ဖဲပတၢ်ဖျိအမူး အကတီၢ်န့ၣ်, ပတၢ်အိၣ်ဖှိၣ်သရၣ်သံကွၢ်ယၤ, “မ့ၢ်နအၢၣ်လီၤလၢနကအဲၣ်, ယူးယီၣ်, ဒီးစူၢ်ဒိကနၣ်နဝၤသးဘိ, တုၤတၢ်သံထုးဖးနၤတစုဧါ” န့ၣ်လီၤ. ယကွၢ် ယတၢ်အဲၣ်သးဘိတဘျး, ယစံးကသွံ, “ကဘၣ်စူၢ်ဒိကနၣ်အီၤ.” န့ၣ်လီၤ. ပသူၣ်ထီၣ် ပတၢ်ရ့လိာ် ဘၣ်ထွဲ လၢတၢ်အဲၣ်, ဒီးတၢ်ပးကဲလိာ်သးအလိၤ- တမ့ၢ်လၢတၢ်စူၢ်ဒိကနၣ်လိၤမိၣ်တၢ်အလိၤ န့ၣ်ဘၣ်. ယဝၤအပၢ် ဒိဃာ်ဝဲၢ်ဂီၤမူ(၀ံၣ်ဒံၢ်အိၣ်) လီၤတံၢ်လီၤဆဲး ဖဲယစံး “မ့ၢ်, ယအၢၣ်လီၤ” လၢယမဲာ်ချံတကျိၣ်တကျိၣ်အပူၤ, လၢဟဲပိာ်ထွဲထီၣ် တၢ်ကတိၤ “ကဘၣ်စူၢ်ဒိကနၣ်အီၤ” အခံန့ၣ်လီၤ.

အါနံၣ်အါလါအတီၢ်ပူၤ, ယွၤ ဒုးထံၣ်ယၤလၢ ယခီၣ်ဆၢ တၢ်ကတိၤ “စူၢ်ဒိကနၣ်” အံၤ တဘၣ်ထွဲဒီး ဝၤမါအတၢ်ရ့လိာ်ဘၣ်ထွဲလၢ တၢ်ကနၢ်ပၢၢ်အီၤကီခဲဘၣ်န့ၣ်လီၤ. တၢ်ကတိၤ “စူၢ်ဒိကနၣ်” အခီပညီအံၤ ယနၢ်ပၢၢ်တ့ၢ်ဝဲလၢ, “တၢ်ဒုးကဲထီၣ်အခ့အပှၤ” မ့တမ့ၢ် “မၤဆူၣ်မၤစိးတၢ်လၢ တၢ်ကအၢၣ်လီၤဒိကနၣ်တၢ်အဂီၢ်” ဘၣ်ဆၣ်, ကစၢ်ယွၤအကလုၢ်ကထါ တဆီၣ်ထွဲမၤစၢၤတၢ်ထံၣ်အံၤန့ၣ်ဘၣ်. အလီၢ်န့ၣ်, တၢ် “စူၢ်ဒိကနၣ်” လၢလံာ်စီဆှံပာ်ဖျါဝဲန့ၣ် မ့ၢ်ကျိၤကျဲအါမံၤလၢ ပအဲၣ်ကစၢ်ယွၤသ့န့ၣ်လီၤ. ယဝၤသးဘိဒီးယၤ ပမၤတၢ်ဖျီပှဲၤထီၣ် အနံၣ်သၢဆံ တၢ်စံးဘျုးစံးဖှိၣ်အဆၢကတီၢ်, ခီဖျိသးစီဆှံ ကစၢ်အစိကမီၤန့ၣ်, ပကအဲၣ်ကစၢ်ယ့ၣ်ရှူး, ဒီးပအဲၣ်လိာ်ကွံလိာ်သးတဂၤဒီးတဂၤအဂီၢ် ပဘၣ်ဃုမၤလိန့ၢ်ဒံးဒၣ်အဖၢမုၢ်န့ၣ်လီၤ.

ကစၢ်ယ့ၣ်ရှူးစံးဝဲ ဖဲ ယိၤ ၁၄:၁၅ အပူၤ, “သုမ့ၢ်အဲၣ်ယၤဒီးတိၢ်န့ၢ် ယတၢ်မၤလိာ်တဖၣ်တက့ၢ်” ဝံၤ, အဆၢဖိ ၁၆-၂၀ န့ၣ် အဝဲဒုးနဲၣ်ပှၤလၢ, တၢ်စူၢ်ဒိကနၣ် ကစၢ်ယွၤ ကလုၢ်ကထါ ကမ့ၢ်ဝဲတၢ်အစၢ အိၣ်ဟဲလၢ တၢ်အဲၣ်ယွၤတပယူာ်ဃီ, ဒီးတၢ်ရ့လိာ်ဘၣ်ထွဲလိာ်သး ဘူးဘူးတံၢ်တံၢ်ဒီးကစၢ်ယွၤန့ၣ်လီၤ.

ကစၢ်ယ့ၣ်ရှူးအတၢ်အဲၣ်မ့ၢ် တၢ်စူးကွံာ်ညိကွံာ်သး, လၢဆီတလဲအသးတသ့, ဒီးတမၢဆူၣ်မၤစိးတၢ်, မ့တမ့ၢ် တမၤတရီတပါတၢ်နီတဘျီဘၣ်. ဖဲလၢပလူၤပိာ်အခံ, ဒီးမၤလၤကပီၤအီၤလၢ ပတၢ်ရ့လိာ်ဘၣ်ထွဲခဲလၢာ်အပူၤန့ၣ်ဒီး, သးစီဆှံကစၢ် ကမၤစၢၤပှၤ ဒ်သိးပကထံၣ်န့ၢ် တၢ်စူၢ် ဒိကနၣ်ကစၢ်ယ့ၣ်ရှူး, ဒ်အမ့ၢ်တၢ်နာ်သန့ၤ, ဒီးတၢ်ဘူၣ်ထီၣ်ဘါထီၣ်အတၢ်မၤ လၢအိၣ်ဒီးတၢ်ကူၣ်သ့, ဒီးအလီၤအဲၣ်လီၤကွံတမံၤအဂီၢ်န့ၣ်လီၤ.