သးပှၢ်မုၣ်တဂၤစံးဝဲဒၣ်, “ယဃ့ဘါထုကဖၣ်တၢ်လၢနဂီၢ် အိၣ်လံအနံၣ်ယဲၢ်ဆံလံ” န့ၣ်လီၤ. လၢတၢ်စံးဘျုးဒိၣ်ဒိၣ်ယိာ်ယိာ်အပူၤန့ၣ် ယတံၤသကိး လူ (Lou) ကွၢ်ဝဲ သးပှၢ်မုၣ်အမဲာ်သၣ်လိၤလိၤန့ၣ်လီၤ. ဖဲအလဲၤဟးအိၣ်သကိး ဘူၣ်က့ရံယါ သဝီ (Bulgarian) တဖျၢၣ်, တၢ်လီၢ်လၢအပၢ်ဒိၣ်ထီၣ်ဒီးဟးထီၣ်ဝဲ ဖဲအမ့ၢ်ခွါလိၣ်ဘိ အကတီၢ်န့ၣ်လီၤ. ပှၤပိာ်မုၣ်အံၤ မ့ၢ်ပှၤစူၢ်က့ၤနာ်က့ၤတၢ်တဂၤ, ဒီးအိၣ်ဆိးဖဲ လူ အဖံအဖုတဖၣ် အဟံၣ်ဃၢၤန့ၣ်လီၤ. ဖဲအနၢ်ဟူဝဲ လူ အိၣ်ဖျဲၣ်ထီၣ်လၢ ကီၢ်မိၢ်ပှၢ်အယံၤတဘ့ၣ်အပူၤလံၤလံၤန့ၣ် အဝဲစးထီၣ်ဘါထုကဖၣ်န့ၢ်တၢ်လၢ လူ အဂီၢ်န့ၣ်လီၤ. ခဲအံၤ အနံၣ်ယဲၢ်ဆံဘျဲၣ် လဲၤပူၤကွံာ်ဝံၤအလီၢ်ခံန့ၣ်, ဖဲအလဲၤတၢ်ဖံးတၢ်မၤအဂ့ၢ်အကျိၤ အကတီၢ်, လူ လဲၤဟးဆူသဝီအံၤ, ဒီးစံးကတိၤဝဲ အတၢ်စူၢ်တၢ်နာ်အဂ့ၢ် ဆူပှၤတဖုန့ၣ်လီၤ. အသးအနံၣ်အလါအိၣ်တုၤ သၢဆံဃၣ်ဃၣ်ဒၣ်လဲာ်န့ၣ်, လူ တကဲထီၣ် ပှၤစူၢ်က့ၤနာ်က့ၤကစၢ်ခရံာ်ဒံးဘၣ်. ဖဲကတိၤတၢ်ဝံၤ, သးပှၢ်မုၣ်အံၤ လဲၤဃီၤဆူအအိၣ်, ဒီးစံးဘၣ်အီၤလၢတၢ်ကတိၤအံၤန့ၣ်ဒီး, အဝဲဆိကမိၣ်ထံ ပိာ်မုၣ်သးပှၢ်အံၤ ထုကဖၣ်တၢ်သပှၢ်ပှၢ် လၢအဂီၢ်န့ၣ် အသဟီၣ်ဆူၣ်အဃိ ဒုးကဲထီၣ်အီၤ ပှၤစူၢ်က့ၤနာ်က့ၤတၢ်တဂၤအဂ့ၢ်န့ၣ်လီၤ.
တချုးပတုၤဆူမူခိၣ်ဒံးဘၣ်န့ၣ်, တမ့ၢ်လၢပကသ့ၣ်ညါ ပတၢ်ထုကဖၣ်တဖၣ် အတၢ်ကဲဘျုးလၢလၢပှဲၤပှဲၤ နီတစုဘၣ်. ဘၣ်ဆၣ်, ယွၤအကလုၢ်ကထါ ဟ့ၣ်ကူၣ်ဟ့ၣ်ဖးပှၤ ဖဲကလီးစဲ ၄:၂ အပူၤ, “မၤတၢ်ဘါထုကဖၣ်သပှၢ်ပှၢ်, ဒီးဆိးသီလၢအပူၤ အိၣ်ဒီးတၢ်စံးထီၣ်ပတြၢၤတၢ်အဘျုးအဖှိၣ်တက့ၢ်” န့ၣ်လီၤ. စီၤပီလူး ကွဲးတၢ်ကတိၤတဖၣ်အံၤ ဆူပှၤစူၢ်က့ၤနာ်က့ၤတၢ်ဖိတဖၣ်လၢ ကလီးစဲ ဝ့ၢ်ဆံးဖိအဂီၢ်န့ၣ်, အဆၢဖိ ၃ ပာ်ဖျါဝဲလၢ ဖဲအလဲၤတၢ်တပူၤလၢ်လၢ်န့ၣ် ဒ်သိးယွၤ, “ကအိးထီၣ်အကလုၢ်အကထါအတြဲၤ” အဂီၢ် စီၤပီလူးမၢအဝဲသ့ၣ်ကဘါထုကဖၣ်တၢ်လၢအဂီၢ်စ့ၢ်ကီးန့ၣ်လီၤ.
ဘၣ်တဘျီဘျီ, မ့ၢ်လၢပဆိကမိၣ် ပတအိၣ်ဒီးနီၢ်သးအတၢ်ဟ့ၣ်, တၢ်ထုကဖၣ်ဘၣ်န့ၣ်လီၤ. ဘၣ်ဆၣ်, ကယဲၢ်နီၢ်သးအတၢ်ဟ့ၣ်တဖၣ်လၢ လံာ်စီဆှံ အတၢ်ပာ်ဖျါအကျါန့ၣ်, တၢ်ထုကဖၣ်တပၣ်ဘၣ်. ဘၣ်သ့ၣ်သ့ၣ်, ကမ့ၢ်ဝဲဒၣ် ဒ်သိးပကထံၣ်ဘၣ်တၢ်လၢယွၤမၤဝဲသ့ထဲဒၣ်တဂၤဧိၤအဂီၢ်, ယွၤအဲၣ်ဒိးပဝဲတဂၤစုၢ်စုၢ် ပကဘါထုကဖၣ်တၢ်လၢ တၢ်သူၣ်တီသးတီအပူၤန့ၣ်လီၤ.
