄ န့ၣ် ပကထံၣ် ပှၤကွဲးထါစံးထီၣ်ပတြၢၤ, စီၤဒၤဝံး, ဖဲအလိၣ်ဘၣ်တၢ်မၤစၢၤအကတီၢ်, စံးဝဲ, “ယွၤဧၢ, ဘိးဘၣ်သ့ၣ်ညါယၤလၢ ယကတၢၢ်, ဒီးယမုၢ်နံၤတဖၣ်အတၢ်ပှဲၤအံၤပှဲၤနုၤ မ့ၢ်အဆံးအါလဲၣ်န့ၣ်တက့ၢ်” န့ၣ်လီၤ. အဆၢဖိ ၇ န့ၣ် စံးဝဲလၢ, “ကစၢ်ဧၢ, ယမုၢ်လၢ်တၢ်လၢနၤလီၤ.” လၢတၢ်န့ၣ်အဃိ, အဆၢဖိ ၁၂ န့ၣ် စီၤဒၤဝံး ဃ့ကညးဝဲလၢ ကစၢ်ယွၤ ကဒိကနၣ်, ဒီးကစံးဆၢ “အတၢ်ထုကဖၣ်” န့ၣ်လီၤ. ဝံၤန့ၣ်ဒီး, အဆၢဖိ ၁၃ န့ၣ် လၢတၢ်တဆိကမိၣ်အပူၤ, ဃ့ကညး ကစၢ်ယွၤလၢ “ပျဲယၤ, ဒ်သိးယကဆူၣ်ထီၣ်က့ၤတက့ၢ်” န့ၣ်လီၤ. စီၤဒၤဝံး အတၢ်လိၣ်တဖၣ် မ့ၢ်တၢ်မနုၤလဲၣ်န့ၣ် တပာ်ဖျါထီၣ်ဝဲဘၣ်ဆၣ်, လၢလံာ်စီဆှံအဆၢအါတီၤအပူၤန့ၣ်, စီၤဒၤဝံး ပာ်ဖျါထီၣ်ဝဲလၢ ကစၢ်ယွၤကအိၣ်ဒီးအီၤထီဘိ, ကနၢ်ဟူ, ဒီးကစံးဆၢအတၢ်ဃ့ထုကဖၣ်သ့ၣ်တဖၣ်န့ၣ်လီၤ.

ဖဲလၢပမၤဂၢၢ်မၤကျၢၤ ပတၢ်ဃ့ထုကဖၣ်န့ၣ်, လၢပကစၢ်ယွၤ လၢတဆီတလဲအသး နီတဘျီတဂၤအံၤအဂီၢ်, တၢ်လၢအဒိၣ်တလၢ, မ့တမ့ၢ်, မ့ၢ်တၢ်လၢအဆံးတလၢ, တအိၣ်ဘၣ်နီတမံၤဘၣ်န့ၣ်လီၤ. တကတီၢ်ဃီ, ပတၢ်နာ်ကစၢ်ယွၤန့ၣ်, ကဒုးအိၣ်ထီၣ် တၢ်ပၢဆှၢရဲၣ်ကျဲၤပသးလၢ အကဒံကဒါ, အဘၣ်နးဘၣ်ဖှီၣ် တဆီဘၣ်တဆီန့ၣ်လီၤ. ကစၢ်ယွၤနၢ်ဟူပှၤ, ကဟုကယာ်ပှၤ, ဒီးစံးဆၢပတၢ်ထုကဖၣ်ကိးထံၣ်ဒဲး, လၢပယၢၤထီၣ်အီၤတဖၣ်န့ၣ်လီၤ.