အါန့ၢ် နံၣ်ခံကယၤ ဘျဲၣ်အတီၢ်ပူၤ, လၢမဲးသဒ့းတၢ်အိၣ်ဖှိၣ် အလံာ်သးဝံၣ်ကစၢ်ယွၤအပူၤန့ၣ် ထါသးဝံၣ်လၢဟဲအဆိကတၢၢ်တယုၢ် မ့ၢ် “ပျ့ၤလၢအကထီ ကသးဝံၣ်တၢ်အဂီၢ်” (O for a Thousand Tongues to Sing) န့ၣ်လီၤ. ထါသးဝံၣ်အံၤ ဘၣ်တၢ်ကွဲးအီၤလၢ ခၠါ ဝဲးစလ့ၣ် (Charles Wesley), ဒီးအဆိန့ၣ် အခိၣ်တီမ့ၢ်ဝဲ “ပှၤတဂၤ ချုးန့ၢ်က့ၤ နံၣ်သးဖှံ လၢနီၢ်သးအတၢ်လဲလိာ်သးအဂီၢ်” (For the Anniversary Day of One’s Conversion) န့ၣ်လီၤ. ထါသးဝံၣ်အံၤ ဘၣ်တၢ်ကွဲးအီၤ လၢတၢ်မၤလၤကပီၤ နီၢ်သးအတၢ်လဲလိာ်အသီ ခီဖျိအတၢ်စူၢ်တၢ်နာ်ကစၢ်ယ့ၣ်ရှူးအဂီၢ်န့ၣ်လီၤ. ထါအဆၢ အိၣ်ဝဲ (၁၈) ဆၢ, ဒီးဘိးဘၣ်သ့ၣ်ညါယွၤအတၢ်ဂ့ၤတၢ်ဝါအလၤကပီၤ ဆူပှၤလၢအပီၢ်ယၢ်လီၤက့ၤသး, ဒီးပိာ်ကစၢ်ခရံာ်အခံတဖၣ်န့ၣ်လီၤ.

တၢ်စူၢ်တၢ်နာ် ဒ်သိးအံၤန့ၣ် ကြၢးတၢ်ပာ်ပနီၣ် မၤလၤကပီၤအီၤ, ဒီးကြၢး တၢ်ဟ့ၣ်ခီ ဟ့ၣ်နီၤလီၤအီၤန့ၣ်လီၤ. ဒ်သိးစီၤတံၤမသ့း ကအိၣ်ဂၢၢ်ဆိးကျၢၤလၢ အတၢ်စူၢ်တၢ်နာ်အပူၤ, ဒီးကမၤတၢ်သပှၢ်ပှၢ် လၢတၢ်နီၤဟ့ၣ် အတၢ်နာ်အဂီၢ် စီၤပီလူး ဟ့ၣ်သဆၣ်ထီၣ်အီၤလၢ ၂ တံၤ ၂ အပူၤန့ၣ်လီၤ. အဆၢဖိ ၈-၉ န့ၣ် စီၤပီလူးကွဲးနီၣ်ဝဲ, “လၢအဝဲဒၣ် (ယတၢ်သးခုအကစီၣ်) အဃိန့ၣ် ယဘၣ်တၢ်နးတၢ်ဖှီၣ် ပၢၢ်ဒၣ်လဲာ်လၢယဘၣ်တၢ်စၢဃာ်, ဒ်ပှၤမၤအၢတၢ်အသိးန့ၣ်လီၤ.” လၢတၢ်ဆိကမိၣ်ကဒါက့ၤ အတၢ်ဃုထၢတဖၣ်အလီၢ်န့ၣ်, စီၤပီလူး ဒုးသ့ၣ်နီၣ်က့ၤ စီၤတံၤမသ့းလၢ ကသ့ၣ်နီၣ်ထီၣ်က့ၤ တၢ်သးခုကစီၣ်အဂီၢ်- ဒီးအဆၢဖိ ၈ စံးဘၣ်ပှၤ, “ယ့ၣ်ရှူးခရံာ်လၢ အဂဲၤဆၢထၢၣ်က့ၤလၢတၢ်သံ, စီၤဒၤဝံးအချံအသၣ်” န့ၣ်, တဟဲလီၤဝဲလၢကပၢတၢ်အဂီၢ်ဘၣ်, မ့မ့ၢ်ကမၤအခ့အပှၤအတၢ်မၤ, ဒီးအဒိၣ်ကတၢၢ်န့ၣ် ကတူၢ်သံအသးလၢဟီၣ်ခိၣ်အတၢ်ဒဲးဘးတဖၣ်အဂီၢ်, ဒ်သိးပကအိၣ်ဃူအိၣ်ဖိးဒီးယွၤအဂီၢ်န့ၣ်လီၤ. တၢ်သံတမၤနၢၤတၢ်ဘၣ်. ယ့ၣ်ရှူး ဂဲၤဆၢထၢၣ်လၢတၢ်သွၣ်ခိၣ်န့ၣ်လီၤ.

တၢ်ကစီၣ်အံၤ ဒ်အမၤပူၤဖျဲးထီၣ်ပှၤစူၢ်က့ၤနာ်က့ၤတၢ်တဖၣ်အသိး, တၢ်ကစီၣ် အနီၢ်ကစၢ်ဒၣ်ဝဲ တဘၣ်တၢ်စၢဃာ်အီၤဘၣ်. ဖျါလၢတၢ်သံမၤနၢၤတၢ်အလီၢ်အကျဲ, တၢ်လီၢ်တဖၣ်, ဒ်အမ့ၢ် ဃိာ်အဒၢး, တၢ်ဆါဟံၣ်အလီၢ်မံ, တၢ်သွၣ်ခိၣ်ဒၣ်လဲာ်စၢဃာ်ယွၤအကလုၢ်အကထါတန့ၢ်ဘၣ်, အဂ့ၢ်ဒ်အံၤ, အဆၢဖိ ၉ န့ၣ် စီၤပီလူး စံးဝဲဒၣ်, “ယွၤအကလုၢ်အကထါ တဘၣ်ဘၣ်တၢ်စၢဃာ်ဘၣ်” န့ၣ်လီၤ. လၢခရံာ်အပူၤန့ၣ်, တၢ်မုၢ်လၢ်အိၣ်ဝဲဒၣ်လၢ ပှၤကိးဂၤဒဲးအဂီၢ်န့ၣ်လီၤ. တၢ်ကစီၣ်အံၤ မ့ၢ်တၢ်ကစီၣ်လၢ ကြၢးတၢ်ပာ်ပနီၣ် မၤလၤကပီၤအီၤန့ၣ်လီၤ.