“ဃ့ထုကဖၣ်တၢ်လၢ ယကဘၣ်ဒိ ခိၣ်နူာ် စကဲ(န်) (scan) အဂီၢ်,” “ယဖိတဖၣ် ဒ်သိး ကဟဲက့ၤကဒါဆူ တၢ်အိၣ်ဖှိၣ်အဂီၢ်” “တၢ်မၤမုာ်ထီၣ်က့ၤ ဒ့း (Dave), လၢအမါလဲၤပူၤကွံာ် ဟီၣ်ခိၣ်အဂီၢ်.” ပဃ့ဘါထုကဖၣ်သကိးတၢ်တဖု ဒိးန့ၢ် တၢ်ထုကဖၣ်အတၢ်သကွံၢ်ကညးစရီ ဒ်သိးအံၤတဖၣ်, တနွံဘၣ်တနွံအဃိ, ပထုကဖၣ် ဒီးဆှၢန့ၢ် စုတၢ်ကွဲးဟ့ၣ်ဂံၢ်ဟ့ၣ်ဘါ ဖုၣ်ကိာ်တဖၣ် ဆူပှၤတဂၤစုာ်စုာ် သ့ဝဲဒၣ်န့ၣ်လီၤ. တၢ်သကွံၢ်ကညးတဖၣ် အါတလၢအဃိ, ပတၢ်ဂုာ်ကျဲးစၢးတဖၣ် ကမၤသးဒ်အမ့ၢ် တၢ်အဆံး ဒီးပှၤတပာ်သူၣ်ပာ်သးဘၣ်န့ၣ်လီၤ. တၢ်ထံၣ်အံၤဆီတလဲကွံာ်အသး, ဖဲလၢယဒိးန့ၢ် ခးဖိလၢ ဒ့း, ဝၤတဂၤလၢ အအိၣ်သယုၢ် သညိသီသံၣ်ဘှဲ ဆှၢလီၤ, စံးဘျုးစံးဖှိၣ်ပှၤ လၢသူၣ်ဒီဖျၢၣ်သးဒီဖျၢၣ်, ဃုာ်ဒီး “တၢ်ကွဲးဖျါထီၣ် အမါသးဘိ အဂ့ၢ်အကျိၤ” န့ၣ်လီၤ. ယသ့ၣ်ညါနၢ်ပၢၢ်က့ၤအသီတဘျီလၢ တၢ်ထုကဖၣ်န့ၣ် မ့ၢ်တၢ်လၢအကါဒိၣ်တမံၤန့ၣ်လီၤ.

ကစၢ်ယ့ၣ်ရှူး မၤလိဟ့ၣ်ဒိပှၤလၢ ပကြၢးဃ့ထုကဖၣ် တလီၢ်လီၢ်, လၢတၢ်သးဆူၣ်, အိၣ်ဒီး တၢ်နာ်လၢအပှဲၤဒီး တၢ်မုၢ်လၢ်န့ၣ်လီၤ. လၢဟီၣ်ခိၣ်အံၤ, တၢ်ဆၢကတီၢ်လၢအဂီၢ်မ့ၢ် တၢ်တစိၢ်ဖိဘၣ်ဆၣ်, မၢ် ၁:၃၅, ၆:၄၆, ၁၄:၃၂ န့ၣ်ပကထံၣ်ဘၣ် ကစၢ်ယ့ၣ်ရှူး ပာ်ဒိၣ် တၢ်ထုကဖၣ်, ထုးဖးသးဒီးဃ့ထုကဖၣ်တၢ်န့ၣ်လီၤ.

အပူၤကွံာ် နံၣ်ကယၤတဖၣ်အပူၤန့ၣ်, ယူဒၤအစီၤပၤ ဃံးစကံယၤစ့ၢ်ကီး မၤလိန့ၢ်တၢ် ဒ်သိးအံၤန့ၣ်လီၤ. ၂ စီၤပၤ ၂၀:၁ အပူၤ, ဝံစံးဘၣ်အီၤလၢ ကဘၣ်သံဝဲလၢအတၢ်ဆါအဂ့ၢ် န့ၣ်လီၤ. အဆၢဖိ ၂ ပာ်ဖျါဝဲ, လၢတၢ်သးအုးဒီး တၢ်ဟီၣ်တၢ်ယၢၤနးနးအပူၤ စီၤဃံးစကံယၤ “ဃၣ်ဃီၤအမဲာ်ဆူ တၢ်ဒူၣ်ဒီးဘါထုကဖၣ်ယွၤလီၤ.” လၢတၢ်န့ၣ်အဃိ, ကစၢ်ယွၤစံးဆၢအီၤ တကီၢ်ခါန့ၣ်လီၤ. အဆၢဖိ ၅-၆ န့ၣ် ပကထံၣ်ဘၣ် ကစၢ်ယွၤ မၤဘျါက့ၤ စီၤပၤ အတၢ်ဆါ, ဟ့ၣ်အါထီၣ်အီၤ သးအနံၣ်အလါ ဆူညါတဆံယဲၢ်နံၣ်, ဒီးအၢၣ်လီၤဝဲလၢ ကမၤပူၤဖျဲး စီၤပၤအဘီမုၢ် လၢဒုၣ်ဒါတဖၣ်အစုန့ၣ်လီၤ. အဆၢဖိ ၆ စံးဘၣ်ပှၤလၢ ကစၢ်ယွၤစံးဆၢ စီၤပၤ အတၢ်ထုကဖၣ်န့ၣ် တမ့ၢ်လၢ အဝဲအိၣ်မူတၢ်အိၣ်မူအဂ့ၤအဃိဘၣ်. မ့ၢ်ဒၣ်လၢ “ယွၤအနီၢ်ကစၢ်ဒၣ်ဝဲ ဒီးအခ့အပှၤစီၤဒၤဝံးအဃိ” န့ၣ်လီၤ. တၢ်လၢပဃ့တဖၣ်န့ၣ် တမ့ၢ်ပကဒိးန့ၢ်အီၤ ထီဘိဘၣ်ဆၣ် ပသ့ၣ်ညါလီၤတံၢ်သ့ဝဲလၢ ကစၢ်ယွၤမၤတၢ် လၢတၢ်ထုကဖၣ်ခဲလၢာ်အပူၤ, ဒီးမၤတၢ်ခီဖျိလၢ တၢ်ထုကဖၣ်န့ၣ်လီၤ.