ဘၣ်တဂီၤ, ဖဲ ဒံန် (Dean) ဟးထီၣ်လၢဟံၣ်န့ၣ်ဒီး, ထံၣ်အတံၤသကိးတနီၤ လၢအစုပူၤအိၣ်ဒီး ကလံၤဖျၢၣ် (Balloons)တဖၣ် အိၣ်ခိးအီၤန့ၣ်လီၤ. အတံၤသကိး ကၠီး (Josh) ဟဲဆူအအိၣ်, ဒီးတချုးဟ့ၣ်လီၤလံာ်ဒၢတဖျၢၣ်ဆူ ဒံန် အအိၣ်န့ၣ် စံးဝဲ, “ထါလၢနကွဲးန့ၣ် ပထၢနုာ်လီၤ လၢတၢ်ပြၢအပူၤ” န့ၣ်လီၤ. လံာ်ဒၢပူၤအိၣ်ဒီး ခးဖိတဘ့ၣ်, ကွဲးဃာ်အသးလၢ “ခိၣ်ဖးတၢ,” ဒီးတယံာ်ဘၣ်န့ၣ် ပှၤကိးဂၤ ဟီၣ်ဝဲဒၣ်ဒီးမဲာ်ထံမဲာ်နိ လၢတၢ်သးခုန့ၣ်လီၤ. ဒံန် အတံၤသကိးတဖၣ် မၤဂ့ၤတၢ်တမံၤ, တူၢ်လိာ်မၤဂၢၢ်ဂၢၢ်ကျၢၤ တၤလၣ်လၢ အသ့ ကွဲးတၢ်န့ၣ်လီၤ.
တၢ်ဟီၣ်တၢ်ယၢၤ လၢတၢ်သးခုအဂီၢ်န့ၣ် မ့ၢ်တၢ်လဲၤခီဖျိလၢ ဖျါထီဒါလိာ်သးန့ၣ်လီၤ. ညီနုၢ်တၢ်မဲာ်ထံမဲာ်နိ မ့ၢ်တၢ်ပာ်ဖျါ တၢ်ဘၣ်ဒိဆါ, ဒီးတမ့ၢ် တၢ်သးခုဘၣ်. ဒီးတၢ်သးခုန့ၣ် ညီနုၢ်မ့ၢ် တၢ်နံၤတၢ်အ့, ဒီးတမ့ၢ် မဲာ်ထံမဲာ်နိဘၣ်. ပှၤအံၣ်တလံၣ် သးပီညါကူၣ်သ့တဖၣ် မၤနီၣ်ဝဲလၢ တၢ်သးခုအမဲာ်ထံတဖၣ် ဟဲလီၤဝဲ ဖဲပှၤတဂၤအနီၢ်ကစၢ် အသးကလၢၢ်ဘၣ်တၢ်ယိာ်ယိာ်အကတီၢ်, ဒ်အမ့ၢ် ပသးကလၢၢ်ဘၣ်လၢ ပဘၣ်တၢ်အဲၣ်ပှၤယိာ်ယိာ်, မ့တမ့ၢ် ပမၤန့ၢ်မၤနၢၤ ပဖီတၢၣ်မိၢ်ပှၢ်တမံၤမံၤအဃိန့ၣ်လီၤ. လၢတၢ်န့ၣ်အဃိ ပှၤကူၣ်သ့တဖၣ် အၢၣ်လီၤဝဲလၢ တၢ်သးခု အမဲာ်ထံတဖၣ်မ့ၢ်နီၣ်ထိၣ်တၢ်ပနီၣ်လၢ ပတၢ်အိၣ်မူအခီပညီ အဂီၢ်န့ၣ်လီၤ.
ယထံၣ်မှံကွၢ်ယဲလၢ တၢ်သးခု အမဲာ်ထံတဖၣ် ကဟဲယွၤလီၤဝဲ ဖဲကစၢ်ယ့ၣ်ရှူး လဲၤတၢ်တပူၤလၢ်လၢ်န့ၣ်လီၤ. ယိၤ ၉:၁-၉ ပာ်ဖျါဝဲ, ဖဲကစၢ်ယ့ၣ်ရှူး ယါဘျါ အဖိခွါ, ဖိလၢဟဲအိၣ်ဖျဲၣ်ထီၣ်, ဒီးအမဲာ်တထံၣ်တၢ်တဂၤ အမိၢ်အပၢ် မ့ၢ်တဟီၣ်ဝဲဒီးတၢ်သးခုန့ၣ် အိၣ်ကသ့ဒ်လဲၣ်. မ့တမ့ၢ်ဘၣ်ဒီး ဖဲ ယိၤ ၁၁:၃၈-၄၄ အပူၤ ပကထံၣ်ဘၣ် နီၢ်မၤရံဒီးနီၢ်မၤသၤ အဂ့ၢ်, ဖဲအဒီပုၢ်ဝဲၢ်ခွါ မူထီၣ်ကဒါက့ၤအကတီၢ်န့ၣ်လီၤ. ဖဲယွၤအပှၤဂီၢ်မုၢ်တဖၣ် ဘၣ်တၢ်စိာ်ကဒါက့ၤဆူ ကီၢ်တၢ်စံးပာ်န့ၣ်ဒီး ယံး ၃၁:၉ အပူၤန့ၣ် ကစၢ်ယွၤစံးဝဲလၢ, “ဟီၣ်ဝဲဒီးကဟဲ, ဒီးယကဆှၢအီၤဒီးတၢ်မၤမုာ်ထီၣ်က့ၤအသး” န့ၣ်လီၤ.
တၢ်သးခုအမဲာ်ထံ မ့ၢ်ဒုးနဲၣ်ပှၤလၢ ပတၢ်အိၣ်မူအခီပညီန့ၣ်ဒီး, ကွၢ်ဆိကမိၣ်ထံၣ်မှံ မုၢ်နံၤသးခုလၢအကဟဲအံၤအဂ့ၢ်န့ၣ်တက့ၢ်. မဲာ်ထံမဲာ်နိတဖၣ် မ့ၢ်ဟဲယွၤလီၤလၢ ပမဲာ်သၣ်လိၤန့ၣ်ဒီး, ပသ့ၣ်ညါလၢ တၢ်အိၣ်မူအခီပညီန့ၣ် မ့ၢ်တၢ်အိၣ်မူဘူးဘူးတံၢ်တံၢ်ဒီးကစၢ်ယွၤထီဘိလီၤန့ၣ် ပသမၢအလီၢ်တအိၣ်ဘၣ်န့ၣ်လီၤ.
