ဘၣ်မနုၤအဃိ တၢ်ခဲလၢာ်မၤအသးတဘျီဃီလဲၣ်န့ၣ် ခဲရၢၣ် တနၢ်ပၢၢ်ဝဲဘၣ်. အတၢ်မၤတဘၣ်လိာ်ဘၣ်စး, တကးဒံးဘၣ်န့ၣ်, အဖိမုၣ် ထီၣ်ကၠိအကတီၢ် အခီၣ်န့ၣ်ဘၣ်ဒိဝဲ, ဒီးအနီၢ်ကစၢ်ဒၣ်ဝဲစ့ၢ်ကီး တူၢ်ဘၣ်ဝဲတၢ်ဆါဘၣ်ကူဘၣ်ဂာ်န့ၣ်လီၤ. အဝဲဆိကမိၣ်ထီၣ် ဝဲဒၣ်လၢ ဒ်သိးယဘၣ်ကွၢ်ဆၢၣ်မဲာ်တၢ်တဖၣ်အံၤအဂီၢ် မ့ၢ်ယမၤဘၣ်တၢ်မနုၤတဖၣ်လဲၣ်န့ၣ်လီၤ. တၢ်လၢအမၤသ့ဝဲထဲတမံၤန့ၣ် မ့ၢ်တၢ်န့ၢ်ဂံၢ်န့ၢ်ဘါအဂီၢ် ဃ့တၢ်လၢယွၤန့ၣ်လီၤ.

စီၤယိၤဘးစ့ၢ်ကီး တၢ်တတၢာ်တနါတဖၣ် ဘၣ်မနုၤအဃိ ဟဲမၤဘၣ်ဒိအီၤလဲၣ်န့ၣ်တသ့ၣ်ညါဝဲဘၣ်. တၢ်နးတၢ်ဖှီၣ်, ဒီးတၢ်လီၤမၢ်တဖၣ်န့ၣ် နးဒိၣ်န့ၢ်ဒံး ခဲရၢၣ် အတၢ်လဲၤ ခီဖျိန့ၣ်လီၤ. တၢ်ပာ်ဖျါတအိၣ်လၢ စီၤယိၤဘးသ့ၣ်ညါ တၢ်ဒုးတၢ်ယၤအံၤ မ့ၢ်တၢ်အကါဒိၣ်တမံၤ, လၢအသးသမူအဂီၢ်န့ၣ်လီၤ. ယိၤဘး ၁:၆-၁၂ ပာ်ဖျါဝဲလၢ မုၢ်ကီၤလံၢ်အဲၣ်ဒိး မၤကွၢ် စီၤယိၤဘးအတၢ်နာ်, ဒီးစံးဝဲလၢ စီၤယိၤဘး အစုလီၢ်ခီၣ်ခိၣ်တဖၣ် မ့ၢ်လီၤမၢ်ခဲလၢာ်န့ၣ်ဒီး ကဃၣ်ကွံာ်အသးလၢ ယွၤအအိၣ်န့ၣ်လီၤ. ဖဲတၢ်တတၢာ်တနါ ဟဲလီၤဘၣ် စီၤယိၤဘးန့ၣ်ဒီး, အတံၤသကိးတဖၣ် တဲဆူၣ်တဲနၢၤအီၤလၢ အဘၣ်တၢ်စံၣ်ညီၣ်လၢ အတၢ်ဒဲးဘးအဃိန့ၣ်လီၤ. တမ့ၢ်ဝဲဒ်အတံၤသကိးတဖၣ် စံးဝဲအသိးဘၣ်ဆၣ်, ကဆိကမိၣ်ထီၣ်ဝဲလၢ ဘၣ်မနုၤအဃိ ယဘၣ်တူၢ်တၢ်ဒ်သိးအံၤလဲၣ်န့ၣ်လီၤ. တၢ်လၢ စီၤယိၤဘး တသ့ၣ်ညါဝဲဒၣ်န့ၣ် မ့ၢ်ကစၢ်ယွၤပျဲဝဲ တၢ်ကမၤအသးလၢအီၤန့ၣ်လီၤ.

စီၤယိၤဘး အတၢ်ဂ့ၢ်န့ၣ် ဟ့ၣ်ထီၣ် တၢ်မၤလိ, အိၣ်ဒီးအစိကမီၤဖးဒိၣ် ဘၣ်ထွဲဒီး တၢ်တူၢ်ဘၣ်တၢ်နးတၢ်ဖှီၣ်, ဒီးတၢ်စူၢ်တၢ်နာ်န့ၣ်လီၤ. ပဂုာ်ကျဲးစၢးဃုသ့ၣ်ညါ တၢ်ဂ့ၢ်လၢ အဒုးကဲထီၣ် ပတၢ်ဘၣ်ဒိဆါတဖၣ်ဘၣ်ဆၣ်, လၢပတၢ်နၢ်ပၢၢ်တထီၣ်ဘးတဖၣ်အပူၤန့ၣ် ဘၣ်သ့ၣ်သ့ၣ် တၢ်ဂ့ၢ်ဖးဒိၣ်ကအိၣ်တမံၤ, လၢပတၢ်အိၣ်မူ, တၢ်မၤအသးအပူၤန့ၣ်လီၤ.

ဒ်စီၤယိၤဘးအသိး ပကဟံးဃာ်ဒၣ်ထဲ တၢ်လၢပသ့ၣ်ညါနီၢ်နီၢ်သ့လီၤ. ယွၤဟံးဃာ်ပၢၤဃာ်တၢ်ခဲလၢာ်အဖီခိၣ်လီၤ. ပတဲဒ်န့ၣ်ဒီး ကီကစီဒီ, ဘၣ်ဆၣ်လၢ စီၤယိၤဘး ဘၣ်ကွၢ်ဆၢၣ်မဲာ် တၢ်ဘၣ်ဒိဆါအီၤအပူၤန့ၣ် အဝဲကွၢ်ထီၣ်ဆူ ယွၤအအိၣ်တပယူာ်ဃီဒီး နာ်န့ၢ်ယွၤအတၢ်သ့တၢ်လၢာ်လီၤ. “ယွၤဟ့ၣ်လီၤတၢ်ဒီး ယွၤဟံးထီၣ်ကွံာ်တၢ်, မ်ယွၤအမံၤဘၣ် တၢ်ဆိၣ်ဂ့ၤအီၤတက့ၢ်” (:၂၁). ပဝဲစ့ၢ်ကီး ကွၢ်ဖဲတၢ်ကမၤဒၣ်ဝဲအသးဒီးပှၤ ဒီးဖဲလၢ ပနၢ်တပၢၢ်အီၤဒၣ်လဲာ်န့ၣ် ပဝဲစ့ၢ်ကီး မ်ပနာ်စ့ၢ်ကီးကစၢ်ယွၤတပယူာ်ဃီတက့ၢ်.