ယလူၤကွၢ်ကီ တၢ်ထွါခီၣ်တဖၣ် ဒုးနဲၣ်ဝဲလၢပလီၢ်ကဝီၤအကျးဖးဒိၣ်တဖျၢၣ်အပူၤ, ဒီးလၢတၢ်ထွါခီၣ်တဖၣ်အလိၤန့ၣ် ယပာ်သူၣ်ပာ်သးလၢ တၢ်ကွဲးဖိတဖၣ်န့ၣ်လီၤ. “ဟဲလိၣ်” (Hello), ဒီး “ဟံၣ်” (Home) တၢ်ကွဲးဖိတဖၣ်န့ၣ် လၢလံာ်ဖျၢၣ် “အိၣ်” (o) အလီၢ်န့ၣ် ယထံၣ် ပှၤတ့နုာ်ဝဲ ပှၤအသးအဂီၤန့ၣ်လီၤ. ဒ်ညီနုၢ် ပှၤဃုထၢဝဲအသိး ယဃုထၢလံာ်ဖျၢၣ် “တၢ်တူၢ်လိာ်မုာ်” (Welcome), ဒီးလၢယဟံၣ်န့ၣ် ယပာ်အီၤလၢ အလီၢ်ဘၣ်အကျဲဘၣ်, ဒီးယသမံသမိးလီၤက့ၤယသးန့ၣ်လီၤ. ဒ်ကျိၤကျဲလၢယွၤအဲၣ်ဒိးဝဲအသိး မ့ၢ်မးယဟံၣ် တူၢ်လိာ်မုာ်ပှၤဂၤန့ၣ်ဧါ. ဖိသၣ်လၢ ဟဲဆါကိၣ် ခၠီးကလဲး လၢကၠိတၢ်တိာ်ကျဲၤအဂီၢ်မ့ၢ်ဂ့ၤ, ပှၤလိၣ်ဘၣ် တၢ်မၤစၢၤတဂၤ လၢယဟံၣ်အဃၢၤမ့ၢ်ဂ့ၤ, ဒူၣ်ဖိထၢဖိလၢ ဝ့ၢ်အဂၤ အတၢ်ဟဲအိၣ်သကိး သတူၢ်ကလာ်မ့ၢ်ဂ့ၤန့ၣ်, မ့ၢ်ယတူၢ်လိာ်မုာ် အဝဲသ့ၣ်ကစီဒီဧါ.

မၢ်ကူး ၉:၁-၁၃ န့ၣ် ကစၢ်ယ့ၣ်ရှူး လဲၤဆူကစၢၢ်ထီၣ်ထီတဖျၢၣ်, တၢ်လီၢ်လၢ အက့ၢ်အဂီၤလဲလိာ်အသး, ဖဲလၢအပျဲၢ်အဘီၣ်စီၤပ့းတရူး, စီၤယိၤဟၣ်, စီၤယၤကိာ်တဖၣ် ဆၢထၢၣ်ဃိကလာ် လၢတၢ်ကမၢကမၣ် လၢကစၢ်စီဆှံအမဲာ်ညါ, ဒီးအဆၢဖိ ၁၄-၂၉ ပာ်ဖျါဝဲလၢ ကစၢ်ယ့ၣ်ရှူး ဟဲက့ၤဝဲဒၣ် ဒ်သိးကမၤဘျါက့ၤ ဖိသၣ်ပိာ်ခွါဖိလၢ တၢ်နါဒိးအီၤတဂၤ, ဒီးအပၢ်န့ၣ်အတၢ်မုၢ်လၢ်လီၤမၢ် အိၣ်တၢ်အလီၢ်န့ၣ်လီၤ. အဆၢဖိ ၃၀-၃၂ န့ၣ် ကစၢ်ယ့ၣ်ရှူး သိၣ်လိသီလိ လီၤလီၤဆီဆီ ထဲအပျဲၢ်အဘီၣ်တဖၣ် ဘၣ်ထွဲဒီး အတၢ်သံ အဂ့ၢ်, လၢကဟဲတုၤဃီၤဝဲန့ၣ်လီၤ. အဆၢဖိ ၃၃-၃၄ ပာ်ဖျါဝဲ တၢ်လၢကစၢ်ယ့ၣ်ရှူးအဲၣ်ဒိးစံးဝဲန့ၣ် အပျဲၢ်အဘီၣ်တဖၣ် တချုးန့ၢ်, တနၢ်ပၢၢ်ဝဲလီၤတံၢ်လီၤဆဲးဘၣ်န့ၣ်လီၤ. လၢတၢ်န့ၣ်အဃိ, အဆၢဖိ ၃၇ န့ၣ် ကစၢ်ယ့ၣ်ရှူး ဟံးန့ၢ် ဖိသၣ် ဒီးပာ်ဝဲလၢအကံၣ်ဒုၣ်လိၤ, ဒီးဖိးဃာ်အီၤလၢအစု, ဒီးစံးဝဲဒၣ် “ဖဲဒၣ်ပှၤလၢအတူၢ်လိာ် ဖိသၣ်ဒ်အံၤအသိးတဂၤလၢ ယမံၤအဃိန့ၣ် မ့ၢ်အတူၢ်လိာ်ယၤလီၤ. ဒီးဖဲဒၣ် ပှၤလၢအတူၢ်လိာ်ယၤန့ၣ် တမ့ၢ်ဘၣ် အတူၢ်လိာ်ယၤဘၣ်. မ့ၢ်အတူၢ်လိာ်ပှၤလၢ အမၢလီၤယၤတဂၤလီၤ.” တၢ်ကတိၤ “တူၢ်လိာ်” အခီပညီ ဖဲအံၤန့ၣ် မ့ၢ်တၢ်ဒိးန့ၢ်အီၤ, ဒီးတူၢ်လိာ်အီၤ ဒ်တမှံၤတဂၤအသိးန့ၣ်လီၤ. ကစၢ်ယ့ၣ်ရှူး အဲၣ်ဒိးလၢ အပျဲၢ်အဘီၣ်တဖၣ် ကတူၢ်လိာ် ပှၤကိးဂၤ, ပှၤလၢအတဘၣ်တၢ်ပာ်လုၢ်ပာ်ပှ့ၤ မ့ၢ်ဂ့ၤ, ပှၤလၢအသ့မၤကီမၤခဲပှၤ မ့ၢ်ဂ့ၤ ပကဘၣ်တူၢ်လိာ် ဒ်သိးပတူၢ်လိာ်အီၤန့ၣ်လီၤ.

ယဆိကမိၣ်ထီၣ် ယတၢ်တူၢ်လိာ်မုာ်တၢ်ထွါခီၣ်ဖိအဂ့ၢ်, ဒီးလၢယသးပူၤ မ့ၢ်ယကမၤလဲၢ်ထီၣ် ကစၢ်အတၢ်အဲၣ်ဆူပှၤဂၤအအိၣ်ဒ်လဲၣ်န့ၣ်လီၤ. တၢ်မၤအံၤ စးထီၣ်လၢ ပတူၢ်လိာ်မုာ်ခရံာ်, ဒ်ပှၤတမှံၤလုၢ်ဒိၣ်ပှ့ၤဒိၣ်တဂၤအသိးန့ၣ်လီၤ. မ့ၢ်ယကပျဲကစၢ်နဲၣ်ဆှၢယၤလၢ, တၢ်တူၢ်လိာ်မုာ်ပှၤဂၤတဖၣ် ဒ်ကျိၤကျဲလၢ အအဲၣ်ဒိးယကမၤအသိးန့ၣ်ဧါ.