ဖဲယဖိမုၣ် မၤလိအသးဝံၤ နုာ်လီၤဆူ သိလ့ၣ်အပူၤဒီး သံကွၢ်ယၤ “ပါပၢ်, မုၢ်တနၤအံၤ ယမံသကိး ယတံၤသကိးကသ့ဧါ” န့ၣ်လီၤ. ယစံးဆၢအီၤလၢ, “ဖိမုၣ်ဧၢ, နသ့ၣ်ညါ ယတၢ်စံးဆၢလီၤ. ယမ့ၢ်ဒၣ်ထဲ ပှၤနီၣ်သိလ့ၣ်လီၤ. တၢ်အိၣ်အသး,မၤအသးတဖၣ်န့ၣ် ယတသ့ၣ်ညါဘၣ်. ပကစံးကတိၤသကိးတၢ်လၢ နမိမိၢ်မီၣ်.”

“ယမ့ၢ်ဒၣ်ထဲ ပှၤနီၣ်သိလ့ၣ်တဂၤလီၤ” န့ၣ် မ့ၢ်တၢ်ကတိၤနံၤတၢ် လၢပဟံၣ်န့ၣ်လီၤ. ကိးမုၢ်နံၤဒဲးန့ၣ် ယဘၣ်သံကွၢ်ယမါ, ပှၤရဲၣ်ကျဲၤတၢ်တဂၤလၢ, ယကဘၣ်လဲၤဖဲလဲၣ်, ဒီးဖဲအဆၢကတီၢ်မတၤန့ၣ် ယကဘၣ်ဆှၢ မတၤတဂၤဆူ တၢ်လီၢ်မတၤလဲၣ်န့ၣ်လီၤ. ယဘၣ်မၤတၢ်မၤလၢ အဘူးအလဲတအိၣ် (moonlinghting) တမံၤ, ဒ်အမ့ၢ် “တၢ်နီၣ် သိလ့ၣ်ဒိးလဲတဂၤ” ဒီးယဖိလိၣ်ဘိထီၣ်သၢဂၤန့ၣ်, ဘၣ်တဘျီဘျီ ယသးကလၢၢ်ဘၣ်လၢ ယမၤတၢ်မၤခံမံၤတမံၤန့ၣ်လီၤ. တလီၢ်လီၢ်န့ၣ်, ယတသ့ၣ်ညါတၢ်မနုၤလဲၣ်န့ၣ် ယတသ့ၣ်ညါလၢၤဘၣ်န့ၣ်လီၤ. လၢတၢ်န့ၢ်အဃိ, ယဘၣ်သံကွၢ် ပှၤကွၢ်ထွဲ ရဲၣ်ကျဲၤတၢ် အခိၣ်ကျၢၢ် (ယမါ) န့ၣ်လီၤ.

မးသဲ အဆၢဒိၣ် ၈ ပာ်ဖျါဝဲ ကစၢ်ယ့ၣ်ရှူးထံၣ်လိာ်သးဒီးပှၤတဂၤ, လၢအသ့ၣ်ညါနၢ်ပၢၢ် တၢ်ဟ့ၣ်လီၤ တၢ်ကလုၢ်, ဒီးတၢ်တူၢ်လိာ် တၢ်ကလုၢ်န့ၣ်လီၤ. မ့ၢ်ဝဲ ရိမ့ၤ အသုးခိၣ်တဂၤ, ဒ်အဝဲအိၣ်ဒီးအစိကမီၤ လၢကဟ့ၣ်လီၤ အကလုၢ်ဆူ အပျဲၢ်လၢအဖီလာ်တဖၣ်အသိးန့ၣ် သ့ၣ်ညါဝဲလၢ ကစၢ်ယ့ၣ်ရှူးအိၣ်ဒီးအစိကမီၤ လၢကမၤဘျါတၢ်န့ၣ်လီၤ. အဆၢဖိ ၈-၉ န့ၣ် စံးဝဲလၢ “မ့မ့ၢ်ထဲနစံး နကလုၢ်တဘီဒီး, ယဖိသၣ်ကဘျါက့ၤလီၤ. အဂ့ၢ်ဒ်အံၤ, ယဲဒၣ်အံၤယအိၣ်စ့ၢ်ကီးလၢ တၢ်စိတၢ်ကမီၤအဖီလာ်, ဒီးယအိၣ်ဒီးသုးဖိ တဖၣ်လၢယဖီလာ်လီၤ” န့ၣ်လီၤ. အဆၢဖိ ၁၀,၁၃ ပာ်ဖျါဝဲလၢ ကစၢ်ယ့ၣ်ရှူး ပတြၢၤဝဲပှၤတဂၤအံၤ အတၢ်နာ်, ဒီးကမၢကမၣ်ဝဲလၢ ပှၤတဂၤအံၤ အစိကမီၤ မ့ၢ်တၢ်ဒ်လဲၣ်န့ၣ် နၢ်ပၢၢ်ဝဲအဃိန့ၣ်လီၤ.

ပဝဲမီၣ်, ယကနာ်န့ၢ် ကစၢ်ယ့ၣ်ရှူး ဖဲအမၢလီၤပှၤ တနံၤဘၣ်တနံၤ လၢပကမၤ အတၢ်မၤအဂီၢ်န့ၣ် တၢ်ကမၤအသးဒီးပှၤဒ်လဲၣ်. ပမ့ၢ်ဆိကမိၣ်လီၤက့ၤပသးလၢ “ယမ့ၢ်ဒၣ်ထဲ ပှၤနီၣ်သိလ့ၣ်တဂၤ” ဒၣ်လဲာ်န့ၣ်ဒီး တၢ်မၤတမံၤလၢ်လၢ်လၢ ပမၤအီၤတဖၣ်န့ၣ်တၢ်ဘၣ်ထွဲအိၣ်ဒီး ယွၤဘီမုၢ်အခီပညီ, ဒီးအတၢ်ပညိၣ်ကွၢ်စိန့ၣ်လီၤ.