ယမါ ကၤရံၣ် ကိးယၤဆူ ပဲတြီဖိ ဒီးဒုးနဲၣ်ယၤ တၤဃီၤဖးဒိၣ်တဒု စံၣ်ဖုစံၣ်တခွ့ လၢတၢ်သးဖှံဒီး ဒီးဃ့ၢ်ထီၣ်ဃ့ၢ်လီၤလၢပကရၢၢ်အချၢ သ့ၣ်ပှၢ်အကပၤန့ၣ်ဒီး စံးဝဲ ခဲအံၤတၢ်လၢယထံၣ်ဘၣ်န့ၣ် ယနာ်ယဲတသ့လၢၤဘၣ်န့ၣ်လီၤ. ပကရၢၢ်ဖးလဲၢ်အပူၤန့ၣ် အိၣ်ဒီး ပထွံၣ်ဖးဒိၣ်တဖၣ်ဘၣ်ဆၣ် တမီၤဝဲ တၤဃီၤမိၢ်အံၤဘၣ်. ဒ်ကရၢၢ်အချၢ တၤဃီၤမိၢ် ဃ့ၢ်ထီၣ်ဃ့ၢ်လီၤ၀ဲအသိး ပထွံၣ်ဖးဒိၣ်တဖၣ်လၢပကရၢၢ်အပူၤ စ့ၢ်ကီး ဃ့ၢ်ထီၣ်ဃ့ၢ်လီၤ ဒ်အမ့ၢ် လိာ်ကွဲသကိးတၢ်န့ၢ် ကအိၣ်ဝဲ တနၣ်ရံၣ် ဃာ်ဃာ်န့ၣ်လီၤ. ဖဲတၤဃီၤမိၢ် ဆိကတီၢ် တၢ်ဟူးတၢ်ဂဲၤ ဒီးကွၢ်ဝဲ ပထွံၣ်တဖၣ် အကတီၢ်န့ၣ်ဒီး ပထွံၣ်တဖၣ်စ့ၢ်ကီး ဆိကတီၢ်ဝဲ ဒီးစူၣ်စုစူၣ်ခီၣ် အိၣ်ကတဲာ်ကတီၤအသးလၢ ကဃ့ၢ်ပြၢကဒီးတဘျီအဂီၢ်န့ၣ်လီၤ. တၢ်မၤအသးအံၤ တမ့ၢ်ဒ် တၢ်မံၤလာ်ဒီး တၢ်လၢအလူၤဖီၣ်အီၣ်တၢ်မံၤလာ်အသိးဘၣ်. မ့မ့ၢ်တၤဃီၤမိၢ်ဒီး ထွံၣ်တဖၣ် လိာ်ကွဲသကိး မၤသးခုလိာ်သး ကဒဲကဒဲန့ၣ်လီၤ.
ယၤဒီး ကၤရံၣ်န့ၣ် ပထံၣ်လၢ မုၢ်တဂီၤအံၤ အဝဲသ့ၣ် လိာ်ကွဲသကိး လၢတၢ်သူၣ်ဖှံသးညီအပူၤန့ၣ် ဟ့ၣ်ထီၣ် ယွၤအဘီအမုၢ် အက့ၢ်အဂီၤလၢ အကဟဲန့ၣ်လီၤ. ယရှါယၤ ၆၅း၁၇ အပူၤန့ၣ် ဝံယရှါယၤ ပာ်ဖျါထီၣ် ကစၢ်ယွၤအတၢ်အၢၣ်လီၤဘၣ်ထွဲဒီး ယွၤအဘီအမုၢ် အဂ့ၢ် ဒ်အမ့ၢ် “ကွၢ်ကွၢ်, ယတ့လီၤမူခိၣ်အသီ ဒီးဟီၣ်ခိၣ်အသီ” န့ၣ်လီၤ. အဆၢဖိ ၂၅ န့ၣ် ပာ်ဖျါကဒီးဝဲ “ထွံၣ်မံၤ ဒီးသိဖိ ကအီၣ်အဆၣ်အပူၤဃီ, ဒီးခ့ယုၢ်ကအီၣ် လီၢ်ဧိၤဒံးဧိၤ ဒ်ဂီၤဖံးအသိးန့ၣ်”လီၤ. တၢ်မံၤလၢ်လၢအဘၣ်လူၤဖီၣ်အီၤန့ၣ် တအိၣ်လၢၤဘၣ်. တၢ်ကမ့ၢ်ထဲ တၢ်ဒီတံၤသကိးတဖၣ်န့ၣ်လီၤ.
ဖျါလၢဝံယရှါယၤအတၢ်ကတိၤတဖၣ် အဲၣ်ဒိးဒုးနဲၣ်ပှၤလၢ ဆၣ်ဖိကီၢ်ဖိတဖၣ် အိၣ်ဆိးဝဲလၢ ယွၤအဘီအမုၢ်အထူအယိာ်အပူၤ ဒီးကနဲၣ်ဖျါထီၣ် တၢ်လၢ ကစၢ်ယွၤကတဲာ်ကတီၤ၀ဲ လၢအတၢ်ဘၣ်တ့အဂီၢ် လီၤဆီဒၣ်တၢ် လၢပှၤအဲၣ်အီၤအဂီၢ်န့ၣ်လီၤ. ကမ့ၢ်ဝဲတၢ်လီၢ် အမုာ်အဃံအလၤ ဒ်လဲၣ်တတီၤလဲၣ်. ဒ်ပတၢ်နာ်သန့ၤသး ခီဖျိလၢ ပတၢ်စူၢ်တၢ်နာ်အသိး ကစၢ်ယွၤအိးထီၣ်ပမဲာ်ချံ တၢ်ထံၣ်ဆူ တၢ်မ့ၢ်တၢ်တီ လၢအကဟဲ တၢ်မုၢ်တၢ်ပၢၤ ဒီး တၢ်အိၣ်ဘံၣ်အိၣ်ဘၢအထူအယိာ်လၢ ကစၢ်ယွၤ အမဲာ်ညါန့ၣ်လီၤ.
